დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
ტანისა და თეძმის დაცული ტერიტორიების შექმნისა და მართვის შესახებ | |
---|---|
დოკუმენტის ნომერი | 2024-IXმს-Xმპ |
დოკუმენტის მიმღები | საქართველოს პარლამენტი |
მიღების თარიღი | 03/11/2022 |
დოკუმენტის ტიპი | საქართველოს კანონი |
გამოქვეყნების წყარო, თარიღი | ვებგვერდი, 14/11/2022 |
ძალაში შესვლის თარიღი | 01/01/2023 |
სარეგისტრაციო კოდი | 360050000.05.001.020652 |
|
ტანისა და თეძმის დაცული ტერიტორიების შექმნისა და მართვის შესახებ
|
მუხლი 1. კანონის რეგულირების სფერო
1. ეს კანონი არეგულირებს ტანისა და თეძმის დაცული ტერიტორიების − ტანისა და თეძმის დაცული ლანდშაფტისა და ტანის აღკვეთილის − შექმნისა და მართვის სფეროში არსებულ ძირითად სამართლებრივ ურთიერთობებს. 2. ტანისა და თეძმის დაცული ტერიტორიებისთვის მიკუთვნებული მიწის, ტყის, წყლისა და სხვა ბუნებრივი რესურსების, აგრეთვე ისტორიული და კულტურული მემკვიდრეობის ძეგლების დაცვასა და გამოყენებასთან დაკავშირებული ურთიერთობები რეგულირდება ამ კანონითა და საქართველოს სხვა საკანონმდებლო და კანონქვემდებარე ნორმატიული აქტებით.
მუხლი 2. კანონის ძირითადი მიზნები და ამოცანები 1. ამ კანონის ძირითადი მიზნებია: ა) უზრუნველყოს ტანისა და თეძმის დაცული ტერიტორიების შექმნა; ბ) მოაწესრიგოს ტანისა და თეძმის დაცული ტერიტორიების დაცვისა და გამოყენების რეჟიმი (სამართლებრივი მექანიზმი); გ) დაადგინოს ტანისა და თეძმის დაცული ტერიტორიების მართვის სისტემა; დ) მოაწესრიგოს ტანისა და თეძმის დაცული ტერიტორიების მართვის მექანიზმები; ე) უზრუნველყოს ტანისა და თეძმის დაცულ ტერიტორიებზე ეროვნული მნიშვნელობის მქონე, ხოლო ცალკეულ შემთხვევებში − საერთაშორისო მნიშვნელობის მქონე ცოცხალი ორგანიზმების ველური სახეობების, სახეობათა ჯგუფების, ბიოცენოზებისა და არაორგანული ბუნების წარმონაქმნების შესანარჩუნებლად საჭირო ბუნებრივი პირობების დაცვა, რაც სპეციალური აღდგენითი და მოვლითი ღონისძიებების განხორციელებას მოითხოვს, აგრეთვე საქართველოს „წითელ ნუსხასა“ და გლობალურ „წითელ ნუსხაში“ შეტანილ გადაშენების საფრთხის წინაშე მყოფ გარეულ ცხოველთა და ველურ მცენარეთა გენოფონდის დაცვა, აღდგენა და ბიოლოგიური მრავალფეროვნების შენარჩუნება. 2. ამ კანონის ძირითადი ამოცანაა, ტანისა და თეძმის დაცული ტერიტორიების ფარგლებში: ა) ბუნებრივი პროცესების უწყვეტი განვითარების უზრუნველსაყოფად ხელი შეუწყოს ბიოლოგიური მრავალფეროვნებითა და ისტორიული და კულტურული თვალსაზრისით გამორჩეული, ბუნებრივი ან სახეცვლილი ისტორიულ-გეოგრაფიული მხარეების − ტანისა და თეძმის ხეობების ტერიტორიების დაცვას, აღდგენასა და გონივრულ გამოყენებას; ბ) უზრუნველყოს ტანისა და თეძმის დაცულ ტერიტორიებზე ბუნებრივი ეკოსისტემების, ლანდშაფტების, ცხოველთა და მცენარეთა სამყაროს, განსაკუთრებით − გადაშენების საფრთხის წინაშე მყოფ გარეულ ცხოველთა და ველურ მცენარეთა გენოფონდის დაცვა, აღდგენა და ბიოლოგიური მრავალფეროვნების შენარჩუნება; გ) უზრუნველყოს მიწის, ტყის, წყლისა და სხვა ბუნებრივი რესურსების დაცვა, აღდგენა და რაციონალური გამოყენება, ეკოლოგიური განათლებისა და მეცნიერული კვლევა-ძიებისთვის ხელსაყრელი პირობების შექმნა, ისტორიული და კულტურული მემკვიდრეობის ძეგლების დაცვა და შენარჩუნება; დ) ხელი შეუწყოს ბუნებრივ გარემოსა და ადამიანის მიერ სახეცვლილ გარემოში რეკრეაციისთვის, ტურიზმისა და სოფლის მეურნეობის მდგრადი განვითარებისთვის ხელსაყრელი პირობების შექმნას; ე) ხელი შეუწყოს ხალხური შემოქმედების ტრადიციების შენარჩუნებასა და განვითარებას; ვ) ბუნების აქტიური დაცვითა და ტრადიციული ადგილობრივი საქმიანობების შენარჩუნებით ხელი შეუწყოს ბუნებისა და კულტურის ურთიერთქმედების დაბალანსებას. 