„უმაღლესი განათლების დამადასტურებელი სახელმწიფო დოკუმენტის – დიპლომის ფორმის დამტკიცების შესახებ“ საქართველოს განათლებისა და მეცნიერების მინისტრის 2011 წლის 22 ივლისის №126/ნ ბრძანებაში ცვლილების შეტანის თაობაზე

1. პირველი მუხლის მე-4 პუნქტი ჩამოყალიბდეს შემდეგი რედაქციით:

„4. დიპლომის გაცემაზე უფლებამოსილია საქართველოს საპატრიარქო „უმაღლესი განათლების შესახებ“  საქართველოს კანონის 89⁵ მუხლის შესაბამისად.”.

2. მე-2 მუხლის 6² პუნქტის შემდეგ დაემატოს 6³ პუნქტი შემდეგი რედაქციით:

 ,,6³. დაწესებულებების მიერ ერთობლივი საგანმანათლებლო პროგრამის განხორციელების შედეგად უმაღლესი განათლების დამადასტურებელი დოკუმენტების დამოუკიდებლად გაცემის შემთხვევაში, ამ მუხლის მე-5 პუნქტით განსაზღვრული მონაცემების გარდა, თითოეულ დიპლომში დამატებით მიეთითება პროგრამის ერთობლივად განხორციელების შესახებ ინფორმაცია (პროგრამის სახელწოდების მითითების გარეშე) და პროგრამის განმახორციელებელი ყველა დაწესებულების სრული სახელწოდება (ორგანიზაციულ-სამართლებრივი ფორმის მითითებით).“.

3. მე-4 მუხლი ჩამოყალიბდეს შემდგომი რედაქციით:

„მუხლი 4. დიპლომის ფორმის, გაცემული დიპლომისა და დუბლიკატის შესახებ ინფორმაციის ხელმისაწვდომობა

1. დაწესებულება/ცენტრი ვალდებულია დიპლომის დამტკიცებული ფორმა ატვირთოს უმაღლესი განათლების მართვის საინფორმაციო სისტემაში (შემდგომ – მართვის სისტემა). დაწესებულება ვალდებულია დიპლომის დამტკიცებული ფორმის ერთი ეგზემპლარი წარადგინოს ცენტრში.

2. დაწესებულება/ცენტრი ვალდებულია დიპლომის/დუბლიკატის შევსებიდან 10 დღის ვადაში მართვის სისტემაში ატვირთოს დიპლომის/დუბლიკატის ელექტრონული ასლი, აგრეთვე ასახოს შემდეგი მონაცემები: დიპლომის/დუბლიკატისათვის საქართველოს ეკონომიკისა და მდგრადი განვითარების სამინისტროს სისტემაში შემავალი საჯარო სამართლის იურიდიული პირის – სახელმწიფო ქონების ეროვნული სააგენტოს მიერ მინიჭებული რეგისტრაციის ნომერი, სერია, ინდივიდუალური ნომერი. დაწესებულება/ცენტრი ვალდებულია, აგრეთვე, აღნიშნულ ინფორმაციაში ცვლილების შეტანისას მართვის სისტემაში ასახოს შესაბამისი ცვლილება.“.