„საქართველოს გარემოს დაცვისა და სოფლის მეურნეობის სამინისტროს შიდა აუდიტის დეპარტამენტის დებულების დამტკიცების შესახებ“ საქართველოს გარემოს დაცვისა და სოფლის მეურნეობის მინისტრის 2020 წლის 30 სექტემბრის №2-874 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის საფუძველზე,  ვბრძანებ :

1. მე-3 მუხლს დაემატოს შემდეგი შინაარსის მე-4 პუნქტი:

„4. თუ საქართველოში მოქმედი კანონმდებლობით შიდა აუდიტის საერთაშორისო პროფესიული სტანდარტების გარკვეულ ნაწილთან შესაბამისობა არ მიიღწევა, დეპარტამენტის უფროსი ვალდებულია  შეატყობინოს მინისტრს ამ შეუსაბამობის ფაქტებისა და მისი შედეგების შესახებ.“.

2. მე-6 მუხლის მე-3 პუნქტი ჩამოყალიბდეს შემდეგი რედაქციით:

„3. პირველადი სტრუქტურული ერთეულის ხელმძღვანელს ჰყავს მოადგილე, რომელსაც კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი“.

3.  მე-6 მუხლს დაემატოს შემდეგი შინაარსის მე-4 და მე-5 პუნქტები:

„4. პირველადი სტრუქტურული ერთეულის ხელმძღვანელის არყოფნის შემთხვევაში, პირველადი სტრუქტურული ერთეულის ხელმძღვანელის მოვალეობას ასრულებს მისი მოადგილე.

5. დეპარტამენტის პირველადი სტრუქტურული ერთეულის ხელმძღვანელის მოადგილე:

ა) კომპეტენციის ფარგლებში, წარმართავს და ზედამხედველობას უწევს დეპარტამენტში შემავალი მეორადი სტრუქტურული ერთეულების/სამმართველოების საქმიანობას;

ბ) ზედამხედველობს დეპარტამენტის თანამშრომლების მიერ სამსახურებრივი მოვალეობების შესრულებას, ახორციელებს მათ მიერ სამინისტროს შინაგანაწესის   შესრულების კონტროლს;

გ) კომპეტენციის ფარგლებში ხელს აწერს ან ვიზას ადებს დეპარტამენტში მომზადებულ დოკუმენტებს;

დ) შეიმუშავებს და დეპარტამენტის უფროსს  წარუდგენს შიდააუდიტორული საქმიანობის სტრატეგიულ და წლიურ გეგმებს;

ე) სამინისტროს სისტემაში პროცესების, ოპერაციების, პროგრამების მნიშვნელოვანი ცვლილებების საპასუხოდ, ახდენს დამტკიცებული წლიური გეგმის გადახედვას და საჭიროების შემთხვევაში დეპარტამენტის უფროსს წარუდგენს წლიურ გეგმაში შესატან ცვლილებებს; 

ვ) მონაწილეობს შიდა აუდიტის ხარისხის უზრუნველყოფისა და გაუმჯობესების პროგრამის შემუშავებაში და უზრუნველყოფს მის შენარჩუნებას. პერიოდულად ახდენს პროგრამის გადახედვას;

ზ) იხილავს და დეპარტამენტის უფროსს  წარუდგენს შიდააუდიტორული საქმიანობის წლიურ ანგარიშს;

თ) საჭიროების შემთხვევაში მონაწილეობს საკონსულტაციო საქმიანობის განხორციელებაში;

ი) ახდენს დეპარტამენტის თანამშრომლების უწყვეტი პროფესიული განვითარებისთვის საჭირო შესაძლებლობების მოძიებას და სწავლების ხელშეწყობას, დეპარტამენტის ეფექტიანი საქმიანობისთვის საჭირო ცოდნის, უნარ-ჩვევებისა და სხვა კომპეტენციების ერთობლივად ფლობის უზრუნველსაყოფად;

კ) შეიმუშავებს და დეპარტამენტის უფროსს  წარუდგენს შიდააუდიტორული საქმიანობის მარეგულირებელ პოლიტიკისა და პროცედურების დოკუმენტებს, მონაწილეობს მათ დანერგვაში;

ლ) ახორციელებს შიდააუდიტორული საქმიანობის მიმდინარე მონიტორინგს;

მ) დეპარტამენტის უფროსს  წარუდგენს  შიდა აუდიტორთა ეთიკის კოდექსთან და აუდიტის საერთაშორისო სტანდარტებთან ისეთ შეუსაბამობებს, რომლებიც მნიშვნელოვან გავლენას ახდენენ შიდა აუდიტის საქმიანობაზე და მის მასშტაბზე;

ნ) დეპარტამენტის რესურსების შესაბამისობის, საკმარისობის და დამტკიცებული გეგმის შესაბამისად, მათი ეფექტიანი განაწილებისთვის, წინადადებებს წარუდგენს  დეპარტამენტის უფროსს;

ო) განიხილავს და დეპარტამენტის უფროსს დასამტკიცებლად წარუდგენს  აუდიტორული შემოწმების ინდივიდუალურ გეგმას;

პ) განიხილავს აუდიტორული საქმიანობის ინდივიდუალურ სამუშაო პროგრამას;

ჟ) ახდენს შიდააუდიტორული შემოწმებების კოორდინაციას, ზედამხედველობას, განიხილავს შიდააუდიტორული შემოწმების ანგარიშებს;

რ) ახორციელებს კოორდინაციასა და ზედამხედველობას შიდა აუდიტის მიგნებებსა და რეკომენდაციებზე პასუხისმგებელი პირების მიერ გასატარებელ ღონისძიებათა მონიტორინგის პროცესზე და განიხილავს გაცემული რეკომენდაციების შესრულების მდგომარეობის მონიტორინგის ანგარიშებს;

ს) ახორციელებს შიდააუდიტორული საქმიანობის ხარისხის პერიოდულ თვითშეფასებას და თვითშეფასების ანგარიშს წარუდგენს დეპარტამენტის უფროსს;

ტ) ახდენს  შიდა აუდიტორების კომპეტენციების შეფასებების და  პროფესიული განვითარების გეგმების განხილვას და განხორციელების ხელშეწყობას;

უ) მონაწილეობს დეპარტამენტის საქმიანობაში რისკის მართვის პროცესის ეფექტიანობის უზრუნველყოფაში;

ფ) დეპარტამენტის უფროსისა და მინისტრის დავალებით, ახორციელებს სხვა უფლებამოსილებებს“.