,,საქართველოს გენერალური პროკურატურის პროგრამული უზრუნველყოფის, უსაფრთხოებისა და ტექნიკური მხარდაჭერის ცენტრის (სამმართველო) დებულების დამტკიცების შესახებ“ საქართველოს გენერალური პროკურორის 2020 წლის 6 მაისის N024 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად,  ვბრძანებ:

1. მე-3 მუხლის მე-2 პუნქტის ,,ბ“ ქვეპუნქტი ჩამოყალიბდეს შემდეგი რედაქციით:

,, ბ) ანაწილებს მოვალეობებს სამმართველოს უფროსის მოადგილესა და სამმართველოს თანამშრომლებს შორის, უზრუნველყოფს სამმართველოს მუშაობის ორგანიზაციას; აკონტროლებს სამმართველოს თანამშრომელთა მხრიდან სამსახურებრივი და საშემსრულებლო დისციპლინის დაცვას;“.

2. მე-3 მუხლს დაემატოს შემდეგი შინაარსის მე-3 პუნქტი:

,, 3. სამმართველოს უფროსის არყოფნის შემთხვევაში სამმართველოს უფროსის მოვალეობას ასრულებს სამმართველოს უფროსის მოადგილე.“.

3. დებულებას დაემატოს შემდეგი შინაარსის 3¹ მუხლი:

„მუხლი 3¹. სამმართველოს უფროსის მოადგილე

1. სამმართველოს უფროსს ჰყავს მოადგილე, რომელსაც თანამდებობაზე ნიშნავს და თანამდებობიდან ათავისუფლებს გენერალური პროკურორი.

2. სამმართველო უფროსის მოადგილე:

ა) სამმართველოს უფროსთან შეთანხმებით ანაწილებს მოვალეობებს სამმართველოს თანამშრომლებს შორის;

ბ) ხელს აწერს სამმართველოში მომზადებულ დოკუმენტებს;

გ) აკონტროლებს სამმართველოს თანამშრომლების მიერ სამსახურებივი მოვალეობების შესრულებას და შრომის დისციპლინის დაცვას;

დ) სამმართველოს უფროსის წინაშე აყენებს საკითხებს სამმართველოს თანამშრომელთა სამსახურებრივი წახალისებისა და დისციპლინური პასუხისმგებლობის შესახებ;

ე) აკონტროლებს სამმართველოს კომპეტენციას მიკუთვნებულ საკითხებზე გენერალური პროკურორის ბრძანებების, მითითებებისა და დავალებების, გენერალური პროკურორის უფლებამოსილი მოადგილის, სამმართველოს უფროსის დავალებების შესრულებას;

ვ) ასრულებს გენერალური პროკურორის, გენერალური პროკურორის უფლებამოსილი მოადგილის და სამმართველოს უფროსის ცალკეულ დავალებებს;

ზ) ახორციელებს კანონმდებლობით მინიჭებულ სხვა უფლებამოსილებებს.“.