„ბაღდათის მუნიციპალიტეტის საკრებულოს აპარატის დებულების დამტკიცების შესახებ” ბაღდათის მუნიციპალიტეტის საკრებულოს 2018 წლის 17 იანვრის N4 დადგენილებაში ცვლილების შეტანის თაობაზე

1. დადგენილებით დამტკიცებული მუნიციპალიტეტის საკრებულოს აპარატის დებულების მე-7 მუხლის (აპარატის პროფესიულ საჯარო მოხელეთა ფუნქცია-მოვალეობები):

ა) მე-3 პუნქტი ჩამოყალიბდეს შემდეგი რედაქციით:

„3.პირველი კატეგორიის უფროსი სპეციალისტი მუნიციპალიტეტის საკრებულოს, საკრებულოს კომისიების, ფრაქციების, დროებითი სამუშაო ჯგუფების სხდომების მომზადების საკითხებში უზრუნველყოფს:

ა)  საკრებულოს,  საკრებულოს ფრაქციების, საკრებულოს კომისიებისა და დროებითი სამუშაო ჯგუფების, საკრებულოსა და საკრებულოს კომისიების საკონსულტაციო ორგანოების სხდომების მომზადებას;

ბ)   სხდომებზე წესრიგის დაცვას, კენჭისყრის პროცედურის ჩატარებას, ხმების დათვლას, სხდომის ოქმების შედგენას, სხდომაზე გამოთქმული წინადადებებისა და შენიშვნების აღრიცხვას;

გ) ორგანიზაციას უწევს სხდომებზე მოწვეულ პირთა გაფრთხილებასა და მოწვევას, ახდენს მათ რეგისტრაციას;

დ)  საკრებულოს წევრებს კანონით განსაზღვრული უფლებამოსილების განხორციელებაში დახამარების გაწევას;

ე) საკრებულოს, საკრებულოს კომისიების, საკრებულოს ფრაქციებისა და საკრებულოს სამუშაო ჯგუფების, თანამდებობის პირებისა და საკრებულოს წევრების შეხვედრებს მოსახლეობასთან;

ვ)  სხვადასხვა დოკუმენტების, პროექტების, დასკვნების, მოხსენებითი ბარათების, სხვადასხვა შინაარსის აქტებისა და საქმისწარმოების მასალების უშუალო მომზადებასა და მათ შინაარსზე პასუხიმგებლობას“.“

ბ) მე-4 პუნქტი ჩამოყალიბდეს შემდეგი რედაქციით:

„4. პირველი კატეგორიის უფროსი სპეციალისტი ადამიანური რესურსების მართვის საკითხებში უზრუნველყოფს:

ა) საკრებულოს პოლიტიკური თანამდებობის პირებისა და აპარატის საჯარო მოსამსახურეთა მიერ „საჯარო სამსახურის შესახებ“ საქართველოს კანონის მოთხოვნათა შესრულებასა და კონტროლს;

ბ) საკრებულოს პოლიტიკური თანამდებობის პირებისა და აპარატის საჯარო მოსამსახურეთა  პირადი საქმეების წარმოებას; შრომის წიგნაკების, ჩანართი ფურცლების აღრიცხვა-წარმოებას; სოციალური საკითხების გადაწყვეტასა და საპენსიო საბუთების გაფორმებას წელთა ნამსახურობის მიხედვით;

გ) აპარატის საჯარო მოსამსახურეთა რეზერვის ერთიანი ბანკის შექმნასა და რეზერვისტთა მიზნობრივ გამოყენების შესახებ წინადადებების წარდგენას საკრებულოს თავმჯდომარისადმი;

დ) საკრებულოს პროფესიულ საჯარო მოხელეთა კარიერული განვითარების მიზნით: მომზადების, გადამზადებისა და კვალიფიკაციის ამაღლების ორგანიზებას; სტაჟირებისა და პრაქტიკის გავლასთან დაკავშირებული საკითხების თაობაზე წინადადებების წარდგენას საკრებულოს თავმჯდომარისადმი;

ე) საკრებულოს საჯარო მოსამსახურეთა მიერ „საჯარო სამსახურის შესახებ“ საქართველოს კანონის მოთხოვნათა შესრულების კონტროლს;

ვ) საკრებულოს საჯარო მოსამსახურეთა მიერ „საჯარო სამსახურის შესახებ“ საქართველოს კანონით დადგენილი დოკუმენტაციის წარმოდგენის სისრულისა და შესაბამისობის შემოწმებას;

ზ) საკრებულოს საჯარო მოსამსახურეთა სამუშაოზე მიღების, სამსახურებრივი  გადაყვანის, მობილობის, გათავისუფლების, უფლებამოსილებათა შეჩერების, შვებულებაში გასვლისა და მივლინების დოკუმენტურ გაფორმებას;

თ) საკრებულოში შრომითი ხელშეკრულებით დასაქმებულთა შრომითი ხელშეკრულებების მომზადებას; აღრიცხვასა და კონტროლს ხელშეკრულებით გათვალისწინებული პირობების დაცვაზე;

