„სოციალური რეაბილიტაციისა და ბავშვზე ზრუნვის 2023 წლის სახელმწიფო პროგრამის“ დამტკიცებამდე „სოციალური რეაბილიტაციისა და ბავშვზე ზრუნვის 2022 წლის სახელმწიფო პროგრამის“ უწყვეტი განხორციელებისათვის საჭირო ღონისძიებების, დაფინანსების წყაროსა და პირობების განსაზღვრის შესახებ

1. „სოციალური რეაბილიტაციისა და ბავშვზე ზრუნვის 2023 წლის სახელმწიფო პროგრამის“ დამტკიცებამდე გაგრძელდეს „სოციალური რეაბილიტაციისა და ბავშვზე ზრუნვის 2022 წლის სახელმწიფო პროგრამის დამტკიცების შესახებ“  საქართველოს მთავრობის 2021 წლის 31 დეკემბრის №634 დადგენილებით (შემდგომში – საქართველოს მთავრობის 2021 წლის 31 დეკემბრის №634 დადგენილება) დამტკიცებული, 2022 წლის შესაბამისი პროგრამით გათვალისწინებული ქვეპროგრამები (კომპონენტი, ღონისძიება).

2. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სახელმწიფო კონტროლს დაქვემდებარებულმა საჯარო სამართლის იურიდიულმა პირმა − სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ (შემდგომში – ზრუნვის სააგენტო)  უზრუნველყოს 2023 წლის 1 იანვრიდან საქართველოს მთავრობის 2021 წლის 31 დეკემბრის №634 დადგენილებით დამტკიცებული 2022 წლის სახელმწიფო პროგრამის ქვეპროგრამების (კომპონენტი, ღონისძიება) უწყვეტად განხორციელება, ხელშეკრულების გაფორმება ან მოქმედების ვადის გაგრძელება იმავე მიმწოდებლებთან, რომლებიც ახორციელებდნენ საქართველოს მთავრობის 2021 წლის 31 დეკემბრის №634 დადგენილებით დამტკიცებული 2022 წლის სახელმწიფო პროგრამის შესაბამის ქვეპროგრამებს (კომპონენტს, ღონისძიებებს), ხოლო ახალი მიმწოდებლების რეგისტრაცია გაგრძელდეს საქართველოს მთავრობის 2021 წლის 31 დეკემბრის №634 დადგენილებით დამტკიცებული 2022 წლის სახელმწიფო პროგრამით განსაზღვრული პირობების შესაბამისად. ამასთან, შესაბამისი ქვეპროგრამებით გათვალისწინებული ღონისძიებების დაფინანსების წყაროდ განისაზღვროს „საქართველოს 2023 წლის სახელმწიფო ბიუჯეტის შესახებ“ საქართველოს კანონით „სოციალური რეაბილიტაცია და ბავშვზე ზრუნვა“ პროგრამის (პროგრამული კოდი:  27 02 03) ქვეპროგრამებით გათვალისწინებული ასიგნებები, მაგრამ არა უმეტეს ამავე ქვეპროგრამით დამტკიცებული ასიგნებების 1/12-ისა.

3. ზრუნვის სააგენტომ უზრუნველყოს, 2023 წლის პროგრამისთვის გათვალისწინებული ასიგნებების ფარგლებში, საქართველოს მთავრობის 2021 წლის 31 დეკემბრის №634 დადგენილებით დამტკიცებული „სოციალური რეაბილიტაციისა და ბავშვზე ზრუნვის 2022 წლის სახელმწიფო პროგრამით“ გათვალისწინებული იმ ღონისძიებების ღირებულების ანაზღაურება, რომელთა ანაზღაურება 2022 წლის სახელმწიფო პროგრამის დაფინანსების პირობათა გათვალისწინებით ვერ განხორცილდება 2022 წლის ამოწურვამდე.

4. „განვითარების მძიმე და ღრმა შეფერხების მქონე ბავშვთა ბინაზე მომსახურებით უზრუნველყოფის ქვეპროგრამით“ მოსარგებლე სრულწლოვანი ბენეფიციარების მომსახურება გაგრძელდეს 18 წლის შესრულების თვიდან არა უმეტეს 14 თვის განმავლობაში.