3. ამ კანონით გათვალისწინებული ტანისა და თეძმის დაცული ტერიტორიების ფუნქციურ-გეგმარებითი ორგანიზება (ზონირება) და შესაბამის ზონებში დაშვებული საქმიანობები, „დაცული ტერიტორიების სისტემის შესახებ“ საქართველოს კანონის თანახმად, განისაზღვრება ტანისა და თეძმის დაცული ლანდშაფტის მენეჯმენტის გეგმით, ტანის აღკვეთილის მენეჯმენტის გეგმით ან დროებითი რეგულირების წესით.
მუხლი 3. ტანისა და თეძმის დაცული ტერიტორიები ტანისა და თეძმის დაცული ტერიტორიებია: ა) ტანისა და თეძმის დაცული ლანდშაფტი; ბ) ტანის აღკვეთილი.
მუხლი 4. ტანისა და თეძმის დაცული ლანდშაფტის მდებარეობა და ფართობი 1. ტანისა და თეძმის დაცული ლანდშაფტი მდებარეობს გორის მუნიციპალიტეტში და მოიცავს ტანისა და თეძმის ხეობებს. 2. ტანისა და თეძმის დაცული ლანდშაფტის საერთო ფართობია 21 864 ჰექტარი. იგი მოიცავს შემდეგ გეოგრაფიულ კოორდინატებს:
მუხლი 5. ტანისა და თეძმის დაცული ლანდშაფტის დაცვისა და გამოყენების რეჟიმი 1. ტანისა და თეძმის დაცული ლანდშაფტის დაცვისა და გამოყენების რეჟიმი განისაზღვრება საქართველოს კანონმდებლობის, მათ შორის, ტანისა და თეძმის დაცული ლანდშაფტის მენეჯმენტის გეგმის ან დროებითი რეგულირების წესის, შესაბამისად. 2. ტანისა და თეძმის დაცული ლანდშაფტის ტერიტორიაზე დასაშვებია გარემოსა და ისტორიული და კულტურული მემკვიდრეობის ძეგლების დაცვის სამუშაოების განხორციელება, მათი მოვლა-პატრონობა და აღდგენა, მანიპულაციური მეცნიერული კვლევის ჩატარება, ბუნებრივი ეკოსისტემებისა და მათ ფარგლებში ბუნებრივად გავრცელებული სახეობების კონსერვაცია და აღდგენა, რეკრეაციული, ტურისტული და საგანმანათლებლო საქმიანობების განხორციელება, ტანისა და თეძმის დაცული ლანდშაფტის მენეჯმენტის გეგმით ან დროებითი რეგულირების წესით განსაზღვრულ შემთხვევებში ბუნებრივი რესურსების გამოყენება, ტრადიციული სასოფლო-სამეურნეო საქმიანობების განხორციელება, მათ შორის, მხოლოდ ტანისა და თეძმის დაცული ლანდშაფტის ტერიტორიაზე სამშენებლო საქმიანობის განსახორციელებლად არაგანახლებადი ბუნებრივი რესურსით (ქვიშა-ხრეში) სარგებლობა, ტურიზმისა და ტანისა და თეძმის დაცული ლანდშაფტის განვითარებისთვის აუცილებელი ინფრასტრუქტურის მოწყობა, სახელმწიფოებრივი და საზოგადოებრივი მნიშვნელობის მქონე ინფრასტრუქტურული ობიექტების მშენებლობა, მათ შორის, ტანისა და თეძმის დაცული ლანდშაფტის მენეჯმენტის გეგმით ან დროებითი რეგულირების წესით განსაზღვრულ გამონაკლის შემთხვევებში ისეთი ენერგეტიკული ობიექტების მშენებლობა, რომლებიც არ ექვემდებარება საქართველოს კანონმდებლობით გათვალისწინებულ გარემოზე ზემოქმედების შეფასების პროცედურას, მხოლოდ ადგილობრივი მოსახლეობის საყოფაცხოვრებო პირობების გასაუმჯობესებლად და ტურიზმისა და რეგიონის განვითარების ხელშეწყობისთვის, ტანისა და თეძმის დაცული ლანდშაფტის ვიზუალური მხარის შეუცვლელად, საქართველოს საკანონმდებლო და კანონქვემდებარე ნორმატიული აქტებით, მათ შორის, ტანისა და თეძმის დაცული ლანდშაფტის მენეჯმენტის გეგმით ან დროებითი რეგულირების წესით, დაშვებული სხვა საქმიანობების განხორციელება.
