„საქართველოს ბაზარზე ფარმაცევტული პროდუქტის აღიარებითი რეჟიმით სახელმწიფო რეგისტრაციისას, ასევე, საქართველოს ფარმაცევტულ ბაზარზე უკვე რეგისტრირებული ფარმაცევტული პროდუქტის განსხვავებული შეფუთვა-მარკირებით დაშვებისას შესაბამისი სხვა ქვეყნის ან სახელმწიფოთაშორისი ფარმაცევტული პროდუქტების მარეგულირებელი სახელმწიფო ორგანოს მიერ მის კონტროლს დაქვემდებარებულ ბაზრებზე დაშვების ნამდვილობის ფაქტის გადამოწმების წესისა და პირობების დადგენის შესახებ“ საქართველოს შრომის, ჯანმრთელობისა და სოციალური დაცვის მინისტრის 2009 წლის 23 ოქტომბრის N344/ნ ბრძანებაში ცვლილების შეტანის შესახებ

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად, ვბრძანებ:

1. 9² პუნქტი ჩამოყალიბდეს შემდეგი რედაქციით:

„9². ამ წესის მე-9 პუნქტით გათვალისწინებულ შემთხვევაში, დაინტერესებულმა პირმა სააგენტოს უნდა წარუდგინოს დოკუმენტები, რომლებიც დაადასტურებს, რომ პროდუქტი, რომელიც შემოდის განსხვავებული შეფუთვა-მარკირებით არის საქართველოში უკვე დაშვებული ფარმაცევტული პროდუქტის იდენტური და მისგან განსხვავდება მხოლოდ შეფუთვაში ფარმაცევტული პროდუქტის რაოდენობით ან/და მწარმოებლით ან/და წარმოების ადგილის მიხედვით, ხოლო პროდუქტის სავაჭრო ლიცენზიის მფლობელი არის ერთი და იგივე პირი ან მასთან აფილირებული კომპანია, ასევე, განსხვავდება სავაჭრო დასახელებით, ხოლო მწარმოებელი და სავაჭრო ლიცენზიის მფლობელი არის  იგივე პირი.“.

2. 9⁶ პუნქტს დაემატოს  შემდეგი შინაარსის „ვ“ ქვეპუნქტი:

„ვ) დოკუმენტი, რომელიც დაადასტურებს აღიარებულ ქვეყანაში ფარმაცევტული პროდუქტის სავაჭრო ლიცენზიის მფლობელი კომპანიის აფილირებას რეგისტრირებულ სავაჭრო ლიცენზიის მფლობელთან/ფარმაცევტული პროდუქტის მფლობელთან. აღნიშნული შეიძლება წარმოდგენილ იქნეს ასლის სახით (დამოწმებული უფლებამოსილი პირის მიერ), ან ფარმაცევტული პროდუქტის სავაჭრო ლიცენზიის მფლობელის/ფარმაცევტული პროდუქტის მფლობელის ოფიციალური ვებ-გვერდიდან ამონარიდის სახით, მოპოვების წყაროს მითითებით.“.