„კრიტიკული ინფორმაციული სისტემის სუბიექტის ინფორმაციული უსაფრთხოების აუდიტის ან/და ინფორმაციულ სისტემაში შეღწევადობის (პენეტრაციის) ტესტის ჩატარების უფლებამოსილების მქონე ორგანიზაციათა მიერ ავტორიზაციის გავლის წესისა და ავტორიზაციის პროცედურების დადგენის შესახებ“ ციფრული მმართველობის სააგენტოს თავმჯდომარის 2021 წლის 14 დეკემბრის №8 ბრძანებაში ცვლილების შეტანის თაობაზე

1. მე-11 მუხლის მე-2 პუნქტი ჩამოყალიბდეს შემდეგი რედაქციით:

„2. ციფრული მმართველობის სააგენტო ინფორმაციის მიღებიდან 10 დღის ვადაში უზრუნველყოფს ამ წესის მე-6 მუხლის მე-2 პუნქტის შესაბამისად წარმოდგენილი განცხადებისა და სხვა დოკუმენტაციის განხილვას ამ წესის მე-8 მუხლით განსაზღვრული წესით.“

2. მე-16 მუხლი ჩამოყალიბდეს შემდეგი რედაქციით:

„მუხლი 16. ავტორიზებული ორგანიზაციების აღრიცხვა

1. სააგენტო აღრიცხავს ავტორიზებული ორგანიზაციებისა და აუდიტორების/ტესტის განმახორციელებელი პირების სიას ამ წესის დანართი №3-ით და დანართი №4-ით დადგენილი ფორმით, რომლებიც შეიცავს შემდეგ ინფორმაციას:

ა) ავტორიზებული ორგანიზაციის დასახელებასა და საიდენტიფიკაციო ნომერს;

ბ) ავტორიზებული ორგანიზაციის საკონტაქტო ინფორმაციას;

გ) ავტორიზებულ ორგანიზაციაში დასაქმებული ავტორიზებული აუდიტორის/ტესტის განმახორციელებელი პირის სახელს, გვარს და პირად ნომერს/სხვა მაიდენტიფიცირებელ ნომერს (ასეთის არსებობის შემთხვევაში);

დ) ავტორიზაციის თარიღსა და მოქმედების ვადას;

ე) აუდიტორის/ტესტის განმახორციელებელი პირის კვალიფიკაციის დამადასტურებელი დოკუმენტის მოქმედების ვადას (ასეთის არსებობის შემთხვევაში).

2. სააგენტო კრიტიკული ინფორმაციული სისტემის სუბიექტებისთვის ხელმისაწვდომს ხდის ინფორმაციას მის მიერ ავტორიზებული ორგანიზაციებისა და აუდიტორების/ტესტის განმახორციელებელი პირების შესახებ.

3. ამ წესის მე-11 მუხლით გათვალისწინებულ შემთხვევაში, სააგენტო უზრუნველყოფს ორგანიზაციების ავტორიზაციას კომერციულ ბანკებში ინფორმაციული უსაფრთხოების აუდიტის ან/და პენეტრაციის ტესტის ჩატარებისთვის ავტორიზებული ორგანიზაციების დამატებით სიაში (დანართი №4) რეგისტრაციით. ამ გზით ავტორიზებული ორგანიზაციების შესახებ ინფორმაცია მიეწოდება ეროვნულ ბანკს ან/და მესამე კატეგორიის კრიტიკული ინფორმაციული სისტემის სუბიექტ კომერციულ ბანკებს.“

3. ამ წესის დანართი №2 დამტკიცდეს თანდართული ფორმით.