,,დიპლომატიური სამსახურის გავლის წესის დამტკიცების შესახებ“ საქართველოს საგარეო საქმეთა მინისტრის 2019 წლის 2 მაისის №01-74 ბრძანებაში ცვლილების შეტანის შესახებ

,,მუხლი 11​¹. პირველადი სტრუქტურული ერთეულის ხელმძღვანელისა და მისი მოადგილის დანიშვნის წესი

1. ადმინისტრაციული ხელშეკრულებით პირველადი სტრუქტურული ერთეულის ხელმძღვანელისა და მისი მოადგილის პოზიციაზე, შესაბამისი სახელმწიფო-პოლიტიკური თანამდებობის პირის (მინისტრის ან კურატორი მინისტრის მოადგილის) წარდგინებითა და მინისტრის უფლებამოსილების ვადით მიიღება პირი, რომელიც აკმაყოფილებს ამ წესის მე-6 მუხლის 3​¹ პუნქტით დადგენილ მოთხოვნებს.

2. ადმინისტრაციული ხელშეკრულებით პირველადი სტრუქტურული ერთეულის ხელმძღვანელის და მისი მოადგილის პოზიციაზე შესაძლებელია დაინიშნოს:

ა) გენერალური დირექტორი;

ბ) დეპარტამენტის დირექტორი;

გ) დეპარტამენტის დირექტორის მოადგილე;

დ) მინისტრის სამდივნოს უფროსი;

ე) სამსახურის უფროსი;

ვ) სამსახურის უფროსის მოადგილე.

3. ამ მუხლის მე-2 პუნქტით განსაზღვრულ პირებთან გასაფორმებელი ადმინისტრაციული ხელშეკრულების სტანდარტული ფორმა მტკიცდება საქართველოს მთავრობის მიერ.

4. ამ მუხლის მეორე პუნქტით განსაზღვრული პირები, „საჯარო სამსახურის შესახებ“ საქართველოს კანონის შესაბამისად, ითვლებიან აგრეთვე საჯარო მოხელეებად.

5. ამ მუხლის მე-2 პუნქტის „ა-დ“ ქვეპუნქტებით განსაზღვრულ პირებს ენიჭებათ დიპლომატიური რანგი, კანონმდებლობით დადენილი წესის შესაბამისად.

6. საქართველოს კანონმდებლობით დადგენილი წესითა და მინისტრის გადაწყვეტილებით პირველადი სტრუქტურული ერთეულის ხელმძღვანელი/მოადგილე შესაძლებელია წარიგზავნოს საზღვარგარეთ საქართველოს დიპლომატიურ წარმომადგენლობასა და საკონსულო დაწესებულებაში როტაციის წესით სამუშაო მივლინებით, როგორც დიპლომატიურ (დიპლომატიური რანგის არსებობის შემთხვევაში), ასევე ადმინისტრაციულ თანამდებობაზე.

7. პირველადი სტრუქტურული ერთეულის ხელმძღვანელთან და მის მოადგილესთან გაფორმებული ადმინისტრაციული ხელშეკრულების შეწყვეტის საფუძვლებია:

ა) საქართველოს სამოქალაქო კოდექსით დადგენილი წესით შეზღუდულქმედუნარიანად აღიარება;

ბ) სასამართლოს მიერ უგზო-უკვლოდ დაკარგულად აღიარება, გარდაცვლილად გამოცხადება ან მხარდაჭერის მიმღებად ცნობა, თუ სასამართლოს გადაწყვეტილებით სხვა რამ არ არის განსაზღვრული;

გ) პირის მიმართ სასამართლოს საბოლოო გამამტყუნებელი განაჩენის კანონიერ ძალაში შესვლა;

დ) მძიმე დისციპლინური გადაცდომის ჩადენა, თუ დისციპლინური პასუხისმგებლობის ზომად სამსახურიდან გათავისუფლება განისაზღვრა;

ე) სხვა თანამდებობაზე დანიშვნა;

ვ) ნარკოტიკული საშუალების მოხმარების ფაქტის დადასტურება, გარდა მოხელის მიერ მისი სამკურნალო მიზნით მოხმარების შემთხვევისა, აგრეთვე პერიოდული, შემთხვევითი შერჩევის პრინციპით შემოწმებისთვის თავის არიდება;

ზ) გარდაცვალება;

თ) მინისტრის უფლებამოსილების შეწყვეტა.

8. ამ მუხლის მე-7 პუნქტის ,,თ“ ქვეპუნქტით გათვალისწინებულ შემთხვევაში, პირველადი სტრუქტურული ერთეულის ხელმძღვანელსა და მის მოადგილეს უფლებამოსილების ვადა უწყდებათ მინისტრის პოზიციაზე შერჩეული პირის უფლებამოსილების დაწყებისთანავე.

9. ამ მუხლის მე-7 პუნქტით გათვალისწინებული შემთხვევების გარდა, ადმინისტრაციული ხელშეკრულება შეიძლება შეწყდეს აგრეთვე ხელშეკრულების ერთ-ერთი მხარის ინიციატივით, რის თაობაზედაც 1 თვით ადრე უნდა ეცნობოს მეორე მხარეს. თუ ამ პუნქტის შესაბამისად ადმინისტრაციული ხელშეკრულება მინისტრის ინიციატივით წყდება, ადმინისტრაციული ხელშეკრულებით დასაქმებულ პირს ეძლევა კომპენსაცია 1 თვის თანამდებობრივი სარგოს ოდენობით. ხოლო თუ ამ პუნქტის შესაბამისად ადმინისტრაციული ხელშეკრულება მინისტრის ინიციატივით მეორე მხარისათვის 1 თვეზე უფრო გვიანდელი შეტყობინების ფარგლებში წყდება, ადმინისტრაციული ხელშეკრულებით დასაქმებულ პირს ეძლევა კომპენსაცია 2 თვის თანამდებობრივი სარგოს ოდენობით.

10. ადმინისტრაციული ხელშეკრულების შეწყვეტის შემთხვევაში ამ მუხლის მე-2 პუნქტის „ა-დ“ ქვეპუნქტებით გათვალისწინებული პირები ირიცხებიან დიპლომატიური სამსახურის რეზერვში.

11. პირველადი სტრუქტურული ერთეულის ხელმძღვანელსა და მის მოადგილეზე არ ვრცელდება ამ წესის მე-12 და მე-13 მუხლებით დადგენილი მოთხოვნები.

12. პირველადი სტრუქტურული ერთეულის ხელმძღვანელსა და მის მოადგილეზე ვრცელდება ამ წესის მე-17, 26-ე-31-ე, 32^​1-33^​1, 35-ე-36-ე, 38-ე, 39-ე-44-ე, 47-ე-51-ე მუხლებით დადგენილი მოთხოვნები, მათთან გაფორმებული ადმინისტრაციული ხელშეკრულებით განსაზღვრული თავისებურებების გათვალისწინებით.

13. ადმინისტრაციული ხელშეკრულების დადებასთან, შესრულებასა და შეწყვეტასთან დაკავშირებული დავები განიხილება საქართველოს ადმინისტრაციული საპროცესო კანონმდებლობით დადგენილი წესით.“.