„დავების განხილვის წესების დამტკიცების შესახებ“ საქართველოს ენერგეტიკისა და წყალმომარაგების მარეგულირებელი ეროვნული კომისიის 2020 წლის 4 ივნისის №24 დადგენილებაში ცვლილების შეტანის შესახებ

1. მე-3 მუხლის პირველი პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) სადავო საკითხი – დაინტერესებულ პირებს შორის წარმოშობილი დავა, რომლის გადაწყვეტა „ენერგეტიკისა და წყალმომარაგების შესახებ“ საქართველოს კანონის, საქართველოს ადმინისტრაციულ სამართალდარღვევათა კოდექსის ან/და კომისიის მიერ დამტკიცებული ნორმატიული ადმინისტრაციულ-სამართლებრივი აქტების შესაბამისად, განეკუთვნება კომისიის კომპეტენციას;“.

2. მე-11 მუხლი ჩამოყალიბდეს შემდეგი რედაქციით:

„მუხლი 11. დადგენილების/დარიცხვის შეჩერება და მიწოდების შეწყვეტის დაუშვებლობა

1. კომისიაში ადმინისტრაციული წარმოების დაწყებიდან ჩერდება საწარმოს გასაჩივრებული დადგენილების ან/და დარიცხვის მოქმედება კომისიის მიერ შესაბამისი სადავო საკითხის  საბოლოო გადაწყვეტამდე.

2. კომისიაში ადმინისტრაციული წარმოების დაწყების თაობაზე წერილობითი ინფორმაციის საწარმოს მიერ მიღების (მათ შორის, ელექტრონული ფორმით) მომენტიდან  კომისიის მიერ მომხმარებელსა და საწარმოს შორის სადავო საკითხის საბოლოო გადაწყვეტამდე დაუშვებელია ამ საწარმოს მიერ ან მისი მოთხოვნით მომხმარებლისთვის მიწოდების შეწყვეტა, ხოლო თუ მიწოდება შეწყვეტილია, იგი უნდა აღდგეს არაუგვიანეს ერთი დღის ვადაში.

3. ამ მუხლის მე-2 პუნქტით გათვალისწინებული შეზღუდვა არ ვრცელდება მიწოდების შეწყვეტის ისეთ შემთხვევაზე, რომლის საფუძველია ის დავალიანება, რომელიც არ წარმოადგენს დავის საგანს და რომელიც წარმოიშვა ან/და რომლის გადახდის ვადა დადგა კომისიაში სადავო საკითხის განხილვასთან დაკავშირებული ადმინისტრაციული წარმოების დაწყების შემდგომ.“.

2. მე-18 მუხლის შემდეგ დაემატოს შემდეგი შინაარსის 18¹ მუხლი:

„მუხლი 18¹. კომისიის სხდომის დისტანციურად ჩატარება

1. კომისიის სხდომა, შესაძლებელია, ჩატარდეს დისტანციურად, ვიდეოკონფერენციის მეშვეობით, კომისიის 2021 წლის 13 მაისის №9 დადგენილებით დამტკიცებული „საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ ადმინისტრაციული წარმოების განხორციელების დებულების“ 20¹ მუხლით გათვალისწინებული მოთხოვნების დაცვით.

2. იმ შემთხვევაში, თუ დაინტერესებულ პირს არ აქვს ტექნიკური შესაძლებლობა მონაწილეობა მიიღოს კომისიის დისტანციურად ჩატარებულ სხდომაში, შესაბამისი მოთხოვნის საფუძველზე კომისია უზრუნველყოფს სხდომაში მის მონაწილეობას კომისიის ადმინისტრაციული შენობიდან.“.