„გადასახადის გადამხდელთა პირადი აღრიცხვის ბარათების წარმოების წესის შესახებ“ მეთოდური მითითების დამტკიცების თაობაზე“ შემოსავლების სამსახურის უფროსის 2016 წლის 18 მაისის №13446 ბრძანებაში ცვლილების შეტანის შესახებ

საქართველოს ზოგადი ადმინისტრაციული კოდექსის 63-ე მუხლის და „საჯარო სამართლის იურიდიული პირის – შემოსავლების სამსახურის დებულების დამტკიცების შესახებ“ საქართველოს ფინანსთა მინისტრის 2011 წლის 23 მაისის №303 ბრძანებით დამტკიცებული დებულების მე-3 მუხლის მე-2 პუნქტის „უ“ ქვეპუნქტის საფუძველზე, ვბრძანებ:
1. „გადასახადის გადამხდელთა პირადი აღრიცხვის ბარათების წარმოების წესის შესახებ“ მეთოდური მითითების დამტკიცების თაობაზე“ შემოსავლების სამსახურის უფროსის 2016 წლის 18 მაისის №13446 ბრძანებით დამტკიცებული მეთოდური მითითების:
ა) მე-4 მუხლის მე-8 პუნქტის „დ“ ქვეპუნქტს დაემატოს შემდეგი შინაარსის „დ.ა“ და „დ.ბ“ ქვეპუნქტები:
„დ.ა) გადასახადის გადამხდელს საგადასახადო შეთანხმების აქტის მიხედვით, ვალდებულების შესრულებისთვის შესაძლებელია განესაზღვროს რამდენიმე სავადო თარიღი. ამ შემთხვევაში, თითოეული სავადო თარიღის მიხედვით შეთანხმების აქტით განსაზღვრული ვალდებულების შესრულებისას გადახდილი თანხა, შესაბამისი სავადო თარიღით, აისახება პირადი აღრიცხვის ძირითად ბარათზე ჯარიმებში;
დ.ბ) გადასახადის გადამხდელის მიერ საგადასახადო შეთანხმებით გათვალისწინებული ვალდებულების სრულად შესრულების შემდეგ დროებითი აღრიცხვის ბარათზე უკუოპერაციით ნულდება პირადი აღრიცხვის ძირითადი ბარათიდან გადმოტანილი აღიარებული საგადასახადო დავალიანების/დავალიანების ნაწილის ან/და მოსაკრებლების თანხა.“;
ბ) მე-4 მუხლის მე-8 პუნქტის „ე“ ქვეპუნქტი ჩამოყალიბდეს შემდეგი რედაქციით:
„ე) გადასახადის გადამხდელის მიერ საგადასახადო შეთანხმებით გათვალისწინებული ვალდებულების დადგენილ ვადაში შეუსრულებლობის შემთხვევაში საგადასახადო შეთანხმება გაუქმებულად ითვლება, შესაბამისად, პირადი აღრიცხვის ძირითად ბარათზე საგადასახადო დავალიანება/დავალიანების ნაწილის ან/და მოსაკრებლის თანხა ექვემდებარება აღდგენას სრული ოდენობით, რომლის გადმოტანა განხორციელდება დროებითი აღრიცხვის ბარათიდან უკუოპერაციებით შესაბამისი გადასახადის/მოსაკრებლის ან/და სანქციის სახეებისა და სავადოების მიხედვით. ხოლო, „დ.ა“ ქვეპუნქტით განსაზღვრულ შემთხვევაში, პირადი აღრიცხვის ძირითად ბარათზე უკუოპერაციით ნულდება შესაბამისი სავადო თარიღის მიხდვით ჯარიმებში ასახული თანხები. ამასთან, გადასახადის გადამხდელს ჯარიმებში დაეკისრება ჯარიმა გადაუხდელი თანხის 10 პროცენტის ოდენობით.“;
გ) მე-4 მუხლის მე-8 პუნქტის „ვ“ ქვეპუნქტის მე-3 მაგალითს დაემატოს 3¹ მაგალითი შემდეგი რედაქციით:
„მაგალითი 3¹:
შპს „ელიტას“ გადასახადების ან/და სანქციების შემცირების მიზნით განცხადების შეტანის მომენტისათვის 2022 წლის 1 იანვრის მდგომარეობით პირადი აღრიცხვის ბარათზე ერიცხება აღიარებული საგადასახადო დავალიანება 500 000 ლარის ოდენობით. მათ შორის: ძირითადი გადასახადი – 400 000 ლარი, ჯარიმა – 50 00 ლარი, საურავი – 50 000 ლარი. საგადასახადო შეთანხმების გაფორმების გადაწყვეტილების მიღების შემდეგ შემოსავლების სამსახურსა და გადასახადის გადამხდელს შორის 1 თებერვალს გაფორმდა საგადასახადო შეთანხმების აქტი, რომლის თანახმად გადასახადის გადამხდელს გადასახდელად განესაზღვრა 100 000 ლარი, ხოლო საგადასახადო ვალდებულების შესრულების ვადა განისაზღვრა 2022 წლის – 1 მარტამდე – 25000 ლარი; 1 აპრილამდე – 25 000 ლარი; 1 მაისამდე – 25000 ლარი; 1 ივნისამდე – 25000 ლარი;

გადასახადის გადამხდელის პირადი აღრიცხვის ბარათზე გატარდება შემდეგი სახის ოპერაციები:
დროებითი აღრიცხვის ბარათზე 01.02.2022 წლის (01.01.2022 წლის სავადო თარიღით) დაერიცხება 500 000 ლარი; ძირითადი აღრიცხვის ბარათზე 01.02.2022 წლის (01.01.2022 წლის სავადო თარიღით) შემცირდება – 500 000 ლარი (400 000 ლარი ძირითადი გადასახადი + 50 000 ლარი ჯარიმა + 50 000 ლარი საურავი), 28.02.2022 წლის სავადო თარიღით დაერიცხება ჯარიმა: 25000 ლარი (გადახდის შემთხვევაში), 31.03.2022 წლის სავადო თარიღით დაერიცხება ჯარიმა: 25000 ლარი (გადახდის შემთხვევაში), 30.04.2022 წლის სავადო თარიღით დაერიცხება ჯარიმა: 25000 ლარი (გადახდის შემთხვევაში), 31.05.2022 წლის სავადო თარიღით დაერიცხება ჯარიმა: 25000 ლარი (გადახდის შემთხვევაში).
მას შემდეგ, რაც მოხდება საგადასახადო შეთანხმებით გათვალისწინებული ვალდებულების შესრულება, დროებითი აღრიცხვის ბარათზე მოხდება 500 000 ლარის (400 000 ლარი ძირითადი გადასახადი + 50 000 ლარი ჯარიმა + 50 000 საურავი) ნაშთის განულება.“.
2. ეს ბრძანება ამოქმედდეს ხელმოწერისთანავე.
სამსახურის უფროსის მოვალეობის შემსრულებელი    პაატა კილაძე.