საქართველოს სსრ უმაღლესი საბჭოს პრეზიდიუმის ბრძანებულება საქართველოს სსრ სისხლის სამართლის და სისხლის სამართლის საპროცესო კოდექსებში დამატებებისა და ცვლილებების შეტანის შესახებ

საქართველოს სსრ უმაღლესი საბჭოს პრეზიდიუმის ბრძანებულება

საქართველოს სსრ სისხლის სამართლის და სისხლის სამართლის საპროცესო კოდექსებში დამატებებისა და ცვლილებების შეტანის შესახებ

„რადიოაქტიური მასალების მიმართ უკანონო მოქმედებისათვის სისხლის სამართლის პასუხისმგებლობის შესახებ“ სსრ კავშირის უმაღლესი საბჭოს პრეზიდიუმის 1988 წლის 3 მარტის ბრძანებულების შესაბამისად საქართველოს სსრ უმაღლესი საბჭოს პრეზიდიუმის ადგენს:

I. შეტანილ იქნეს საქართველოს სსრ 1960 წლის 30 დეკემბრის კანონით დამტკიცებულ საქართველოს სსრ სისხლის სამართლის კოდექსში (საქართველოს სსრ უმაღლესი საბჭოს უწყებები, 1961 წ., № 1, მუხ. 10; 1987 წ., № 9, მუხ. 217) შემდეგი დამატებები და ცვლილებები:

1. დაემატოს კოდექსს შემდეგი შინაარსის 251², 251³, 251⁴ და 251⁵ მუხლები:

„მუხლი 251². რადიოაქტიური მასალების უკანონო შეძენა, შენახვა, გამოყენება, გადაცემა და დაშლა

რადიოაქტიური მასალების (მაიონიზებელი გამოსხივების წყაროების, ნებისმიერ ფიზიკურ მდგომარეობაში დანადგარსა და ნაკეთობაში ან სხვა სახით არსებული რადიოაქტიური ნივთიერებების ან ბირთვული მასალების) უკანონო შეძენა, შენახვა, გამოყენება, გადაცემა ან დაშლა-

ისჯება თავისუფლების აღკვეთით ვადით ხუთ წლამდე.

იგივე მოქმედება, თუ მას მოჰყვა ადამიანების დაღუპვა ან სხვა მძიმე შედეგი, –

ისჯება თავისუფლების აღკვეთით ვადით ათ წლამდე.

მუხლი 251³. რადიოაქტიური მასალების გატაცება

რადიოაქტიური მასალების გატაცება –

ისჯება თავისუფლების აღკვეთით ვადით სამიდან ათ წლამდე, ქონების კონფისკაციით ან უამისოდ.

მუხლი 251⁴. რადიოაქტიური მასალების გატაცების ან გამოყენების მუქარა

რადიოაქტიური მასალების გატაცების ჩადენის მუქარა იმ მიზნით, რომ აიძულონ სახელმწიფო. საზოგადოებრივი ორგანიზაცია, ფიზიკური ან იურიდიული პირი შეასრულოს რაიმე მოქმედება ან თავი შეიკავოს მისგან, თუ არსებობდა ამ მუქარის განხორცილების საფრთხე, –

ისჯება თავისუფლების აღკვეთით ვადით სამ წლამდე.

ადამიანების დაღუპვის ან სხვა მძიმე შედეგის გამოწვევის მიზნით რადიოაქტიური მასალების გამოყენების მუქარა, თუ არსებობდა ამ მუქარის განხორცილების საფრთხე, –

ისჯება თავისუფლების აღკვეთით ვადით ხუთ წლამდე.

მუხლი 251⁵. რადიოაქტიური მასალების შენახვის, გამოყენების, აღრიცხვის, გადაზიდვის წესების ან მათთან მოპყრობის სხვა წესების დარღვევა

რადიოაქტიური მასალების შენახვის, გამოყენების, აღრიცხვის, გადაზიდვის წესების ან მათთან მოპყრობის სხვა წესების დარღვევა, თუ ამ მოქმედებას შეიძლება მოჰყოლოდა ადამიანების დაღუპვა ან სხვა მძიმე შედეგი, –

ისჯება თავისუფლების აღკვეთით ვადით სამ წლამდე ან გამასწორებელი სამუშაოებით ვადით ორ წლამდე, ან ჯარიმით სამას მანეთამდე.

იგივე მოქმედება, თუ მას მოჰყვა ადამიანების დაღუპვა ან სხვა მძიმე შედეგი, –

ისჯება თავისუფლების აღკვეთით ვადით ათ წლამდე“.

2. 8¹ მუხლის მეორე ნაწილს სიტყვების „(242² მუხლი)“ შემდეგ დაემატოს სიტყვები „რადიოაქტიური მასალების გატაცება (251³ მუხლი)“.

3. 44-ე მუხლის პირველი ნაწილის პირველ და მეორე პუნქტებს სიტყვების „(242² მუხლი)“ შემდეგ დაემატოს სიტყვები „რადიოაქტიური მასალების გატაცებისათვის (251³ მუხლი)“;

4. 54-ე მუხლის მეექვსე ნაწილს სიტყვების „(189-ე მუხლის მეორე და მესამე ნაწილები, 189¹ და 190-ე მუხლების მეორე ნაწილები)“ შემდეგ დაემატოს სიტყვები „რადიოაქტიური მასალების გატაცებისათვის (251³ მუხლი)“.

5. 55-ე მუხლის მეექვსე ნაწილის მე-2 პუნქტს სიტყვების „(242² მუხლი)“ შემდეგ დაემატოს სიტყვები „რადიოაქტიური მასალების გატაცებისათვის (251³ მუხლი)“.

6. 248-ე მუხლის სათაურიდან და პირველი ნაწილიდან ამოღებულ იქნეს სიტყვები „ან რადიოაქტიურ“.

7. 205-ე მუხლის მეორე ნაწილში ციფრები „133¹ და 242²“ შეიცვალოს ციფრებით „133¹, 242², 251², 252³“.

8. 206-ე მუხლს სიტყვების „(საჰაერო ხომალდის გატაცება)“ შემდეგ დაემატოს სიტყვები „251² (რადიოაქტიური მასალების უკანონო შეძენა, შენახვა, გამოყენება, გადაცემა ან დაშლა), 251³ (რადიოაქტიური მასალების გატაცება)“.

II. დაწესდეს, რომ საქართველოს სსრ სისხლის სამართლის კოდექსის 251², 251³, 251⁴ და 251⁵ მუხლებით გათვალისწინებულ დანიშნულთა საქმეების გამოძიებას აწარმოებენ შინაგან საქმეთა ორგანოების გამომძიებლები.

ამასთან დაკავშირებით საქართველოს სსრ 1960 წლის 30 დეკემბრის კანონით დამტკიცებულ საქართველოს სსრ სისხლის სამართლის საპროცესო კოდექსის (საქართველოს სსრ უმაღლესი საბჭოს უწყებები, 1961 წ., № 1, მუხ. 11; 1987 წ., №16, მუხ. 250) 126-ე მუხლის მეოთხე ნაწილს სიტყვების „250¹ მუხლის მეორე ნაწილით“ შემდეგ დაემატოს ციფრები „251², 251³, 251⁴, 251⁵“.

საქართველოს სსრ უმაღლესი საბჭოს პრეზიდიუმის თავმჯდომარე             პ. გილაშვილი.

საქართველოს სსრ უმაღლესი საბჭოს პრეზიდიუმის მდივანი                      ვ. კვარაცხელია.

თბილისი. 1988 წლის 22 მარტი.

№ 1645 – XI