საქართველოს 2005 წლის სახელმწიფო ბიუჯეტის შესახებ საქართველოს კანონით განსაზღვრული სამედიცინო-სოციალური ექსპერტიზის პროგრამის დამტკიცების თაობაზე"

სახელმწიფო სარეგისტრაციო კოდი 470.230.000.22.035.007.115

საქართველოს შრომის, ჯანმრთელობისა და სოციალური დაცვის მინისტრის

 ბრძანება №65/ნ

2005 წლის 4 მარტი

ქ. თბილისი

,,საქართველოს 2005 წლის სახელმწიფო ბიუჯეტის შესახებ” საქართველოს კანონით განსაზღვრული სამედიცინო-სოციალური ექსპერტიზის პროგრამის დამტკიცების თაობაზე

,,საქართველოს 2005 წლის სახელმწიფო ბიუჯეტის შესახებ” საქართველოს კანონის 49-ე მუხლის მე-19 პუნქტის საფუძველზე, ამავე მუხლის მე-10 პუნქტის შესრულების მიზნით, ვბრძანებ:

1. დამტკიცდეს სამედიცინო-სოციალური ექსპერტიზის პროგრამა.

2. პროგრამის შესრულება განახორციელოს საქართველოს სოციალური დაზღვევის ერთიანმა სახელმწიფო ფონდმა.

3. კონტროლი ბრძანების შესრულებაზე დაევალოს მინისტრის მოადგილეს ნიკოლოზ ფრუიძეს.

4. ბრძანება ამოქმედდეს გამოქვეყნებისთანავე.

ლ. ჭიპაშვილი

სამედიცინო-სოციალური ექსპერტიზის პროგრამა

სამედიცინო-სოციალური ექსპერტიზა შეზღუდული შესაძლებლობის მქონე პირთა სოციალური დაცვის ერთ-ერთი მნიშვნელოვანი მიმართულებაა. მისი ძირითადი ამოცანაა ადამიანის სამედიცინო და სოციალური სტატუსის დარღვევის ხარისხის განსაზღვრა, მათი შენარჩუნების უნარის და კომპენსაციურ-ადაპტაციური შესაძლებლობების დადგენა, რომელთა რეალიზაცია ხელს შეუწყობს შეზღუდული შესაძლებლობის სტატუსის მქონე პირის სამედიცინო, სოციალურ, პროფესიულ და ფსიქოლოგიურ რეაბილიტაციას, შესაძლებლობას მისცემს მას დაძლიოს გარემო სივრცეში არსებული ბარიერები და სხვა მოქალაქეთა მსგავსად მონაწილეობა მიიღოს საზოგადოებრივ და საყოფაცხოვრებო საქმიანობაში.

,,სამედიცინო-სოციალური ექსპერტიზის შესახებ” საქართველოს კანონის და კანონქვემდებარე ნორმატიული აქტების სრულყოფილად გატარების, ქვეყნის მასშტაბით შესაძლებლობის შეზღუდვის სტატუსის მქონე პირთა აღრიცხვიანობის, სამედიცინო-სოციალური ექსპერტიზის ბიუროების საქმიანობის მონიტორინგის, შესაძლებლობის შეზღუდვის დინამიკის, სტრუქტურისა და მიზეზების სტატისტიკური დამუშავება – ანალიზის, სამედიცინო-სოციალური ექსპერტიზის ბიუროების ორგანიზაციულ-მეთოდური დახმარების განხორციელების მიზნით, შეიქმნა სამედიცინო-სოციალური ექსპერტიზის პროგრამა.

,,სამედიცინო-სოციალური ექსპერტიზის შესახებ” საქართველოს კანონის შესაბამისად, 2004 წლის 7 ივნისიდან სამედიცინო-სოციალური ექსპერტიზის განხორციელების ფუნქცია დაეკისრა საქართველოს სოციალური დაზღვევის ერთიან სახელმწიფო ფონდს. განხორციელდა სამედიცინო-სოციალური ექსპერტიზის სამსახურის ქსელისა და სტრუქტურის ოპტიმიზაცია, შეიქმნა ფონდის ცენტრალური, საქალაქო, რაიონული და სპეციალიზებული სამედიცინო-სოცალური ექსპერტიზის 85 ბიურო (აქედან – 5 ცენტრალური და 80 რაიონული, საქალაქო და სპეციალიზებული სამედიცინო-სოციალური ექსპერტიზის ბიურო), რომელთა ძირითად ამოცანას წარმოადგენს შესაძლებლობის შეზღუდვის სტატუსის, პირის გადამოწმების ვადის და მომდინარეობის დადგენა, შესაძლებლობის შეზღუდვის მიზეზობრივი კავშირის, პროფესიული შრომისუნარიანობის დაკარგვის ხარისხის (პროცენტულად) განსაზღვრა და სამედიცინო-სოციალური ექსპერტიზის სხვა საკითხების განხილვა-გადაწყვეტა.

