„მომხმარებლის ძლიერი ავთენტიფიკაციის წესის დამტკიცების შესახებ“ საქართველოს ეროვნული ბანკის პრეზიდენტის 2020 წლის 2 სექტემბრის №156/04 ბრძანებაში ცვლილების შეტანის თაობაზე

„საქართველოს ეროვნული ბანკის შესახებ“ საქართველოს ორგანული კანონის მე-15 მუხლის პირველი პუნქტის „ზ“ ქვეპუნქტის და „ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის საფუძველზე, ვბრძანებ:

„მომხმარებლის ძლიერი ავთენტიფიკაციის წესის დამტკიცების შესახებ“ საქართველოს ეროვნული ბანკის პრეზიდენტის 2020 წლის 2 სექტემბრის №156/04 ბრძანებით (www.matsne.gov.ge; 03/09/2020; ს/კ: 220090000.18.011.016495) დამტკიცებული წესის:

1. მე-19 მუხლი ჩამოყალიბდეს შემდეგი რედაქციით:

„მუხლი 19. იურიდიული პირების მიერ გამოყენებული უსაფრთხო პროცესები და პროტოკოლი

საგადახდო მომსახურების პროვაიდერი უფლებამოსილია, არ გამოიყენოს მომხმარებლის ძლიერი ავთენტიფიკაცია იურიდიული პირის მიმართ, რომელიც ახორციელებს ელექტრონული გადახდის ოპერაციის ინიციირებას ისეთი გადახდების სპეციალური პროცესების ან პროტოკოლის საშუალებით, რომლებიც უზრუნველყოფს სულ მცირე ამ წესით მოთხოვნილ უსაფრთხოების ხარისხს.“.

2. 30-ე მუხლი ჩამოყალიბდეს შემდეგი რედაქციით :

„მუხლი 30. საგადახდო მომსახურების პროვაიდერის პასუხისმგებლობა

1. თუ გადამხდელის საგადახდო მომსახურების პროვაიდერს დანერგილი აქვს მომხმარებლის ძლიერი ავთენტიფიკაციის მექანიზმი და მისი მოთხოვნის შემთხვევაში მიმღების საგადახდო მომსახურების პროვაიდერი ვერ უზრუნველყოფს გადახდის ოპერაციის შესრულებისას მომხმარებლის ძლიერი ავთენტიფიკაციის მხარდაჭერას, ის ვალდებულია, გადამხდელის საგადახდო მომსახურების პროვაიდერს აუნაზღაუროს ფინანსური ზიანი არაუმეტეს გადამხდელისთვის ანაზღაურებული ოპერაციის თანხისა. თუ ძლიერი ავთენტიფიკაციის მხარდაჭერა არ განხორციელდა მხოლოდ მიმღების მიზეზით, პასუხისმგებლობა რეგულირდება მიმღებსა და მიმღების პროვაიდერს შორის გაფორმებული ხელშეკრულების საფუძველზე.

2. თუ ამ წესის მე-19 მუხლით განსაზღვრული იურიდიული პირი საგადახდო მომსახურების პროვაიდერია და გადახდების სპეციალური პროცესი/პროტოკოლი გამოიყენება მის მიერ საგადახდო მომსახურების განხორციელების მიზნით ელექტრონული გადახდის ოპერაციის შესრულებისთვის, ასეთ შემთხვევაში საგადახდო მომსახურების პროვაიდერებს შორის პასუხისმგებლობა და მოვალეობები რეგულირდება მათ შორის გაფორმებული ხელშეკრულებით. ამასთან, ხელშეკრულებით დაუშვებელია, გადახდების სპეციალური პროცესის/პროტოკოლის ხარვეზებით მუშაობის ან/და მისი სისუსტეების მიზეზით განხორციელებული არაავტორიზებული, არასწორად ან დაგვიანებით შესრულებული, ასევე შეუსრულებელი ოპერაციებისათვის პასუხისმგებლობა დაეკისროს ამ წესის მე-19 მუხლით განსაზღვრულ იურიდიულ პირს, რომელიც საგადახდო მომსახურების პროვაიდერია.“.