ი) საკრებულოს პოლიტიკური თანამდებობის პირებისა და საჯარო მოსამსახურეთა შვებულებაში გასვლის გრაფიკის შედგენას;

კ) საკრებულოს პროფესიულ საჯარო მოხელეებზე კლასის მინიჭებისა და კანონით დადგენილი დანამატების განსაზღვრის საკითხების მომზადებას;

ლ) საკრებულოს საჯარო მოსამსახურეთა მიერ „საჯარო სამსახურის შესახებ“ საქართველოს კანონით დადგენილი შეზღუდვების დაცვის კონტროლს; საჯარო მოსამსახურეთა მიერ შეთავსებით სხვა სამუშაოს შესრულებასთან დაკავშირებით შესაძლო ინტერესთა კონფლიქტის საკითხების შესწავლას;

მ) კონტროლს საკრებულოს თანამდებობის პირთა მიერ კანონით დადგენილი დეკლარაციების წარდგენაზე;

ნ) საკრებულოს საჯარო მოსამსახურეთა სამსახურებრივი მოწმობების გაფორმებასა და აღრიცხვას;

ო) საკონკურსო კომისიისათვის კონკურსის ჩატარებისათვის საჭირო დოკუმენტაციის მომზადებას;

პ) წინადადებების შემუშავებას მუნიციპალიტეტის ბიუჯეტის პროექტში საკრებულოს პროფესიულ საჯარო მოხელეთა სწავლებისა და კვალიფიკაციის ამაღლების ხარჯებთან დაკავშირებით;

ჟ) ადამიანური რესურსების მართვის ავტომატიზებულ სისტემაში ( eHRMS) მუშაობასა და სათანადო მონაცემების შეტანას“.“

გ) მე-5 პუნქტი ჩამოყალიდეს შემდეგი რედაქციით:

„5. პირველი კატეგორიის უფროსი სპეციალისტი საქმისწარმოების კუთხით უზრუნველყოფს:

ა) შემოსული და ადგილზე შექმნილი დოკუმენტების აღრიცხვას;

ბ) შემოსული კორესპონდენციის რეგისტრაციასა და ინდექსაციას დოკუმენტბრუნვის მართვის საინფორმაციო სისტემაში (eDocument);

 გ) დოკუმენტების გადაცემას შემსრულებლისათვის;

დ) დავალებების სათანადოდ გაფორმებას;

ე) დოკუმენტების შესრულების კონტროლს და შესრულების მიმდინარეობის შესახებ ინფორმაციის მომზადებას;

ვ) გასული დოკუმენტების გაგზავნას;

ზ) საქმეთა მომზადებას არქივისათვის ჩასაბარებლად;

თ) საქმეთა ნომენკლატურის შედგენას;

ი) ადმინისტრაციული წარმოების წესებისა და პროცედურების დაცვას;

კ) საქმისწარმოებაში  შტამპების, ბლანკების სათანადო გამოყენებას;

ლ) საკრებულოს საჯარო მოსამსახურეთათვის საქმისწარმოების წესის გაცნობას და კონტროლს მათ დაცვაზე;

მ) უზრუნველყოფს საარქივო დოკუმენტაციის შენახვასა და დაცვას;

დ) მე-7 პუნქტი ჩამოყალიბდეს შემდეგი რედაქციით:

„7. პირველი კატეგორიის სპეციალისტი საზოგადოებასთან ურთიერთობის საკითხებში უზრუნველყოფს:

ა) საკრებულოს საქმიანობის ამსახველი საინფორმაციო მასალების მომზადებას;

ბ) უზრუნველყოფს საჯარო ინფორმაციის პროაქტიული წესით გამოქვეყნებას, მოსახლეობისათვის საჯარო ინფორმაციის ხელმისაწვდომობას;

გ) საკრებულოს პოლიტიკური თანამდებობის პირებისა და საკრებულოს წევრების საზოგადოებასთან ურთიერთობის ღონისძიებების ორგანიზებას;

დ) უზრუნველყოფს საკრებულოს საქმიანობის გაშუქებას;

ე) საკრებულოსათვის, საკრებულოს პოლიტიკური თანამდებობის პირებისა და საკრებულოს წევრებისათვის საჭირო ინფორმაციის მოძიებასა და სელექციას;

ვ) მუნიციპალიტეტის საკრებულოს მიერ  დაგეგმილი ღონისძიებების თაობაზე ინფორმაციების გავრცელებასა და აქტივობების შესახებ პრესრელიზების მომზადებას;

ზ) საინფორმაციო საშუალებებში გასავრცელებლად ტექსტური  და საკრებულოს თავმჯდომარის საჯარო გამოსვლებისათვის მასალების  მომზადებას;

თ) მუნიციპალიტეტის ოფიციალური ღონისძიებების დაგეგმვაში მონაწილეობასა და საორგანიზაციო საკითხების მოწესრიგების ხელშეწყობას;

ი) მოქმედი კანონმდებლობით, საკრებულოს რეგლამენტითა და საკრებულოს აპარატის დებულებით განსაზღვრული სხვა უფლებამოსილებების განხორციელებას“.“