სახელმწიფო შესყიდვებთან დაკავშირებით გასატარებელი ზოგიერთი ღონისძიების შესახებ

1. განისაზღვროს შესყიდვების ერთიანი ლექსიკონის (CPV კოდების) მიხედვით კლასიფიკატორის კოდები და ზოგიერთი CPV კოდის მონეტარული ზღვრები, რომელთა ფარგლებში, საქართველოს მთავრობის/პრემიერ-მინისტრის კონტროლს დაქვემდებარებული/ანგარიშვალდებული საბიუჯეტო ორგანიზაციების მიერ, საქართველოს სამინისტროებისა და მათ კონტროლს დაქვემდებარებული საბიუჯეტო ორგანიზაციების მიერ, ასევე იმ საჯარო სამართლის იურიდიული პირების მიერ, რომელთა ხელმძღვანელებსაც ნიშნავს საქართველოს პრემიერ-მინისტრი, სახელმწიფო შესყიდვების განხორციელება საჭიროებს საქართველოს მთავრობის წინასწარ თანხმობას, წესის (დანართი №1) შესაბამისად.

2. განისაზღვროს შესყიდვების ერთიანი ლექსიკონის (ერთჯერადად შესყიდვის ღირებულება აჭარბებს CPV კოდს) მიხედვით კლასიფიკატორის კოდები და მონეტარული ზღვრები, რომელთა ფარგლებში, „პირველი, მეორე და მესამე კატეგორიების კრიტიკული ინფორმაციული სისტემების სუბიექტების ნუსხის დამტკიცების შესახებ“ საქართველოს მთავრობის 2021 წლის 31 დეკემბრის №646 დადგენილებით განსაზღვრული, პირველი კატეგორიის კრიტიკული ინფორმაციული სისტემის სუბიექტების, მათ დაქვემდებარებაში მყოფი/კონტროლირებადი დაწესებულებების/საჯარო ან/და კერძო სამართლის იურიდიული პირების მიერ ინფორმაციულ ტექნოლოგიებთან დაკავშირებული სახელმწიფო შესყიდვების განხორციელება საჭიროებს საქართველოს სახელმწიფო უსაფრთხოების სამსახურის მმართველობის სფეროში შემავალი საჯარო სამართლის იურიდიული პირის − საქართველოს ოპერატიულ-ტექნიკური სააგენტოს წინასწარ თანხმობას, წესის (დანართი №2) შესაბამისად.

მუხლი 2

დანართ №1-ის პირველი მუხლით განსაზღვრული სუბიექტების გარდა:

ა) სხვა შემსყიდველმა ორგანიზაციებმა, გარდა ამ მუხლის „ბ“ ქვეპუნქტით განსაზღვრული შემსყიდველი ორგანიზაციებისა, უზრუნველყონ დანართ №1-ის პირველი მუხლით გათვალისწინებული CPV კოდების ფარგლებში სახელმწიფო შესყიდვების განხორციელების დაწყებამდე საქართველოს მთავრობისათვის შესყიდვის ობიექტის შესახებ შესაბამისი ინფორმაციის წარმოდგენა;

ბ) მუნიციპალიტეტებმა და მუნიციპალიტეტის მიერ დაფუძნებულმა იურიდიულმა პირებმა უზრუნველყონ დანართ №1-ის პირველი მუხლით გათვალისწინებული CPV კოდების ფარგლებში სახელმწიფო შესყიდვების განხორციელების დაწყებამდე საქართველოს რეგიონული განვითარებისა და ინფრასტრუქტურის სამინისტროსთვის შესყიდვის ობიექტის შესახებ შესაბამისი ინფორმაციის წარდგენა.

მუხლი 3. დანართ №1-ის პირველი და მე-2 მუხლებით განსაზღვრულმა შემსყიდველმა ორგანიზაციებმა წინასწარი თანხმობის მისაღებად წარსადგენ ან ინფორმირების მიზნით გაგზავნილ დოკუმენტაციას თან უნდა დაურთონ:

ა) შემსყიდველი ორგანიზაციების მიერ შესყიდვის განხორციელების მიზნობრიობისა და აუცილებლობის დასაბუთება;

