საქართველოს ტრანსპორტის სამინისტროს შექმნის შესახებ

საქართველოს კანონი

საქართველოს ტრანსპორტის სამინისტროს შექმნის შესახებ

ტრანსპორტის დარგში სახელმწიფო პოლიტიკის ჩამოყალიბების, სატრანსპორტო ბაზრის რეგულირებისა და დაცვის მიზნით, აგრეთვე საქართველოს გეოპოლიტიკური მდგომარეობის გათვალისწინებით საერთაშორისო ეკონომიკურ ურთიერთობებში ქვეყნის ინტეგრირებისა და საერთაშორისო ხელშეკრულებების შესრულების უზრუნველსაყოფად საქართველოს პარლამენტი ადგენს:

I. შეიქმნას საქართველოს ტრანსპორტის სამინისტრო.

ამასთან დაკავშირებით „აღმასრულებელი ხელისუფლების და საქმიანობის წესის შესახებ“ საქართველოს 1995 წლის 8 დეკემბრის კანონში შეტანილ იქნეს შემდეგი ცვლილებანი და დამატებანი:

1. მე-3 მუხლს აბზაცის „სოციალური დაცვის, შრომისა და დასაქმების“ შემდეგ დაემატოს აბზაცი „ტრანსპორტის“.

2. მე-8 მუხლის „ბ“ პუნქტიდან ამოღებულ იქნეს სიტყვები: „საავტომობილო ტრანსპორტის“, „საზღვაო სანაოსნოს“, „საქართველოს რკინიგზის“, „საქართველოს საჰაერო ტრანსპორტის“.

3. მე-13 მუხლს დაემატოს შემდეგი შინაარსის აბზაცი:

„საავტომობილო ტრანსპორტის, საზღვაო სანაოსნო, საქართველოს რკინიგზის და საქართველოს საჰაერო ტრანსპორტის დეპარტამენტები, ევრაზიის სატრანსპორტო დერეფნის პრობლემური ცენტრი და რესპუბლიკური სამეცნიერო-საწარმოო გაერთიანება „საქსპეცტრანსი“ დაექვემდებაროს ტრანსპორტის სამინისტროს“.

4. ამოღებულ იქნეს მე-14 მუხლი.

II. საქართველოს ფინანსთა სამინისტრომ სახელმწიფო ბიუჯეტში გაითვალისწინოს ტრანსპორტის სამინისტროს აპარატის დაფინანსების ხარჯები.

III. ეს კანონი ამოქმედდეს გამოქვეყნებისთანავე.

საქართველოს პრეზიდენტი

ედუარდ შევარდნაძე.

თბილისი,

1996 წლის 26 ივნისი.