„საქართველოს ფინანსთა სამინისტროს სახაზინო ვალდებულებების გამოშვების, განთავსების, მიმოქცევის, აღრიცხვისა და დაფარვის შესახებ“ დებულებაში ცვლილებების შეტანის თაობაზე

საქართველოს ფინანასთა სამინისტროსა და საქართველოს ეროვნული ბანკის

ერთობლივი ბრძანება № 55/28

1999 წლის 26 თებერვალი

ქ. თბილისი

„საქართველოს ფინანსთა სამინისტროს სახაზინო ვალდებულებების გამოშვების, განთავსების, მიმოქცევის, აღრიცხვისა და დაფარვის შესახებ“ დებულებაში ცვლილებების შეტანის თაობაზე

სახაზინო ვალდებულებების აუქციონებში მონაწილეობის მისაღებად ინვესტორთა მოზიდვის, მათი ინტერესების დაცვის და აქედან გამომდინარე, მოქმედი დებულების სრულყოფის მიზნით „საქართველოს ფინანსთა სამინისტროს სახაზინო ვალდებულებების გამოშვების, განთავსების, მიმოქცევის, აღრიცხვისა და დაფარვის შესახებ“ საქართველოს ფინანსთა სამინისტროს და საქართველოს ეროვნული ბანკის 1997 წლის 8 აგვისტოს №194/45 ერთობლივი ბრძანებით დამტკიცებულ დებულებაში შეტანილი იქნეს შემდეგი ცვლილებები:

1. დებულების 2.1. პუნქტი ჩამოყალიბდეს შემდეგი რედაქციით:

„აუქციონში მონაწილეობის უფლება აქვს კომერციულ ბანკებს (შემდგომში „ბანკებს“) და მათი მეშვეობით - რეზიდენტ და არარეზიდენტ ფიზიკურ და იურიდიულ პირებს.

ინვესტორების თანხებით აუქციონზე არ დაიშვებიან ის ბანკები, რომელთაც ეროვნული ბანკის მიერ შეზღუდული აქვთ ვალდებულებების გაზრდა, მათ შორის ბანკის კლიენტების მხრიდან სახსრების მოზიდვა სახელმწიფო ფასიან ქაღალდებში ინვესტირების განსახორციელებლად".

2. დებულების №4 დანართის მე-2, მე-3 და მე-5 სვეტებიდან ამოღებულ იქნეს „ვარსკვლავები“ (*).

3. დებულების №4 დანართს შენიშვნაში დაემატოს „მეორე სვეტი ივსება კლიენტის სურვილის გათვალისწინებით“. 

4. დებულების №7 დანართს შენიშვნებში დაემატოს „სახაზინო ვალდებულებების გამსხვისებლის (დამგირავებლის) და ახალი მფლობელის (მოგირავნის) დასახელება და ხელმოწერები მიეთითება კლიენტის სურვილის გათვალისწინებით“.

5. დებულების №8 დანართს შენიშვნებში დაემატოს „ინვესტორის დასახელება და ხელმოწერა მიეთითება კლიენტის სურვილის გათვალისწინებით“.

საქართველოს ფინანსთა მინისტრი    დავით ონოფრიშვილი

საქართველოს ეროვნული ბანკის პრეზიდენტი ირაკლი მანაგაძე