I. სამედიცინო-სოციალური ექსპერტიზის პროგრამის მიზანი და ამოცანები

პროგრამის მიზანს წარმოადგენს სამედიცინო-სოციალური ექსპერტიზის სრულყოფილად წარმართვა.

პროგრამის ამოცანებია:

– საქართველოს მოქმედი კანონმდებლობის შესაბამისად, მოქალაქეთა შესაძლებლობის შეზღუდვის სტატუსის განსაზღვრისა და სამედიცინო-სოციალური ექსპერტიზის სხვა საკითხების განხილვა-გადაწყვეტის ორგანიზება და სრულყოფა;

– სამედიცინო-სოციალური ექსპერტიზის ბიუროების მიერ გამოტანილი საექსპერტო დასკვნების საფუძვლიანობის შესწავლა და ამ სფეროში კანონიერების განმტკიცება;

– სამედიცინო-სოციალური ექსპერტიზის ბიუროებისადმი ორგანიზაციულ-მეთოდური და პრაქტიკული დახმარების გაწევა;

– სტატისტიკურ მონაცემთა დამუშავება-გაანალიზება;

– სამედიცინო-სოციალური ექსპერტიზის სფეროში ერთიანი საინფორმაციო ბანკის შექმნა.

II. პროგრამით განსახორციელებელი ღონისძიებები

1. პროგრამის ფარგლებში განხორციელდება:

ა) ,,სამედიცინო-სოციალური ექსპერტიზის შესახებ” საქართველოს კანონის შესაბამისად სამედიცინო-სოციალური ექსპერტიზის ბიუროების ფუნქციონირება;

ბ) სამედიცინო-სოციალური ექსპერტიზის საკითხებზე საკანონმდებლო და სამართლებრივი აქტების შემუშავება;

გ) სამედიცინო-სოციალური ექსპერტიზის ბიუროებისადმი მეთოდურ-პრაქტიკული რეკომენდაციების მომზადება;

დ) სამედიცინო-სოციალური ექსპერტიზის ბიუროების მუშაკთა კვალიფიკაციის ამაღლება;

ე) სამედიცინო-სოციალური ექსპერტიზის ბიუროების საქმიანობის მონიტორინგი;

ვ) სამედიცინო-სოციალური ექსპერტიზის ბიუროების კომპიუტერული ტექნიკით აღჭურვა, ერთიანი კომპიუტერული ქსელის შექმნა, რომელიც უზრუნველყოფს შესაძლებლობის შეზღუდვის მახასიათებლების და ბიუროების საქმიანობის ძირითადი მაჩვენებლების სტატისტიკურ დამუშავებას;

ზ) შეზღუდული შესაძლებლობის სტატუსის მქონე პირთა ერთიანი საინფორმაციო ბანკის შექმნა;

თ) სამედიცინო-სოციალური ექსპერტიზის ბიუროებისათვის მეთოდური რეკომენდაციებისა და მითითებების შემუშავება – სამედიცინო-სოციალური ექსპერტიზის სხვადასხვა საკითხებზე, მათ შორის დაავადებათა ნოზოლოგიური ერთეულების მიხედვით;

ი) სამედიცინო-სოციალური ექსპერტიზის საარქივო მასალების დამუშავება.

III. პროგრამის ბიუჯეტი

,,საქართველოს 2005 წლის სახელმწიფო ბიუჯეტის შესახებ” საქართველოს კანონის შესაბამისად სამედიცინო-სოციალური ექსპერტიზის პროგრამის ბიუჯეტი განისაზღვრა 1500000 ლარის ოდენობით.

IV. მოსალოდნელი შედეგები

პროგრამის განხორციელების შედეგად:

ა) ამაღლდება სამედიცინო-სოციალური ექსპერტიზის დონე და გაუმჯობესდება მოსახლეობის საქსპერტო მომსახურება;

ბ) უზრუნველყოფილ იქნება საექსპერტო დასკვნების საფუძვლიანობა;

გ) შეიქმნება შეზღუდული შესაძლებლობის სტატუსის მქონე პირთა საინფორმაციო ბანკი.