„საქართველოს შინაგან საქმეთა სამინისტროს მმართველობის სფეროში შემავალ სახელმწიფო საქვეუწყებო დაწესებულებაში – საქართველოს სასაზღვრო პოლიციაში სამსახურის გავლის წესის დამტკიცების შესახებ“ საქართველოს შინაგან საქმეთა მინისტრის 2013 წლის 31 დეკემბრის №1014 ბრძანებაში ცვლილების შეტანის თაობაზე

1. მე-12 მუხლის მე-8 პუნქტი ჩამოყალიბდეს შემდეგი რედაქციით:

„8. სასაზღვრო პოლიციაში პირის მიღება ხდება სპეციალური კონკურსის წესით. ვაკანტურ თანამდებობაზე სპეციალური კონკურსის გარეშე შეიძლება დაინიშნოს პირი, რომელიც უკვე მიღებულია სამინისტროში (მსახურობს სამინისტროში ან აყვანილია კადრების განკარგულებაში) და გააჩნია შესაბამისი სპეციალური წოდება.“.

2. მე-19 მუხლი ჩამოყალიბდეს შემდეგი რედაქციით:

„მუხლი 19. სასაზღვრო პოლიციის მოსამსახურეთა სამხედრო აღრიცხვიდან მოხსნა

1. სასაზღვრო პოლიციის სახელმწიფო სპეციალური წოდების მქონე მოსამსახურე აიყვანება სპეციალურ სამხედრო აღრიცხვაზე და იხსნება წვევამდელის სამხედრო აღრიცხვიდან ან/და რეზერვისტის სამხედრო აღრიცხვიდან.

2. სასაზღვრო პოლიციის სახელმწიფო სპეციალური წოდების მქონე მოსამსახურე სპეციალურ სამხედრო აღრიცხვაზე აიყვანება სასაზღვრო პოლიციის უფროსის ბრძანებით.

3. სახელმწიფო სპეციალური წოდების მქონე მოსამსახურის სასაზღვრო პოლიციიდან  გათავისუფლების შემთხვევაში სასაზღვრო პოლიციის შესაბამისი საკადრო დანაყოფი ვალდებულია მისი გათავისუფლებიდან 2 კვირის ვადაში ამ პირის რეგისტრაციის ადგილის მიხედვით, ხოლო თუ პირს რეგისტრაციის ადგილი არ აქვს − ფაქტობრივი საცხოვრებელი ადგილის მიხედვით, მის შესაბამის სამხედრო აღრიცხვაზე ასაყვანად სამხედრო აღრიცხვის განმახორციელებელ სუბიექტს გაუგზავნოს დოკუმენტი სახელმწიფო სპეციალური წოდების მქონე მოსამსახურის სამსახურიდან გათავისუფლების შესახებ.“.

3. 25-ე მუხლის მე-4 პუნქტი ჩამოყალიბდეს შემდეგი რედაქციით:

„4. ამ მუხლის პირველი პუნქტის „გ-ე“ ქვეპუნქტებით დადგენილი ეტაპების გავლას არ ექვემდებარება სამინისტროს ყოფილი მოსამსახურე (სპეციალური წოდების მქონე პირი), თუ  სამინისტროდან მისი დათხოვნის შემდეგ არ არის გასული 6 თვე.“.

4. 62-ე მუხლის მე-2 პუნქტი ჩამოყალიბდეს შემდეგი რედაქციით:

„2. მკურნალობის დასრულების შემდეგ, საჭიროების შემთხვევაში (ავადმყოფობის გამოსავლიდან გამომდინარე) მოსამსახურე ექვემდებარება ჯანმრთელობის დაცვის სამსახურის ცენტრალური სამედიცინო კომისიის გავლას მისი ვარგისიანობის კატეგორიის დადგენიის მიზნით.“. 

5. დაემატოს შემდეგი შინაარსის 68-ე მუხლი:

„მუხლი 68. გარდამავალი დებულებები

1. 2025 წლის 1 იანვრამდე სასაზღვრო პოლიციაში სპეციალური წოდებით დანიშნულ/ჩარიცხულ წვევამდელს 4 წლის განმავლობაში უწყვეტი სამსახური ჩაეთვლება წვევამდელთა ეროვნული სამხედრო სამსახურის გავლად.   

2. ამ მუხლის პირველი პუნქტით გათვალისწინებული სამსახურის ვადის გასვლის შემდეგ პირს, რომელსაც მინიჭებული არ აქვს სამხედრო წოდება, მინისტრის ბრძანებით მიენიჭება რიგითის სამხედრო წოდება და ჩაირიცხება თავდაცვის ძალების რეზერვში.

3. ამ წესის 25-ე მუხლის მე-4 პუნქტით გათვალისწინებული ნორმა აგრეთვე ვრცელდება სამინისტროს სამხედრო წოდების მქონე ყოფილ მოსამსახურეზე, თუ მისი სამინისტროდან დათხოვნის დღიდან არ არის გასული 6 თვე.“.