“გადამხდელთა პირადი აღრიცხვის ბარათების წარმოების წესის შესახებ" ინსტრუქციის დამტკიცების თაობაზე" საქართველოს ფინანსთა მინისტრის 2005 წლის 7 აპრილის №228 ბრძანებაში ცვლილებებისა და დამატებების შეტანის თაობაზე"

სახელმწიფო სარეგისტრაციო კოდი 200.250.000.22.033.008.284

საქართველოს ფინანსთა მინისტრის

ბრძანება №220

2006 წლის 17 მარტი

ქ. თბილისი

„გადამხდელთა პირადი აღრიცხვის ბარათების წარმოების წესის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 7 აპრილის №228 ბრძანებაში ცვლილებისა და დამატებების შეტანის თაობაზე

საქართველოს საგადასახადო კოდექსის მე-3 მუხლისა და 73-ე მუხლის მე-2 ნაწილის საფუძველზე, ვბრძანებ:

მუხლი 1.

„გადამხდელთა პირადი აღრიცხვის ბარათების წარმოების წესის შესახებ” ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 7 აპრილის №228 ბრძანებით (სსმ III, 2005 წ, №42, მუხ.450) დამტკიცებულ ინსტრუქციაში შეტანილ იქნეს შემდეგი ცვლილება და დამატებები:

ა) ინსტრუქციის მე-13 მუხლს დაემატოს შემდეგი შინაარსის მე-8, მე-9 და მე-10 პუნქტები:

„8. გადასახადის გადამხდელის მოთხოვნის“ სარეგისტრაციო ჟურნალი უნდა იყოს დანომრილი, ზონარგაყრილი, ხელმოწერილი საგადასახადო ორგანოს ხელმძღვანელი პირის მიერ და დამოწმებული ბეჭდით.

9. „გადასახადის გადამხდელის მოთხოვნის“ სარეგისტრაციო ჟურნალი ინახება საგადასახადო ინსპექციის გადამხდელთა მომსახურების სამმართველოს პასუხისმგებელ მუშაკთან, რომელსაც ინდივიდუალური ადმინისტრაციულ-სამართლებრივი აქტით განსაზღვრავს საგადასახადო ინსპექციის უფროსი. მას ევალება ,,გადასახადის გადამხდელის მოთხოვნების” მიღება, აღრიცხვა, შენახვა და მასზე დროული რეაგირების თაობაზე კონტროლის დაწესება.

10. საგადასახადო დეპარტამენტი საჭიროების შემთხვევაში ახორციელებს „გადასახადის გადამხდელის მოთხოვნის“ სარეგისტრაციო ჟურნალის წარმოების სისწორის მონიტორინგს.“; 

ბ) ინსტრუქციის დანართი 13 ჩამოყალიბდეს თანდართული ფორმის შესაბამისად.

მუხლი 2.

ეს ბრძანება ამოქმედდეს გამოქვეყნებისთანავე.

 ა. ალექსიშვილი