„საქართველოს ენერგეტიკისა და წყალმომარაგების მარეგულირებელი ეროვნული კომისიის დებულების დამტკიცების შესახებ“ საქართველოს ენერგეტიკისა და წყალმომარაგების მარეგულირებელი ეროვნული კომისიის 2020 წლის 28 დეკემბრის №79 დადგენილებაში ცვლილების შეტანის შესახებ

1. მე-8 მუხლის მე-2 პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) საერთო ხელმძღვანელობას უწევს ადმინისტრაციული დეპარტამენტის, შესყიდვების, ქონების მართვისა და ლოჯისტიკის დეპარტამენტის, საფინანსო-საბიუჯეტო დეპარტამენტისა და კომპიუტერულ-ტექნიკური და პროგრამული უზრუნველყოფის დეპარტამენტის საქმიანობას;“.

2. მე-9 მუხლის მე-4 პუნქტის „ნ“ ქვეპუნქტი ჩამოყალიბდეს შემდეგი რედაქციით:

„ნ) ადმინისტრაციული დეპარტამენტი;”.

3.  23-ე მუხლის „დ“ ქვეპუნქტი ჩამოყალიბდეს შემდეგი რედაქციით:

„დ) საქართველოს ფარგლებს გარეთ კომისიის თავმჯდომარის, წევრებისა და აპარატის თანამშრომლების ვიზიტების პროტოკოლური უზრუნველყოფა, აგრეთვე, ადმინისტრაციულ დეპარტამენტსა და სხვა შესაბამის დეპარტამენტთან/დეპარტამენტებთან თანამშრომლობით, საქართველოში შეხვედრების, კონფერენციების, სემინარებისა და ამ მუხლის „ა“ ქვეპუნქტით გათვალისწინებული სხვა უცხოური ორგანიზაციების წარმომადგენლების ვიზიტების ორგანიზებაში მონაწილეობა;“.

4. 24-ე მუხლი ჩამოყალიბდეს შემდეგი რედაქციით:

„მუხლი 24. ადმინისტრაციული დეპარტამენტი

1. ადმინისტრაციული დეპარტამენტის ძირითადი ფუნქციები და უფლებამოსილებებია:

ა) კომისიის საქმიანობის ადმინისტრაციულ-ორგანიზაციული უზრუნველყოფა;

ბ) იმ საკითხებთან დაკავშირებით, რომლებიც სცილდება კომისიის სხვა სტრუქტურული ერთეულების უფლებამოსილებათა ფარგლებს, კომისიის ურთიერთობების კო­ორდინაცია სხვადასხვა სახელმწიფო დაწესებულებასთან, საჯარო და კერ­ძო სამართლის იურიდიულ პირთან, არასამთავრობო ორგანიზაციასთან და ამ ურთიერთობების კოორდინაციისათვის საჭირო მოქმედებების განხორციელება;

გ) კომპეტენციის ფარგლებში მემორანდუმის, ხელშეკრულების პროექტების მომზადება და მათი გაფორმების ორგანიზება;

დ) გენდერული სტრატეგიის შემუშავება და განხორციელება;

ე) დასაქმებულთა მხრიდან საქართველოს შრომის კანონმდებლობისა და კომისიის შიდაორგანიზაციული აქტების მოთხოვნების სავარაუდო დარღვევის ფაქტების შესწავლა და საჭიროების შემთხვევაში შესაბამისი დისციპლინური წარმოების პროცესის ორგანიზება;

ვ) სახელმწიფო საიდუმლო საქმისწარმოების განხორციელება;

ზ) კომისიის საქმიანობის პროტოკოლური უზრუნველყოფა, გარდა საქართველოს ფარგლებს გარეთ კომისიის თავმჯდომარის, წევრებისა და აპარატის თანამშრომლების ვიზიტების პროტოკოლური უზრუნველყოფისა;  

თ) შრომის შინაგანაწესის შემუშავება, დასაქმებულთა მიერ შინაგანაწესისა და  სამსახურებრივი მოვალეობების, მათ შორის ეთიკისა და ქცევის წესების შესრულებაზე ზედამხედველობა;

ი) კომისიაში პერსონალური მონაცემების, კონფიდენციალური ინფორმაციის, სამსახურებრივი, პროფესიული და კომერციული საიდუმლოებების დაცვის უზრუნველყოფა;

კ) ადმინისტრაციულ, ადამიანური რესურსების მართვისა და საქმისწარმოების სფეროებში საუკეთესო საერთაშორისო გამოცდილების კვლევა და ანალიზი;

ლ) კომისიის ადამიანური რესურსების მართვა;

მ) ადამიანური რესურსების მართვის სტრატეგიის შემუშავება და განხორციელება;

ნ) ადამიანური რესურსების მართვის პოლიტიკისა და პროცედურების შესახებ დასაქმებულთა პერიოდული ინფორმირება;