მუხლი 6. ტანისა და თეძმის დაცული ლანდშაფტის ტერიტორიის მართვა 1. ტანისა და თეძმის დაცული ლანდშაფტის ტერიტორიის მართვა ხორციელდება „დაცული ტერიტორიების სისტემის შესახებ“ საქართველოს კანონის, საქართველოს ორგანული კანონის „ადგილობრივი თვითმმართველობის კოდექსი“, ტანისა და თეძმის დაცული ლანდშაფტის მენეჯმენტის გეგმის ან დროებითი რეგულირების წესის და საქართველოს სხვა საკანონმდებლო და კანონქვემდებარე ნორმატიული აქტების შესაბამისად. 2. ტანისა და თეძმის დაცული ლანდშაფტის ტერიტორიას მართავს გორის მუნიციპალიტეტი სახელმწიფოს მიერ დელეგირებული უფლებამოსილებების ფარგლებში, რისთვისაც გამოიყოფა შესაბამისი ფინანსური რესურსი. 3. ტანისა და თეძმის დაცული ლანდშაფტის ტერიტორიის მართვასთან დაკავშირებული ცალკეული საკითხების შესასწავლად და შესაბამისი დასკვნებისა და რეკომენდაციების მოსამზადებლად გორის მუნიციპალიტეტის საკრებულო საქართველოს კანონმდებლობის შესაბამისად ქმნის სათათბირო ორგანოს (საბჭოს). 4. სათათბირო ორგანოს (საბჭოს) შემადგენლობა, უფლებები, მოვალეობები და მის საქმიანობასთან დაკავშირებული სხვა, პროცედურული საკითხები განისაზღვრება სათათბირო ორგანოს (საბჭოს) დებულებით, რომელსაც ამტკიცებს გორის მუნიციპალიტეტის საკრებულო საქართველოს კანონმდებლობის შესაბამისად. 5. სათათბირო ორგანოს (საბჭოს) შემადგენლობაში შედის (შედიან) საქართველოს გარემოს დაცვისა და სოფლის მეურნეობის სამინისტროს შესაბამისი სტრუქტურული ერთეულის (ერთეულების) წარმომადგენელი (წარმომადგენლები) ბიოლოგიური მრავალფეროვნებისა და დაცული ტერიტორიების სფეროებში ერთიანი სახელმწიფო პოლიტიკის განხორციელების უზრუნველსაყოფად. სათათბირო ორგანოს (საბჭოს) გადაწყვეტილებები ვრცელდება ტანისა და თეძმის დაცული ლანდშაფტის ტერიტორიაზე. 6. სახელმწიფოს მიერ გორის მუნიციპალიტეტისთვის დელეგირებული უფლებამოსილებებია: ა) ტანისა და თეძმის დაცული ლანდშაფტის ტერიტორიის მოვლა-პატრონობა, შენარჩუნება, აღდგენა, დაცვა და ბუნებრივი რესურსებით სარგებლობის უზრუნველყოფა; ბ) საკუთარი კომპეტენციის ფარგლებში ტანისა და თეძმის დაცული ლანდშაფტის მენეჯმენტის გეგმის ან დროებითი რეგულირების წესის შემუშავება; გ) მონიტორინგისა და მეცნიერული კვლევის ორგანიზება, დაკვირვებით მიღებული მონაცემების დამუშავება, შენახვა და გავრცელება; დ) ტანისა და თეძმის დაცული ლანდშაფტის მდგომარეობის შესახებ მოხსენების რეგულარულად მომზადება; ე) ტანისა და თეძმის დაცული ლანდშაფტის ადმინისტრირება; ვ) ტანისა და თეძმის დაცული ლანდშაფტის ფუნქციონირებისთვის აუცილებელი სამშენებლო საქმიანობისა და კეთილმოწყობის სამუშაოების (ბილიკების, ზღუდეების, თავშესაფრების, გზამკვლევების