ბ) ბაზრის კვლევის ამსახველი ინფორმაცია, დანართ №1-ის პირველი მუხლით განსაზღვრული კლასიფიკატორის კოდში შემავალი შესყიდვის თითოეული ობიექტისათვის ცალ-ცალკე; იმ შემთხვევაში, თუ ბაზრის კვლევა განხორციელებულია ინვოისების საფუძველზე, ბაზრის კვლევის ამსახველი დოკუმენტაცია უნდა აერთიანებდეს მინიმუმ სამი პოტენციური მიმწოდებლის შეთავაზებას. ამ ქვეპუნქტით განსაზღვრული მიმწოდებლების მინიმალური რაოდენობის გამოკითხვის შეუძლებლობის შემთხვევაში, შემსყიდველმა ორგანიზაციამ შესაბამის დოკუმენტაციაში (სამართლებრივი აქტის პროექტის განმარტებითი ბარათი/ინფორმაცია) უნდა დაასაბუთოს ბაზრის კვლევაში მინიმუმ სამი პრეტენდენტის მონაწილეობის შემაფერხებელი გარემოებები;

გ) დაზიანებული/ამორტიზებული შესყიდვის ობიექტის შეცვლის მიზნით გამოსაცხადებელი შესყიდვის ელექტრონული პროცედურის შემთხვევაში – საქართველოს კანონმდებლობით დადგენილი წესით მომზადებული დეფექტური აქტი/დასკვნა;

დ) დანართ №1-ის მე-8 მუხლის მე-2 პუნქტით განსაზღვრული დასაბუთება, საჭიროებისამებრ.

მუხლი 4

1. დანართ №1-ის პირველი მუხლითა და მე-2 მუხლის „ა“ ქვეპუნქტით განსაზღვრული შემსყიდველი ორგანიზაციების მიერ საქართველოს მთავრობისგან წინასწარი თანხმობის მისაღებად წარსადგენ ან საქართველოს მთავრობისთვის ინფორმირების მიზნით გამოგზავნილ დოკუმენტაციას განიხილავს საქართველოს მთავრობის ადმინისტრაციის შესაბამისი სტრუქტურული ერთეული (დოკუმენტაცია საქართველოს მთავრობას წარმოედგინება შესაბამისი ელექტრონული დოკუმენტბრუნვის პროგრამის მეშვეობით), რომელიც:

ა) უფლებამოსილია, ფასების ადეკვატურობის დადგენის მიზნით, განახორციელოს შესაბამისი ღონისძიებები, მათ შორის, შესყიდვის ელექტრონული პროცედურის ტექნიკური ან/და საკვალიფიკაციო მოთხოვნების კონკურენტუნარიანობის კვლევა, შემსყიდველი ორგანიზაციისთვის მის მიერ განხორციელებული ბაზრის კვლევის ალტერნატიული მეთოდით ჩატარების მოთხოვნა;

ბ) ინფორმირების მიზნით, წარდგენილ დოკუმენტაციაზე გასცემს რეკომენდაციას (დადებითი, უარყოფითი ან შენიშვნებით), რომელიც არ არის ინდივიდუალური ადმინისტრაციულ-სამართლებრივი აქტი.

2. დანართ №1-ის მე-3 მუხლით განსაზღვრული ინფორმაციის განხილვის ვადა შეადგენს 10 სამუშაო დღეს მისი განსახილველად რეგისტრაციის მომენტიდან.

3. ინფორმირების მიზნით წარმოდგენილ დოკუმენტაციაზე გაცემული ნებისმიერი რეკომენდაციის ასლი ეგზავნება სსიპ – სახელმწიფო შესყიდვების სააგენტოს.

4. განსაკუთრებული საჭიროებისას, საქართველოს მთავრობის ადმინისტრაციის უფროსის გადაწყვეტილებით, ერთჯერადად შესაძლებელია ამ მუხლის მე-2 პუნქტით დადგენილი განხილვის ვადის გაგრძელება 3 სამუშაო დღით, რაც უნდა ეცნობოს შემსყიდველ ორგანიზაციას.

5. ამ მუხლის მე-2 და მე-4 პუნქტებით დადგენილი ვადის განმავლობაში სხვაგვარი გადაწყვეტილების მიუღებლობის შემთხვევაში, საკითხი მიიჩნევა განხილულად.

მუხლი 5. საქართველოს მთავრობის ადმინისტრაციასთან ურთიერთობისას, ამ დადგენილებით განსაზღვრული შემსყიდველი ორგანიზაციების მიერ წარმოდგენილ დოკუმენტაციას ხელს აწერენ მხოლოდ შესაბამისი შემსყიდველი ორგანიზაციის ხელმძღვანელი/ხელმძღვანელის მოადგილე, გარდა იმ შემთხვევისა, როდესაც შესაბამისი დოკუმენტაცია წარმოდგენილია იმ უწყების ხელმძღვანელის/ხელმძღვანელის მოადგილის მიერ, რომლის სისტემაშიც/მმართველობის სფეროშიც შედის ეს შემსყიდველი ორგანიზაცია. საქართველოს მთავრობის ადმინისტრაცია არ განიხილავს ამ წესის დარღვევით წარმოდგენილ დოკუმენტაციას.

