საქართველოს ფინანსთა სამინისტროსა და ეროვნული ბანკის 1997 წლის 8 აგვისტოს №194/45 ერთობლივი ბრძანებით დამტკიცებულ „საქართველოს ფინანსთა სამინისტროს სახაზინო ვალდებულებების გამოშვების, განთავსების, მიმოქცევის, აღრიცხვისა და დაფარვის შესახებ“ დებულებაში ცვლილებისა და დამატების შეტანის თაობაზე

საქართველოს ფინანსთა სამინისტროსა და საქართველოს ეროვნული ბანკის 1997 წლის 8 აგვისტოს №194/45 ბრძანებით დამტკიცებულ „სახაზინო ვალდებულებების გამოშვების განთავსების, მიმოქცევის, აღრიცხვისა და დაფარვის შესახებ“ დებულების სრულყოფის მიზნით მასში შეტანილ იქნეს შემდეგი ცვლილება და დამატება:

1. დებულების მე-2 თავის 2.4 პუნქტი ჩამოყალიბდეს შემდეგი რედაქციით:

„ბანკებს უფლება აქვთ წარადგინონ მხოლოდ კონკურენტული (შეუზღუდავად) ან მხოლოდ არაკონკურენტული (არაუმეტეს 200 ცალი სახაზინო ვალდებულების ყიდვის) განაცხადები.

სახაზინო ვალდებულებების მყიდველ რეზიდენტ და არარეზიდენტ იურიდიულ და ფიზიკურ პირებს უფლება აქვთ წარადგინონ მხოლოდ ერთი არაკონკურენტული განაცხადი არა უმეტეს 200 ცალი სახაზინო ვალდებულების ყიდვის თაობაზე და შეუზღუდავად კონკურენტული განაცხადები.“.

2. დებულების მე-6 თავს 6.1 პუნქტად დაემატოს შემდეგი შინაარსის აბზაცი:

„ბანკებს ეკრძალებათ ისეთი გარიგებებისა და მოქმედებების განხორციელება, რომელთა შედეგადაც ისინი დამოუკიდებლად ან სხვა პირებთან ერთად დომინირებულ მდგომარეობაში აღმოჩნდებიან სახაზინო ვალდებულებების ბაზარზე, აგრეთვე ყოველგვარი სხვა მანიპულაციები, რომლებიც დაუმსახურებელ უპირატესობას მიანიჭებს მათ ან მესამე პირებს და შექმნის კონკურენციის შეზღუდვისა და საპროცენტო განაკვეთების ფიქსაციის საშიშროებას.“.

3. 6.1 და 6.2 პუნქტები შესაბამისად ჩაითვალონ 6.2 და 6.3 პუნქტებად.

საქართველოს ფინანსთა მინისტრი                                                     დავით ონოფრიშვილი

საქართველოს ეროვნული ბანკის პრეზიდენტი                               ირაკლი მანაგაძე