“საქართველოს აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის ქალაქისა და რაიონის მთავარი სახელმწიფო სანიტარული ექიმის (მოადგილის) სტატუსის მინიჭება-ჩამორთმევის წესის შესახებ”

სახელმწიფო სარეგისტრაციო კოდი 470.010.000.11.119.006.522

საქართველოს შრომის, ჯანმრთელობისა და სოციალური დაცვის მინისტრის

ბრძანება №131/ნ

2004 წლის 14 ივნისი

ქ. თბილისი

საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევის წესის შესახებ

„ საქართველოს სანიტარიული კოდექსის” (სსმ III, №14, 2003 წ., მუხ. 91) მე-14 მუხლის მე-4 და მე-5 პუნქტებისა და 44-ე მუხლის პირველი პუნქტის „ ბ.მ” ქვეპუნქტის შესაბამისად, ვბრძანებ:

1. დამტკიცდეს საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევის თანდართული წესი.

2. ძალადაკარგულად ჩაითვალოს „ საქართველოს, საქართველოს საზღვრის გამტარ პუნქტებზე, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევის წესის დამტკიცების შესახებ” საქართველოს შრომის, ჯანმრთელობისა და სოციალური დაცვის მინისტრის 2003 წლის 31 ოქტომბრის №268/ნ ბრძანება (სსმ III, №129, 12.11.2003w., მუხ. 1076).

2. ბრძანება ძალაშია გამოქვეყნებისთანავე.

ლ. ჭიპაშვილი

დანართი

საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევის წესი

1. ეს წესი შემუშავებულია საქართველოს სანიტარიული კოდექსის საფუძველზე და, შესაბამისად, იგი არეგულირებს საქართველოს შრომის, ჯანმრთელობისა და სოციალური დაცვის მინისტრის მიერ საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევის წესსა და პირობებს.

2. საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსს ანიჭებს საქართველოს შრომის, ჯანმრთელობისა და სოციალური დაცვის მინისტრი (შემდგომში – მინისტრი) ადმინისტრაციული აქტით.

3. მთავარი სახელმწიფო სანიტარიული ექიმია (მოადგილეა):

ა) საქართველოს მთავარი სახელმწიფო სანიტარიული ექიმი (მოადგილე);

ბ) აფხაზეთისა და აჭარის ავტონომიური რესპუბლიკების მთავარი სახელმწიფო სანიტარიული ექიმი (მოადგილე);

გ) ქალაქის (რაიონის) მთავარი სახელმწიფო სანიტარიული ექიმი (მოადგილე);

დ) ადმინისტრაციული ტერიტორიის მთავარი სახელმწიფო სანიტარიული ექიმი (მოადგილე).

4. აფხაზეთისა და აჭარის ავტონომიური რესპუბლიკების, ადმინისტრაციული ტერიტორიების, ქალაქისა და რაიონის მთავარი სახელმწიფო სანიტარიული ექიმის (მოადგილის) სტატუსის მინიჭება-ჩამორთმევა ხორციელდება მინისტრის ბრძანებით საქართველოს მთავარი სახელმწიფო სანიტარიული ექიმის წარდგინებით.

5. საქართველოს, აფხაზეთისა და აჭარის ავტონომიური რესპუბლიკების, ქ. თბილისის მთავარ სახელმწიფო სანიტარიულ ექიმებს ჰყავთ ერთი მოადგილე.

6. ქალაქისა და რაიონის მთავარ სახელმწიფო სანიტარიულ ექიმს შესაძლებელია ჰყავდეს ერთი მოადგილე, თუ ქალაქის ან (რაიონის) მოსახლეობის რაოდენობა აღემატება 50000-ს.

7. საჭიროების შემთხვევაში მინისტრი ადმინისტრაციული აქტით, ქალაქის ან რაიონის სახელმწიფო სანიტარიული ზედამხედველობის ინსპექციის უფროსს (მოადგილეს) ანიჭებს ადმინისტრაციული ტერიტორიის მთავარი სახელმწიფო სანიტარიული ექიმის (მოადგილის) სტატუსს.

8. საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიულ ექიმები (მოადგილეები) მოქმედებენ „ საქართველოს სანიტარიული კოდექსით”, ,,საქართველოს ადმინისტრაციულ სამართალდარღვევათა კოდექსითა” და საქართველოს შრომის, ჯანმრთელობისა და სოციალური დაცვის მინისტრის ნორმატიული აქტით დადგენილი წესითა და ფარგლებში.

9. საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარ სახელმწიფო სანიტარიულ ექიმს (მოადგილეს) აქვს სამსახურებრივი დანიშნულების პირადი ბეჭედი და ბლანკი შესაბამისი რეკვიზიტებით.

10. საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარი სახელმწიფო სანიტარიული ექიმი (მოადგილე) საკუთარი ბეჭდისა და ბლანკის გამოყენებას ახორციელებს საქართველოს კანონმდებლობით დადგენილი კომპეტენციის ფარგლებში.

11. საქართველოს, აფხაზეთისა და აჭარის ავტონომიური რესპუბლიკების, ადმინისტრაციული ტერიტორიის, ქალაქისა და რაიონის მთავარ სახელმწიფო სანიტარიულ ექიმს (მოადგილეს) მინისტრის ადმინისტრაციული აქტით სტატუსი შეიძლება ჩამოერთვას:

ა) თუ მის მიმართ კანონიერ ძალაში შევიდა სასამართლოს გამამტყუნებელი განაჩენი;

ბ) თუ სასამართლომ ცნო ქმედუუნაროდ, უგზო-უკვლოდ დაკარგულად ან გარდაცვლილად;

გ) გარდაცვალების შემთხვევაში;

დ) მის მიერ კანონით გათვალისწინებული მოვალეობის შეუსრულებლობის ან არაჯეროვნად შესრულების შემთხვევაში;

ე) პირადი განცხადების საფუძველზე.