მუხლი 6. სსიპ – სახელმწიფო შესყიდვების სააგენტომ უზრუნველყოს, რომ დანართ №1-ის პირველ მუხლში მითითებულ საბიუჯეტო ორგანიზაციებს, სახელმწიფო შესყიდვების ერთიანი ელექტრონული სისტემის მეშვეობით, დანართ №1-ის პირველი მუხლით განსაზღვრული CPV კოდების ფარგლებში სახელმწიფო შესყიდვების განხორციელების უფლება მიეცეთ მხოლოდ საქართველოს მთავრობის წინასწარი თანხმობის მიღების შემდგომ.

მუხლი 7

დანართი №1 ვრცელდება ელექტრონული საშუალებით განხორციელებულ სახელმწიფო შესყიდვებზე, გარდა:

ა) კონსოლიდირებული ტენდერის ფარგლებში განხორციელებული შესყიდვებისა;

ბ) საერთაშორისო ორგანიზაციებისა და უცხო ქვეყნის მთავრობების (დონორების) მიერ დაფინანსებული პროექტების ფარგლებში განხორციელებული შესყიდვებისა;

გ) ზოგადსაგანმანათლებლო დაწესებულებებისა და უმაღლესი საგანმანათლებლო დაწესებულებების მიერ განხორციელებული შესყიდვებისა;

დ) საქართველოს სახალხო დამცველის აპარატის მიერ განხორციელებული შესყიდვებისა;

ე) საქართველოს პარლამენტის აპარატის მიერ განხორციელებული შესყიდვებისა;

ვ) საქართველოს ეროვნული ბანკის მიერ განხორციელებული შესყიდვებისა;

ზ) საქართველოს კომუნიკაციების ეროვნული კომისიის მიერ განხორციელებული შესყიდვებისა;

თ) საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ განხორციელებული შესყიდვებისა;

ი) სსიპ − საზოგადოებრივი მაუწყებლის მიერ განხორციელებული შესყიდვებისა;

კ) სსიპ − საზოგადოებრივი მაუწყებლის აჭარის ტელევიზიისა და რადიოს მიერ განხორციელებული შესყიდვებისა;

ლ) საქართველოს ცენტრალური საარჩევნო კომისიის მიერ განხორციელებული შესყიდვებისა.

მუხლი 8

1. დანართ №1-ის პირველი მუხლის თანახმად, საქართველოს მთავრობის მიერ წინასწარი თანხმობის გაცემის მიზნით, საქართველოს მთავრობის განკარგულების პროექტი განსახილველად წარმოედგინება საქართველოს მთავრობას, საქართველოს კანონმდებლობით დადგენილი წესით, მას შემდეგ, რაც შემსყიდველი ორგანიზაციები დანართ №1-ის მე-4 მუხლით გათვალისწინებული წესის შესაბამისად მიიღებენ დადებით რეკომენდაციას.

2. იმ შემთხვევაში, თუ დანართ №1-ის პირველი მუხლით გათვალისწინებული შემსყიდველი ორგანიზაციისათვის საქართველოს მთავრობის ადმინისტრაციის შესაბამისი სტრუქტურული ერთეულის მიერ გაიცა უარყოფითი ან შენიშვნებით რეკომენდაცია, რასაც არ ეთანხმება შემსყიდველი ორგანიზაცია, განკარგულების პროექტი განსახილველად წარმოედგინება საქართველოს მთავრობას, საქართველოს კანონმდებლობით დადგენილი წესით, შემსყიდველი ორგანიზაციის დასაბუთებული არგუმენტაციით.

3. დანართ №1-ის მე-4 მუხლის მე-5 პუნქტით გათვალისწინებულ შემთხვევაში, ამავე დადგენილების პირველი მუხლით განსაზღვრული შემსყიდველი ორგანიზაცია უფლებამოსილია, განკარგულების პროექტი განსახილველად წარმოუდგინოს საქართველოს მთავრობას წინასწარი თანხმობის მისაღებად.