მოწყობისა და სხვა) ორგანიზება; ზ) ტანისა და თეძმის დაცულ ლანდშაფტთან დაკავშირებული საერთაშორისო თანამშრომლობა და შესაბამის პროგრამებში მონაწილეობა; თ) სამთავრობო დაწესებულებებსა და ადგილობრივ და საერთაშორისო არასამთავრობო ორგანიზაციებთან თანამშრომლობა; ი) დაინტერესებულ საზოგადოებასთან თანამშრომლობა; კ) ტანისა და თეძმის დაცული ლანდშაფტის ტერიტორიაზე ტურისტული მომსახურების გაწევის ტარიფების განსაზღვრა; ლ) საქართველოს ადმინისტრაციულ სამართალდარღვევათა კოდექსის 239-ე მუხლის 44 ნაწილით განსაზღვრული კოდექსის მუხლებით გათვალისწინებული ადმინისტრაციული სამართალდარღვევების ჩადენისას ადმინისტრაციულ სამართალდარღვევათა ოქმების შედგენა; მ) საქართველოს საკანონმდებლო აქტებით გათვალისწინებული სხვა საქმიანობების განხორციელება. 7. ამ მუხლით გათვალისწინებული დელეგირებული უფლებამოსილებების განხორციელებაზე დარგობრივ ზედამხედველობას საქართველოს ორგანული კანონის „ადგილობრივი თვითმმართველობის კოდექსი“ შესაბამისად ახორციელებს საქართველოს გარემოს დაცვისა და სოფლის მეურნეობის სამინისტრო.
მუხლი 7. ტანის აღკვეთილის მდებარეობა და ფართობი 1. ტანის აღკვეთილი მდებარეობს გორის მუნიციპალიტეტში და მოიცავს ტანის ხეობას. 2. ტანის აღკვეთილის საერთო ფართობია 10 986 ჰექტარი. იგი მოიცავს შემდეგ გეოგრაფიულ კოორდინატებს:
მუხლი 8. ტანის აღკვეთილის ტერიტორიის მართვა ტანის აღკვეთილის ტერიტორიის მართვა ხორციელდება „დაცული ტერიტორიების სისტემის შესახებ“ საქართველოს კანონის, ტანის აღკვეთილის მენეჯმენტის გეგმის ან დროებითი რეგულირების წესის და საქართველოს სხვა საკანონმდებლო და კანონქვემდებარე ნორმატიული აქტების შესაბამისად.
მუხლი 9. ამ კანონის ამოქმედებამდე არსებული ურთიერთობების მოწესრიგება 1. ამ კანონის მე-7 მუხლით განსაზღვრულ ტერიტორიაზე ამ კანონის ამოქმედებამდე არსებული ქონებრივი ურთიერთობების ფარგლებში დასაშვებია უძრავ ნივთებზე უფლებათა რეესტრში უფლებების (საკუთრება, უზუფრუქტი, აღნაგობა, სერვიტუტი, იპოთეკა, ქირავნობა და სხვა) რეგისტრაცია. 2. ამ კანონის მოქმედება არ ვრცელდება ამ კანონის მე-4 და მე-7 მუხლებით განსაზღვრულ ტერიტორიებზე ამ კანონის ამოქმედებამდე არსებულ: ა) სასარგებლო წიაღისეულით სარგებლობასთან დაკავშირებულ ურთიერთობებზე, მათ შორის, ლიცენზიის გაცემის მიზნით დაწყებულ საქმის წარმოებაზე; ბ) „ნავთობისა და გაზის შესახებ“ საქართველოს კანონის შესაბამისად დადებული ხელშეკრულებით ან/და გაცემული ლიცენზიით განსაზღვრულ ურთიერთობებზე.
მუხლი 10. კანონის ამოქმედება ეს კანონი ამოქმედდეს 2023 წლის 1 იანვრიდან. |
თბილისი, 3 ნოემბერი 2022 წ. N2024-IXმს-Xმპ |
დოკუმენტის კომენტარები