საარჩევნო ოლქებისა და საარჩევნო უბნების შექმნის, მათი სახელწოდებების, საზღვრებისა და ნომრების დადგენის საარჩევნო პროცედურებისა და ვადების განსაზღვრის შესახებ

საქართველოს ორგანული კანონის „საქართველოს საარჩევნო კოდექსი” მე-14 მუხლის პირველი პუნქტის „გ” და „ე” ქვეპუნქტების, მე-3 პუნქტის, მე-18 მუხლის, 76³ მუხლის მე-4 პუნქტისა და 77-ე მუხლის მე-5 პუნქტის საფუძველზე, საქართველოს ცენტრალური საარჩევნო კომისია ადგენს:

მუხლი 1. საქართველოს პარლამენტის 2024 წლის არჩევნებისთვის საარჩევნო ოლქების სახელწოდებების, საზღვრებისა და ნომრების, აგრეთვე საოლქო საარჩევნო კომისიების სამოქმედო ტერიტორიების დადგენა

საქართველოს პარლამენტის 2024 წლის არჩევნების ორგანიზებისთვის საქართველოს ორგანული კანონის „საქართველოს საარჩევნო კოდექსი” მე-18 მუხლის პირველი პუნქტით გათვალისწინებულ ერთიან მრავალმანდატიან საარჩევნო ოლქს 73 საარჩევნო ოლქად ყოფს, მათ სახელწოდებებს, საზღვრებსა და ნომრებს, აგრეთვე საოლქო საარჩევნო კომისიების სამოქმედო ტერიტორიებს ადგენს ცესკო განკარგულებით ამ დადგენილების ამოქმედებიდან არაუგვიანეს 2 დღისა.

მუხლი 2. საქართველოს პარლამენტის 2024 წლის არჩევნებისთვის საარჩევნო უბნების შექმნის ვადა

საქართველოს პარლამენტის 2024 წლის არჩევნებისთვის საარჩევნო უბნებს, მათ შორის, საქართველოს ორგანული კანონით „საქართველოს საარჩევნო კოდექსი” 76³ მუხლის მე-4 პუნქტით გათვალისწინებულ საარჩევნო უბნებს ქმნის, აგრეთვე მათ საზღვრებსა და ნომრებს ადგენს შესაბამისი საოლქო საარჩევნო კომისია ცესკოს მიერ ამ დადგენილების პირველი მუხლით გათვალისწინებული განკარგულების მიღებიდან არაუგვიანეს 2 დღისა, ცესკოს 2023 წლის 6 თებერვლის №5/2023 განკარგულებისა და ამ დადგენილების პირველი მუხლით გათვალისწინებული განკარგულების გათვალისწინებით.

მუხლი 3. საარჩევნო ოლქებისა და საარჩევნო უბნების შექმნის შესახებ სამართლებრივ აქტებში ცვლილებების შეტანის ვადა

ცესკო/საოლქო საარჩევნო კომისია უფლებამოსილია, საჭიროებისამებრ, არაუგვიანეს 2024 წლის 1 ივლისისა შეიტანოს ცვლილებები ამ დადგენილების პირველი და მე-2 მუხლების საფუძველზე მიღებულ სამართლებრივ აქტებში.

მუხლი 4. საარჩევნო ოლქებისა და საარჩევნო უბნების შესახებ ინფორმაციის გამოქვეყნების ვადა

ცესკო ამ დადგენილებით გათვალისწინებული საარჩევნო ოლქებისა და საარჩევნო უბნების შექმნიდან არაუგვიანეს 5 დღისა თავის ოფიციალურ ვებგვერდზე აქვეყნებს სათანადო ინფორმაციას საარჩევნო ოლქებისა და საარჩევნო უბნების საზღვრების მითითებით.

მუხლი 5. საარჩევნო უბნების ნომრების, საუბნო საარჩევნო კომისიების მისამართების, საკონტაქტო ტელეფონის ნომრებისა და სხვა რეკვიზიტების გამოქვეყნების ვადა

საქართველოს ორგანული კანონის „საქართველოს საარჩევნო კოდექსი” 23-ე მუხლის  მე-8 პუნქტში აღნიშნული ვადები, ამავე მუხლით დადგენილი ქმედების განხორციელებისათვის აითვალოს საქართველოს პარლამენტის 2024 წლის არჩევნების დანიშვნის დღიდან.

მუხლი 6. საქართველოს პარლამენტის 2024 წლის არჩევნების დანიშვნამდე საქართველოს პარლამენტის შუალედური, მუნიციპალიტეტების მერების რიგგარეშე და საკრებულოების შუალედური არჩევნების გამართვა

საქართველოს პარლამენტის 2024 წლის არჩევნების დანიშვნამდე გამართულ საქართველოს პარლამენტის შუალედურ, მუნიციპალიტეტების მერების რიგგარეშე და საკრებულოების შუალედურ არჩევნებზე არ ვრცელდება ამ დადგენილების მოქმედება.

ეს დადგენილება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი №64) მისი მიღებიდან 2 კალენდარული დღის ვადაში.

ეს დადგენილება ამოქმედდეს გამოქვეყნებისთანავე.