მუხლი 9. „ეკონომიკური თავისუფლების შესახებ“ საქართველოს ორგანული კანონით დადგენილი მაკროეკონომიკური პარამეტრების მაქსიმალური ზღვრების დაცვის მიზნით, საქართველოს ორგანული კანონის „ადგილობრივი თვითმმართველობის კოდექსი“ 155 ¹ მუხლის საფუძველზე მინიჭებული უფლებამოსილების გათვალისწინებით, „საქართველოს 2026 წლის სახელმწიფო ბიუჯეტის შესახებ“ საქართველოს კანონის საფუძველზე შესაბამისი დადგენილების მიღებამდე/ამოქმედებამდე, დანართ №1-ით  განსაზღვრული პროცედურები შესაბამისად გავრცელდეს ამავე დანართით  განსაზღვრულ შემსყიდველ ორგანიზაციებზე, მათ მიერ 2026 წლის შესყიდვების გეგმით შესასყიდ იმ ობიექტებთან მიმართებით, რომლებიც ექცევიან  დანართ №1-ის პირველი მუხლით განსაზღვრულ კლასიფიკატორის კოდებში.

ცხრილი №1

დანართი №2

მუხლი 1. შესყიდვების ერთიანი ლექსიკონის (ერთჯერადად შესყიდვის ღირებულება აჭარბებს CPV კოდს) მიხედვით, კლასიფიკატორის კოდებისა და მონეტარული ზღვრების (ცხრილი №2) ფარგლებში, „პირველი, მეორე და მესამე კატეგორიების კრიტიკული ინფორმაციული სისტემების სუბიექტების ნუსხის დამტკიცების შესახებ“ საქართველოს მთავრობის 2021 წლის 31 დეკემბრის №646 დადგენილებით განსაზღვრული, პირველი კატეგორიის კრიტიკული ინფორმაციული სისტემის სუბიექტების (გარდა დანართ №2-ის    მე-2 მუხლით განსაზღვრული პირველი კატეგორიის კრიტიკული ინფორმაციული სისტემების სუბიექტებისა), მათ დაქვემდებარებაში მყოფი/ კონტროლირებადი დაწესებულებების/საჯარო ან/და კერძო სამართლის იურიდიული პირების მიერ (გარდა ზოგადსაგანმანათლებლო დაწესებულებებისა და უმაღლესი საგანმანათლებლო დაწესებულებებისა) ინფორმაციულ ტექნოლოგიებთან დაკავშირებული სახელმწიფო შესყიდვების განხორციელება საჭიროებს საქართველოს სახელმწიფო უსაფრთხოების სამსახურის მმართველობის სფეროში შემავალი საჯარო სამართლის იურიდიული პირის − საქართველოს ოპერატიულ-ტექნიკური სააგენტოს (შემდგომში – სააგენტო) წინასწარ თანხმობას.

მუხლი 2. დანართ №2-ის პირველი მუხლით განსაზღვრული სუბიექტების გარდა, ეთხოვოთ საქართველოს პარლამენტს, საქართველოს პრეზიდენტის ადმინისტრაციას, აჭარის ავტონომიური რესპუბლიკის უმაღლეს საბჭოს, აჭარის ავტონომიური რესპუბლიკის მთავრობის აპარატს, საქართველოს ეროვნულ ბანკს, საქართველოს პროკურატურას, საქართველოს ცენტრალურ საარჩევნო კომისიას, სსიპ – საპენსიო სააგენტოს, ქალაქ თბილისის მუნიციპალიტეტის საკრებულოს, ქალაქ თბილისის მუნიციპალიტეტის მერიას, ქალაქ თბილისის მუნიციპალიტეტის არასამეწარმეო (არაკომერციულ) იურიდიულ პირს – მუნიციპალური სერვისების განვითარების სააგენტოსა და სხვა შემსყიდველ ორგანიზაციებს (გარდა მუნიციპალიტეტებისა და მუნიციპალიტეტის მიერ დაფუძნებული იურიდიული პირებისა), უზრუნველყონ დანართ №2-ის პირველი მუხლით გათვალისწინებული CPV კოდების ფარგლებში, სახელმწიფო შესყიდვების განხორციელების დაწყებამდე, შესაბამისი ინფორმაციის მიწოდება სააგენტოსთვის.