ო) ადამიანური რესურსების დადგენილი წესით შერჩევისა და კარიერული განვითარების ორგანიზაციული უზრუნველყოფა,

პ) საშტატო თანამდებობისა და არასაშტატო პოზიციებისთვის სამუშაო აღწერილობების შემუშავება;

ჟ) დასაქმებულთა პირადი საქმეების წარმოება, ადმინისტრირება და ელექტრონულ პროგრამაში ინტეგრირება;

რ) დასაქმებულთა პროფესიული საჭიროებების განსაზღვრა და შესაბამისი კვალიფიკაციისა და ცნობიერების ამაღლების პროცესის კოორდინირება;

ს) დასაქმებულთა მიერ შესრულებული სამუშაოს შეფასების პროცესის ადმინისტრირება  და მის შესახებ ანგარიშგება;

ტ) დადგენილი წესით დასაქმებულთა შვებულებისა და მივლინების ორგანიზება;

უ) ადამიანური რესურსების მართვასთან დაკავშირებული კომისიის სამართლებრივი აქტების პროექტების მომზადება, მიღებული სამართლებრივი აქტების სისტემატიზაცია და კომპეტენციის ფარგლებში მათ შესრულებაზე კონტროლისა და ზედამხედველობის განხორციელება;

ფ) კომისიაში სტაჟირებისა და პრაქტიკის პროცესების ორგანიზება;

ქ) საჯარო ინფორმაციის ხელმისაწვდომობის უზრუნველყოფა და ყოველწლიური ანგარიშის მომზადება;

ღ) კომპეტენციის ფარგლებში მოქალაქეთა განცხადებების მიღების პროცესის ორგანიზება;

ყ) კომისიის ერთიანი საქმისწარმოების უზრუნველყოფა, მისი სისტემური ორგანიზება, კოორდინაცია და კონტროლი კომისიის საქმისწარმოების წესის შესაბამისად;

შ) კომისიაში შემოსულ კორესპონდენციასთან მიმართებით შესაბამისი ადმინისტრაციული წარმოებისთვის განსაზღვრული ვადების დაცვის უზრუნველმყოფი ღონისძიებებისა და მონიტორინგის განხორციელება;

ჩ) კომისიის სხდომების ორგანიზება და ოქმების წარმოება;

ც) კომისიის მიერ მიღებული ინდივიდუალური ადმინისტრაციულ-სამართლებრივი აქტების სისტემატიზებული სახით კომისიის შიდა ელექტრონულ რესურსზე განთავსების კონტროლი;

ძ) კომისიის მიერ მიღებული ნორმატიული აქტების დადგენილი წესით სახელმწიფო რეესტრში რეგისტრაციისა და ოფიციალურად გამოქვეყნების უზრუნველყოფა;

წ) კომისიის სამართლებრივი აქტების უწყებრივი რეესტრის წარმოება;

ჭ) კომისიის საარქივო საქმისწარმოების უზრუნველყოფა;

ხ) მკაცრი აღრიცხვის ფორმების გამოყენებისა და აღრიცხვა-ანგარიშგების უზრუნველყოფა;

ჯ) უწყებრივი სალიცენზიო რეესტრის წარმოება; უწყებრივ სალიცენზიო რეესტრში შეტანილი მონაცემების „საქართველოს საკანონმდებლო მაცნეში” გამოქვეყნების უზრუნველყოფა;

ჰ) კომპეტენციის ფარგლებში, კომისიის, კომისიის თავმჯდომარის ან/და კომისიის წევრის დავალებით განსაზღვრული სხვა ფუნქციებისა და უფლებამოსილებების განხორციელება.

2. ადმინისტრაციულ დეპარტამენტში იქმნება ორი სამმართველო:

ა) ადამიანური რესურსების მართვის სამმართველო;

ბ) საქმისწარმოების სამმართველო.

3. ადამიანური რესურსების მართვის სამმართველო ახორციელებს ამ მუხლის პირველი პუნქტის „ლ“-„ქ“ ქვეპუნქტებით გათვალისწინებულ ფუნქციებსა და უფლებამოსილებებს, ხოლო საკუთარი კომპეტენციის ფარგლებში – „ჰ“ ქვეპუნქტით გათვალისწინებულ ფუნქციასა და უფლებამოსილებას.

4. საქმისწარმოების სამმართველო ახორციელებს ამ მუხლის პირველი პუნქტის „ღ“-„ჯ“ ქვეპუნქტებით გათვალისწინებულ ფუნქციებსა და უფლებამოსილებებს, ხოლო საკუთარი კომპეტენციის ფარგლებში – „ჰ“ ქვეპუნქტით გათვალისწინებულ ფუნქციასა და უფლებამოსილებას.“.