„საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციების დამტკიცების თაობაზე“ საქართველოს ფინანსთა მინისტრის 2019 წლის 29 აგვისტოს №257 ბრძანებაში ცვლილების შეტანის შესახებ

1. „საბაჟო ზედამხედველობის შესახებ“ ინსტრუქციის (დანართი №3) მე-2 მუხლს დაემატოს შემდეგი შინაარსის მე-7 პუნქტი:

„7. საბაჟო საწყობის ტერიტორიაზე გამავალ საერთო სარგებლობის სარკინიგზო ლიანდაგზე სარკინიგზო ტრანსპორტით გადაადგილებული საქონლის საბაჟო კონტროლი და აღრიცხვა ხორციელდება გამგზავნი საბაჟო ორგანოს/საბაჟო საწყობის მიერ გამოწერილი საქონლისა და სატრანსპორტო საშუალების აღრიცხვის მოწმობით/რკინიგზის ელექტრონული აღრიცხვის მოწმობით.“.

2. „საბაჟო ფორმალობების განხორციელებისას „ახალი კომპიუტერიზებული სატრანზიტო სისტემის (NCTS)“ გამოყენების შესაძლებლობის შესახებ“ ინსტრუქციის (დანართი №20) მე-6 მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. ტრანზიტის პროცედურის მფლობელს, რომელიც აკმაყოფილებს ამ ინსტრუქციის მე-7 მუხლის მე-2 პუნქტით განსაზღვრულ პირობებს, აქვს საქონელზე ან/და სატრანსპორტო საშუალებაზე საბაჟო ორგანოს მიერ გაცემული იდენტიფიკაციის საშუალებებით ნიშანდების უფლება.“;

ბ) მე-4 პუნქტი ჩამოყალიბდეს შემდეგი რედაქციით:

„4. ტრანზიტის პროცედურის მფლობელის მიერ საქონელზე ან/და სატრანსპორტო საშუალებაზე ნიშანდების განხორციელების შემთხვევაში, იგი ვალდებულია უზრუნველყოს შესაბამისი მონაცემების დაფიქსირება „სატრანზიტო სისტემაში (NCTS)“ რეგისტრირებულ ტრანზიტის დეკლარაციაში.“.