მუხლი 3

დანართ №2-ის პირველი და მე-2 მუხლებით განსაზღვრულმა შემსყიდველმა ორგანიზაციებმა წინასწარი თანხმობის მისაღებად წარსადგენ ან ინფორმირების მიზნით გაგზავნილ დოკუმენტაციას თან უნდა დაურთონ:

ა) შემსყიდველი ორგანიზაციის დასახელება და საიდენტიფიკაციო კოდი;

ბ) შესყიდვის ობიექტის დასახელება;

გ) CPV კოდი;

დ) შესყიდვის ობიექტის აღწერა (ტექნიკური დავალება);

ე) რაოდენობა (მოცულობა);

ვ) ერთეულისა და ჯამური ღირებულება;

ზ) შესრულების ვადები და ადგილი;

თ) შემსყიდველი ორგანიზაციების მიერ შესყიდვის განხორციელების მიზნობრიობისა და აუცილებლობის დასაბუთება;

ი) ჩატარებული ბაზრის კვლევის შედეგები (თითოეული ობიექტისათვის ცალ-ცალკე) (ბაზრის კვლევის ამსახველი დოკუმენტაცია უნდა აერთიანებდეს არანაკლებ სამი პოტენციური მიმწოდებლის შეთავაზებას. მიმწოდებლების მინიმალური რაოდენობის გამოკითხვის შეუძლებლობის შემთხვევაში, შემსყიდველმა ორგანიზაციამ უნდა დაასაბუთოს ბაზრის კვლევაში მინიმუმ სამი პრეტენდენტის მონაწილეობის შემაფერხებელი გარემოებები).

მუხლი 4

1. დანართ №2-ით განსაზღვრული წინასწარი თანხმობის ან ინფორმირების მიზნით, სააგენტოსთვის წარდგენილ დოკუმენტაციასთან (ინფორმაციასთან) დაკავშირებით, სააგენტო უფლებამოსილია:

ა) წინასწარი თანხმობის მიზნით – ქსელური, აპარატული და პროგრამული უზრუნველყოფის საშუალებების, ასევე მათი შემუშავების ან/და მხარდაჭერის სახელმწიფო შესყიდვასთან დაკავშირებული ინფორმაციული და კიბერუსაფრთხოების საფრთხეების შეფასების ფარგლებში, გასცეს სათანადო მითითებები და რეკომენდაციები შესყიდვის განხორციელების მიზანშეწონილობის ან პროდუქტიულობის შესახებ, ასევე, დაზუსტების მიზნით, შემსყიდველი ორგანიზაციისაგან დამატებით მოითხოვოს შესაბამისი ინფორმაცია/დოკუმენტაცია;

ბ) ინფორმირების მიზნით წარდგენილ დოკუმენტაციაზე (საკითხზე) გასცეს რეკომენდაციები (დადებითი, უარყოფითი ან შენიშვნებით), რომლებიც არ არის ინდივიდუალური ადმინისტრაციულ-სამართლებრივი აქტი.

2. ამ მუხლის პირველი პუნქტით განსაზღვრული განხილვის ვადა შეადგენს 10 სამუშაო დღეს, მისი განსახილველად რეგისტრაციის მომენტიდან.

3. წინასწარი თანხმობისა და ინფორმირების მიზნით წარდგენილ დოკუმენტაციაზე გაცემული ნებისმიერი რეკომენდაციის ასლი ეგზავნება სსიპ – სახელმწიფო შესყიდვების სააგენტოს.

4. განსაკუთრებული საჭიროებისას, სააგენტოს უფროსის გადაწყვეტილებით, ერთჯერადად შესაძლებელია ამ მუხლის მე-2 პუნქტით დადგენილი განხილვის ვადის გაგრძელება 3 სამუშაო დღით, რაც უნდა ეცნობოს შემსყიდველ ორგანიზაციას.

5. ამ მუხლის მე-2 და მე-4 პუნქტებით დადგენილი ვადის განმავლობაში სხვაგვარი გადაწყვეტილების მიუღებლობის შემთხვევაში, საკითხი მიიჩნევა განხილულად.

მუხლი 5. სსიპ – სახელმწიფო შესყიდვების სააგენტომ უზრუნველყოს, რომ დანართ №2-ის პირველ მუხლში მითითებულ საბიუჯეტო ორგანიზაციებს, სახელმწიფო შესყიდვების ერთიანი ელექტრონული სისტემის მეშვეობით, დანართ №2-ის პირველი მუხლით განსაზღვრული CPV კოდების ფარგლებში სახელმწიფო შესყიდვების განხორციელების უფლება მიეცეთ მხოლოდ სააგენტოს წინასწარი თანხმობის მიღების შემდგომ.

მუხლი 6. დანართი №2 ვრცელდება ერთიანი ელექტრონული სისტემის საშუალებით განსახორციელებელ და გამარტივებულ სახელმწიფო შესყიდვებზე, გარდა კონსოლიდირებული ტენდერის ფარგლებში განხორციელებული შესყიდვებისა.

ცხრილი №2

CPV კოდები შესაბამისი მონეტარული ზღვრებით