„ახალი კორონავირუსის (COVID-19) გავრცელების პრევენციის მიზნით საჯარო სამართლის იურიდიული პირის – საჯარო რეესტრის ეროვნული სააგენტოს საქმიანობის ადმინისტრირებისა და მის მიერ პირთა მომსახურების კანონმდებლობით დადგენილისგან განსხვავებული დროებითი წესების განსაზღვრის შესახებ“ საქართველოს იუსტიციის მინისტრის 2020 წლის 15 ივლისის №580 ბრძანებაში ცვლილების შეტანის თაობაზე

1. მე-2 მუხლს დაემატოს შემდეგი შინაარსის 2¹ პუნქტი:

„2¹. ამ მუხლის მე-2 პუნქტის მოქმედება არ ვრცელდება ახალი კორონავირუსის (COVID-19) საწინააღმდეგო ვაქცინით სრულად აცრილი პირების მიერ 2021 წლის 1 სექტემბრიდან 2021 წლის 1 ნოემბრამდე პერიოდში ინდივიდუალური მეწარმის რეგისტრაციის, რეგისტრირებულ მონაცემებში ცვლილებებისა და მათი შეწყვეტის, აგრეთვე უძრავ ნივთებზე უფლებათა რეესტრიდან ამონაწერის 1 სამუშაო დღის ვადაში მომზადების თაობაზე მოთხოვნის წარდგენის შემთხვევაზე.“.

2. ბრძანებას დაემატოს შემდეგი შინაარსის 3² მუხლი:

„მუხლი 3²

1. ახალი კორონავირუსის (COVID-19) საწინააღმდეგო ვაქცინით სრულად აცრილი საქართველოს მოქალაქეები და საქართველოში სტატუსის მქონე მოქალაქეობის არმქონე პირები 2021 წლის 1 ნოემბრამდე ერთჯერადად თავისუფლდებიან სააგენტოს მიერ გაწეული სარეგისტრაციო მომსახურებისათვის/ინფორმაციის ხელმისაწვდომობისათვის საქართველოს კანონმდებლობით დაწესებული საფასურების გადახდისაგან, თუ მოთხოვნილია:

ა) ინდივიდუალური მეწარმის რეგისტრაცია, რეგისტრირებულ მონაცემებში ცვლილებებისა და მათი შეწყვეტის 1 სამუშაო დღის ვადაში რეგისტრაცია (მათ შორის, მოქალაქის პორტალის – my.gov.ge-ს მეშვეობით მოთხოვნის შემთხვევაში);

ბ) უძრავ ნივთებზე უფლებათა რეესტრიდან ამონაწერის 1 სამუშაო დღის ვადაში მომზადება, გარდა მოთხოვნის ელექტრონულად, ინტერნეტის საშუალებით განხორციელებისა.

2. ამ მუხლის პირველი პუნქტით გათვალისწინებულმა პირებმა მოთხოვნასთან ერთად უნდა წარადგინონ ახალი კორონავირუსის (COVID-19) საწინააღმდეგო ვაქცინით სრულად აცრის დამადასტურებელი დოკუმენტი. აღნიშნული დოკუმენტის წარდგენა საჭირო არ არის, თუ ახალი კორონავირუსის (COVID-19) საწინააღმდეგო ვაქცინით სრულად აცრის შესახებ ინფორმაციის გადამოწმება შესაძლებელია შესაბამისი ელექტრონული საშუალებით.“.