,,განათლების განყოფილების ტიპიური დებულების დამტკიცების შესახებ” საქართველოს განათლების მინისტრის 2001 წლის 17 მაისის №111 ბრძანებაში ცვლილებების შეტანის შესახებ”

სახელმწიფო სარეგისტრაციო კოდი 430.210.000.11.101.005.663

საქართველოს განათლების მინისტრის

ბრძანება №8

2003 წლის 29 იანვარი

ქ. თბილისი

„განათლების განყოფილების ტიპური დებულების დამტკიცების შესახებ“ საქართველოს განათლების მინისტრის 2001 წლის 17 მაისის №111 ბრძანებაში ცვლილების შეტანის შესახებ

”ნორმატიული აქტების შესახებ” საქართველოს   1996 წლის 29 ოქტომბრის კანონის 36-ე მუხლის საფუძველზე, ვბრძანებ:

1. „განათლების განყოფილების ტიპიური დებულების დამტკიცების შესახებ“ საქართველოს განათლების მინისტრის 2001 წლის 17 მაისის №111 ბრძანებით დამტკიცებულ განათლების განყოფილების ტიპური დებულების მე-2 მუხლი ჩამოყალიბდეს შემდეგი რედაქციით:

    „მუხლი 2. განათლების განყოფილების უფლებამოსილება

განათლების განყოფილება:

ა) აფხაზეთისა და აჭარის ავტონომიური რესპუბლიკების განათლების სამინისტროს დასანიშნად წარუდგენს სახელმწიფო საშუალო ზოგადსაგანმანათლებლო დაწესებულების დირექტორის კანდიდატურას;

ბ) სასკოლო ოლქს დასანიშნად წარუდგენს სახელმწიფო საბაზო საგანმანათლებლო დაწესებულების დირექტორის კანდიდატურას;

გ) ნიშნავს სახელმწიფო სკოლამდელი და დაწყებითი საგანმანათლებლო დაწესებულების დირექტორს;

დ) ასრულებს შვილად აყვანის, მეურვეობისა და მზრუნველობასთან დაკავშირებით საქართველოს კანონით დადგენილ ფუნქციებს;

ე) სასწავლო-სააღმზრდელო დაწესებულებებისაგან მოპოვებული ინფორმციის საფუძველზე ქმნის საინფორმაციო ბანკს;

ვ) აანალიზებს საგანმანათლებლო და სააღმზრდელო დაწესებულებებში სახელმწიფო პროგრამებისა და სტანდარტების შესრულებას, შეიმუშავებს კონკრეტულ წინადადებებსა და რეკომენდაციებს სამინისტროში წარსადგენად;

ზ) უზრუნველყოფს საგანმანათლებლო და სააღმზრდელო დაწესებულებების პედაგოგთა მონაწილეობას ინოვაციების დანერგვის პროცესში;

თ) ატარებს ღონისძიებებს მოზარდი თაობის სულიერი და ფიზიკური აღზრდის ჰარმონიულობის უზრუნველსაყოფად, ხელს უწყობს სხვადასხვა ტიპის დამატებითი განათლების დაწესებულებების ქსელის მუშაობას, განვითარებასა და გაფართოებას;

ი) ხელს უწყობს სპეციალური და კორექციული ხასიათის საგანმანათლებლო დაწესებულებების სრულყოფის ფუნქციონირებას;

კ) ზედამხედველობას უწევს საგანმანათლებლო და სააღმზრდელო დაწესებულებების მიერ მოქმედი კანონმდებლობის შესრულებას;

ლ) დადგენილი წესით ახორციელებს სტატისტიკური ანგარიშების შეგროვებას, დამუშავებასა და ანალიზს, ყოველწიურად განიხილავს საგანმანათლებლო და სააღმზრდელო დაწესებულებების ქსელს, კონტინგენტსა და საშტატო განრიგს;

მ) თავისი კომპეტენციის ფარგლებში ხელს უწყობს რეგიონალური და საერთაშორისო ურთიერთობების განვითარებას განათლების სფეროში;

ნ) ატარებს სარაიონო (საქალაქო) ღონისძიებებს;

ო) ქმნის და ხელმძღვანელობს მედიკო-პედაგოგიურ კომისიას;

პ) ყოველი სასწავლო წლის ბოლოს განათლების განყოფილება მის მიერ გაწეული საქმიანობის შესახებ ანგარიშს წარუდგენს საქართველოს განათლების სამინისტროს და შესაბამის ადგილობრივ თვითმმართველობის (მმართველობის) ორგანოებს.

2. ბრძანება ძალაში შევიდეს გამოქვეყნებისთანავე.

ა. კარტოზია