ბრძანებულება საქართველოს სსრ უმაღლესი საბჭოს პრეზიდიუმისა საქართველოს სსრ სისხლის სამართლის და სისხლის სამართლის საპროცესო კოდექსებში დამატებების და ცვლილებების შეტანის შესახებ

1. შეტანილ იქნეს საქართველოს სსრ სისხლის სამართლის კოდექსში შემდეგი დამატებანი და ცვლილებანი:

ა) დაემატოს კოდექსს 242² მუხლი შემდეგი შინაარსისა:

„მუხლი 242². საჰაერო ხომალდის გატაცება

დედამიწაზე ან ფრენის დროს საჰაერო ხომალდის გატაცება, –

ისჯება თავისუფლების აღკვეთით ვადით სამიდან ათ წლამდე.

დედამიწაზე ან ფრენის დროს საჰაერო ხომალდის გატაცება, ან ასეთი ხომალდის ხელში ჩაგდება გატაცების მიზნით, თუ გამოყენებულია ძალადობა ან მუქარა, ანდა რასაც მოჰყვა საჰაერო ხომალდის ავარია ან სხვა მძიმე შემდეგი, –

ისჯება თავისუფლების აღკვეთით ვადით ხუთიდან თხუთმეტ წლამდე, ქონების კონფისკაციით ან უამისოდ.

ამ მუხლის პირველი და მეორე ნაწილებით გათვალისწინებული ქმედობანი, თუ მათ მოჰყვა ადამინების დაღუპვა ან სხეულის მძიმე დაზიანება, –

ისჯება თავისუფლების აღკვეთით ვადით რვიდან თხუთმეტ წლამდე, ქონების კონფისკაციით, ან ისჯება სიკვდილით, ქონების კონფისკაციით“;

ბ) კოდექსის 8¹ მუხლის მეორე ნაწილს სიტყვების: „ცეცხლსასროლი იარაღის, საბრძოლო მასალის ან ფეთქებად ნივთიერებათა გატაცება (მუხლი 240)“ შემდეგ დაემატოს სიტყვები: „საჰაერო ხომალდის გატაცება (მუხლი 242²)“;

გ) კოდექსის 34-ე მუხლის მესამე ნაწილი ჩამოყალიბდეს შემდეგი რედაქციით:

„ქონების კონფისკაცია შეიძლება დაინიშნოს მხოლოდ იმ შემთხვევებში, რომლებიც გათვალისწინებულია სსრ კავშირის კანონმდებლობით, ხოლო ანგარებითი დანაშაულისათვის აგრეთვე იმ შემთხვევებშიც, რომლებიც გათვალისწინებულია ამ კოდექსის განსაკუთრებული ნაწილით“;

დ) კოდექსის 44-ე მუხლის პირველი ნაწილის პირველ პუნქტს სიტყვების: „საზოგადოებრივი წესრიგის დამცველი მილიციის მუშაკის ან სახალხო რაზმელის სიცოცხლის ხელყოფისათვის (მუხლი 209¹)“ შემდეგ და პირველი ნაწილის მეორე პუნქტს სიტყვების: „ცეცხლსასროლი იარაღის, საბრძოლო მასალების ან ფეთქებად ნივთიერებათა გატაცებისათვის დამამძიმებელ გარემოებებში (240-ე მუხლის მეორე და მესამე ნაწილები)“ შემდეგ დაემატოს სიტყვები:

„საჰაერო ხომალდის გატაცებისათვის (მუხლი 242²)“;

ე) კოდექსის 54¹ მუხლის მესამე პუნქტს სიტყვების: „ყაჩაღური თავდასხმით ცეცხლსასროლი იარაღის, საბრძოლო მასალის ან ფეთქებად ნივთიერებათა გატაცებისათვის (240-ე მუხლის მესამე ნაწილი)“ შემდეგ დაემატოს სიტყვები“ საჰაერო ხომალდის გატაცებისათვის (მუხლი 242²)“;

ვ) კოდექსის 55-ე მუხლის მეექვსე ნაწილის მეორე პუნქტს სიტყვების: „ცეცხლსასროლი იარაღის, საბრძოლო მასალების ან ფეთქებადი ნივთიერებების გატაცებისათვის ყაჩაღური თავდასხმის გზით (240-ე მუხლის მესამე ნაწილი)“ შემდეგ დაემატოს სიტყვები: „საჰაერო ხომალდის გატაცებისათვის (მუხლი 242²);“;

ზ) კოდექსის 205¹ მუხლს პირველი ნაწილის შემდეგ დაემატოს შემდეგი შინაარსის მეორე ნაწილი:

„ამ კოდექსის 242² მუხლით გათვალისწინებულ დანაშაულთა წინასწარ შეპირების გარეშე დაფარვა, –

ისჯება თავისუფლების აღკვეთით ვადით ხუთ წლამდე ან გამასწორებელი სამუშაოებით ვადით ერთ წლამდე“.

205-ე მუხლის მეორე ნაწილი ჩაითვალოს მესამე ნაწილად;

თ) კოდექსის 206-ე მუხლს დაემატოს შემდეგი შინაარსის მეორე ნაწილი:

„განუცხადებლობა იმისა, რომ ნამდვილად მზადდება ან ჩადენილია დანაშაული, რომელიც გათვალისწინებულია ამ კოდექსის 242² მუხლით, –

ისჯება თავისუფლების აღკვეთით ვადით სამ წლამდე ან გამასწორებელი სამუშაოებით ვადით ერთ წლამდე“.

2. დაწესდეს, რომ იმ პირთა მიმართ, რომლებსაც ბრალი ედებათ საქართველო სსრ სისხლის სამართლის კოდექსის 242² მუხლით გათვალისწინებულ დანაშაულთა ჩადენაში, დაპატიმრება, როგორც აღკვეთის ღონისძიება, შეიძლება გამოყენებულ იქნეს მხოლოდ დანაშაულის საშიშროების მოტივით.

ამასთან დაკავშირებით საქართველოს სსრ სისხლის სამართლის საპროცესო კოდექსის 88-ე მუხლის მეორე ნაწილს ციფრების „240-ე II და III ნაწ.“ შემდეგ დაემატოს ციფრი „242².“

3. დაწესდეს, რომ საქართველოს სსრ სისხლის სამართლის კოდექსის 242² მუხლით გათვალისწინებულ დანაშაულთა საქმის წინასწარ გამოძიებას აწარმოებენ პროკურატურის ორგანოების გამომძიებლები.

ამასთან დაკავშირებით საქართველოს სსრ სისხლის სამართლის საპროცესო კოდექსის 126-ე მუხლის მესამე ნაწილს ციფრის „236“-ის შემდეგ დაემატოს ციფრი „242²“.

4. დაწესდეს, რომ საქართველოს სსრ სისხლის სამართლის კოდექსის 242² მუხლით გათვალისწინებულ დანაშაულთა საქმეები ექვემდებარება საქართველოს სსრ უმაღლეს სასამართლოს, ავტონომიური რესპუბლიკების უმაღლეს სასამართლოებს და ავტონომიური ოლქის სასამართლოს.

ამასთან დაკავშირებით საქართველოს სსრ სისხლის სამართლის საპროცესო კოდექსის 32-ე მუხლს ციფრის „209¹“ შემდეგ დაემატოს ციფრი „242²“.

საქართველოს სსრ უმაღლესი საბჭოს პრეზიდიუმის თავმჯდომარე გ. ძოწენიძე.

საქართველოს სსრ უმაღლესი საბჭოს პრეზიდიუმის მდივანი ზ. კვაჭაძე.

თბილისი, 1973 წლის 29 მაისი.