„საქართველოს საგარეო საქმეთა სამინისტროს დებულების შესახებ“ საქართველოს პრეზიდენტის 1998 წლის 3 მარტის №122 ბრძანებულებაში ცვლილებების შეტანის თაობაზე

საქართველოს პრეზიდენტის

ბრძანებულება №616

1999 წლის 10 ნოემბერი

ქ. თბილისი

„საქართველოს საგარეო საქმეთა სამინისტროს დებულების შესახებ“ საქართველოს პრეზიდენტის 1998 წლის 3 მარტის №122 ბრძანებულებაში ცვლილებების შეტანის თაობაზე

„დიპლომატიური სამსახურის შესახებ“ საქართველოს კანონის მე-13 მუხლის გ) ქვეპუნქტის შესაბამისად „საქართველოს საგარეო საქმეთა სამინისტროს დებულების შესახებ“ საქართველოს პრე­ზიდენტის 1998 წლის 3 მარტის №122 ბრძანებულებაში შეტანილ იქნეს შემდეგი ცვლილებები და დამატებები:

1. III თავის მე-8 მუხლის ა) ქვეპუნქტს დაემატოს (დეპარტამენტების ჩამონათვალის შემდეგ): საქართველოს საგარეო საქმეთა სამინისტროს საგანგებო დავალებათა ელჩების ჯგუფი.

2. III თავს დაემატოს შემდეგი შინაარსის 30-ე მუხლი:

    „მუხლი 30. საქართველოს საგარეო საქმეთა სამინისტროს საგან­გებო დავალებათა ელჩი.

1. საგარეო საქმეთა სამინისტროს საგანგებო დავალებათა ელჩი (შემდგომში _ საგანგებო დავალებათა  ელჩი) შედის საგანგებო დავალებათა ელჩების ჯგუფში, მოქმედებს საგარეო საქმეთა მინისტრის სპეციალური დავალებების შესაბამისად და თავისი სამსახურებრივი საქმიანობის განხორციელებისას წარმოადგენს სამინისტროს.

2.  საგანგებო დავალებათა ელჩის ამოცანებია:

ა) საგარეო საქმეთა მინისტრის კონკრეტული მითითებებისა და დავალებების შესრულება;

ბ) საგარეო საქმეთა მინისტრის დავალებით საქართველოს საგარეო პოლიტიკის ცალკეული მიმართულების ხელმძღვანელობა _ კოორდინაცია;

გ) საგარეო საქმეთა მინისტრის დავალებით საქართველოში აკრედიტებულ დიპლომატიურ კორპუსთან ურთიერთობა;

დ) სამსახურებრივი საქმიანობით მოპოვებული სპეციალური ინფორმაციის მიწოდება საგარეო საქმეთა მინისტრისთვის;

ე) საგარეო საქმეთა მინისტრის დავალებით სამინისტროს წარმოდგენა და საერთაშორისო ურთიერთობებში (ორმხრივი და მრავალმხრივი მოლაპარაკება, საერთაშორისო კონფერენცია, კონგრესი);

ვ) საგარეო საქმეთა მინისტრის დავალებით მონაწილეობის მიღება საქართველოში საზღვარგარეთის სახელმწიფო და სამთავ­რობო დონის დელეგაციებისთვის გათვალისწინებულ ცალკეულ ღონის­ძიებებში;

ზ) საზღვარგარეთ საგარეო საქმეთა მინისტრის ვიზიტის პროგრამის რეალიზაციის დროს მონაწილეობის მიღება განსახილველი დოკუმენტების პროექტების (ან მათი კერძო დებულებების) შემუშა­ვებასა და დახვეწაში;

თ) საგარეო საქმეთა მინისტრის დავალებით და თავისი უფლებამოსილების ფარგლებში სამინისტროს ქვედანაყოფების მიერ განხორციელებული კონკრეტული საქმიანობის კონტროლი;

ი) დიპლომატიური სამსახურის საქმიანობის ეფექტიანობის ზრდის უზრუნველსაყოფად წინადადებებისა და მოსაზრებების შემუშავება და საგარეო საქმეთა მინისტრისათვის განსახილველად წარდგენა;

კ)  მინისტრის სახელზე შემოსული უცხო ქვეყნების, საქართველოს სამთავრობო უწყებების, საგარეო საქმეთა სამინისტროს სტრუქტურული ქვედანაყოფების მიერ წარმოდგენილი წინადადებების, დასკვნების, შეთანხმებების პროექტების, სხვა დოკუმენტების დამატებითი ანალიზი, ტექსტის, მათი კომპონენტების დაზუსტება-დახვეწა, შესაძლო შედეგების შეფასება“.

3.  III თავის 30-ე, 31-ე, 32-ე მუხლები დაინომროს შესაბამისად 31-ე 32-ე და 33-ე, მუხლებად, ხოლო IV თავის 33-ე და 34-ე მუხლები _ 34-ე  და  35-ე მუხლებად.

4. ბრძანებულება ძალაში შევიდეს მისი ოფიციალურ ბეჭდვით ორგანოში გამოქვეყნების დღიდან.

ე. შევარდნაძე