ამომრჩაველთა ერთიანი სიების შემოწმების შესახებ

სახელმწიფო სარგეისტრაციო კოდი 010.190.020.13.007.006.178

საქართველოს ცენტრალური საარჩევნო

კომისიის დადგენილება №44/2003

2003 წლის 13 ნოემბერი

ქ. თბილისი

ამომრჩეველთა ერთიანი სიების გადამოწმების შესახებ

საქართველოს ორგანული კანონის „საქართველოს საარჩევნო კოდექსი” 106-ე და 128⁶ მუხლების საფუძველზე:

საქართველოს ცენტრალური საარჩევნო კომისია ადგენს:

    მუხლი I

საქართველოს პარლამენტის 2003 წლის მაჟორიტარული წესით არჩევნების მეორე ტურის არჩევნების ორგანიზებულად ჩატარების უზრუნველყოფის მიზნით დაევალოს საუბნო და საოლქო საარჩევნო კომისიებს ამომრჩეველთა სიების გადამოწმება საქართველოს ორგანული კანონის „საქართველოს საარჩევნო კოდექსი” 128⁶ მუხლის პირველ პუნქტში აღნიშნული დაწესებულებების მონაცემების, ასევე მოქალაქეთა განცხადებების საფუძველზე მაჟორიტარული წესით არჩევნების მეორე ტურის ჩატარებამდე.

    მუხლი II 

ამომრჩეველთა სიების გადამოწმებული ვარიანტი საუბნო და საოლქო საარჩევნო კომისიებმა მიაწოდონ ცენტრალურ საარჩევნო კომისიას მეორე ტურის არჩევნების გამართვამდე სამი დღით ადრე მაინც.

    მუხლი III

ნებისმიერ დაინტერესებულ პირს შეუძლია გაეცნოს ამომრჩეველთა სიების გადამოწმებულ ვარიანტს და უზუსტობის აღმოჩენისას მიმართოს საუბნო საარჩევნო კომისიას ხარვეზის აღმოსაფხვრელად.

    მუხლი IV 

დადგენილება შეიძლება გასაჩივრდეს თბილისის საოლქო სასამართლოში გამოქვეყნებიდან 3 დღის ვადაში.

    მუხლი V

ეს დადგენილება ამოქმედდეს გამოქვეყნებისთანავე.

კომისიის თავმჯდომარე ნანა დევდარიანი

კომისიის მდივანი გიორგი მიქანაძე