“სპეციალური შემოსავლების ანგარიშზე შემოსული თანხების განაწილების წესის დამტკიცების შესახებ”

სახელმწიფო   სარეგისტრაციო კოდი 470.230.000.11.009.004.776

საქართველოს შრომის, ჯანმრთელობისა და სოციალური დაცვის

მინისტრის ბრძანება №205/ნ

2001 წლის 21 მაისი

ქ. თბილისი

სპეციალური შემოსავლების ანგარიშზე შემოსული თანხების განაწილების წესის დამტკიცების შესახებ

საქართველოს პრეზიდენტის “საქართველოს შრომის, ჯანმრთელობისა და სოციალური დაცვის სისტემაში ჩრდილოვანი ეკონომიკის მასშტაბის შემცირებისა და კორუფციასთან ბრძოლის პირველი რიგის ღონისძიებათა შესახებ” 2001 წლის 23 თებერვლის №69 ბრძანებულების მე-10 პუნქტის შესაბამისად ვბრძანებ:

1. დამტკიცდეს “საქართველოს შრომის, ჯანმრთელობისა და სოციალური დაცვის სამინისტროს სპეციალური შემოსავლების ანგარიშზე შემოსული თანხების განაწილების წესი” დანართის თანახმად.

2. ეს ბრძანება ამოქმედდეს გამოქვეყნებისთანავე.

ა. ჯორბენაძე

საქართველოს შრომის, ჯანმრთელობისა და სოციალური დაცვის სამინისტროს სპეციალური შემოსავლებისა და ხარჯების განაწილების წესი

    მუხლი 1

1. საქართველოს შრომის, ჯანმრთელობისა და სოციალური დაცვის სამინისტროს მატერიალურ-ტექნიკური ბაზის გაფართოებისა და თანამშრომელთა სტიმულირების ფონდი (შემდგომში – ფონდი) იქმნება:

სამედიცინო და ფარმაცევტული ორგანიზაციების ლიცენზირებიდან, მედიკამენტების იმპორტ-ექსპორტის ერთჯერადი ლიცენზირებიდან, სამკურნალო საშუალებების რეგისტრაციიდან მიღებული მოსაკრებლებიდან, ექსპერტიზის, ხარისხის კონტროლის, წამლის ინფორმაცია – რეკლამის კონტროლისაგან და სხვა საქმიანობით მიღებული შემოსავლებიდან.

2. აღნიშნული თანხები ჩაირიცხება ხაზინაში საქართველოს შრომის, ჯანმრთელობისა და სოციალური დაცვის სამინისტროს სპეციალურ ანგარიშზე.

    მუხლი 2

1. საქართველოს შრომის, ჯანმრთელობისა და სოციალური დაცვის სამინისტროს სპეციალურ ანგარიშზე ჩარიცხული თანხების 30% მიმართულია ბიუჯეტის შესავსებად, ხოლო დარჩენილი თანხა ნაწილდება შემდეგნაირად:

ა) 50% თანამშრომელთა მატერიალურ სტიმულირების ფონდში, მმართველობის ანარიცხების ჩათვლით;

ბ) 40% მატერიალურ-ტექნიკური ბაზის განმტკიცების ფონდში;

გ) 10% ირიცხება მივლინებისა და სხვა ხარჯებისათვის.

    მუხლი 3

1. თანამშრომელთა   მატერიალური    სტიმულირების    ფონდში  ჩარიცხული თანხა    გამოიყენება     სამინისტროს  ცენტრალური        აპარატის, საქვეუწყებო დაწესებულებების, ფარმაკოლოგიური, ფარმაკოპეის კომიტეტების,    მუშაკთა     სოციალური    და    მატერიალური   პირობების გაუმჯობესებისათვის, პრემირების, მატერიალური დახმარებისა და წახალისებისათვის, აგრეთვე ხელშეკრულებით მოწვეული სპეციალისტების შრომის ასანაზღაურებლად.

2. სამინისტროს მატერიალურ-ტექნიკური ბაზის განმტკიცების ფონდში ჩარიცხული თანხები გამოიყენება: სამინისტროს ცენტრალური აპარატის, ფარმაკოლოგიური, ფარმაკოპეის კომიტეტების, საქვეუწყებო დაწესებულებების, საკანცელარიო-სამეურნეო ხარჯებისათვის, ოფისის შენახვისათვის, წარმომადგენლობითი ხარჯებისათვის, კომუნალური მომსახურეობისათვის, მანქანა-მოწყობილობებისათვის, კომპიუტერების, გამოთვლითი ტექნიკის ინვენტარის შეძენისათვის, შენობა-ნაგებობების კაპიტალური შეკეთებისა და სხვა ღონისძიებებისათვის.

    მუხლი 4

მივლინების ხარჯებისათვის ჩარიცხული თანხა გამოიყენება მივლინებისა და სხვა ღონისძიებებისათვის მინისტრის მითითებით.

    მუხლი 5

საქართველოს შრომის, ჯანმრთელობისა და სოციალური დაცვის სამინისტროს საქვეუწყებო დაწესებულებები ფარმაკოლოგიური, ფარმაკოპეის კომიტეტების, საქვეუწყებო დაწესებულებები ახალი წლის დადგომისას სამინისტროში დასამტკიცებლად წარმოადგენენ სპეციალურ შემოსავლების ანგარიშზე შემოსული თანხების ხარჯვის გეგმებს, სადაც გათვალისწინებული იქნება თანხები თანამშრომელთა მატერიალური წახალისებისათვის და მატერიალურ-ტექნიკური ბაზის განმტკიცებისათვის.

    მუხლი 6

მინისტრის ბრძანებით იქმნება სამინისტროს სპეციალური შემოსავლების ანგარიშზე შემოსული თანხების გამანაწილებელი მუდმივმოქმედი კომისია, რომელიც თავის მუშაობას წარმართავს ამ დებულების შესაბამისად.

    მუხლი 7

სამინისტროს თანამშრომლების დისციპლინური სასჯელის მოქმედების პერიოდში პრემია არ მიეცემათ.

    მუხლი 8

სამინისტროს სისტემაში არსებულ ორგანიზაციათა ეკონომიკურ საქმიანობიდან მიღებული სპეციალური შემოსავლების განკარგვა და განაწილება ხორციელდება აღნიშნულ ორგანიზაციათა უფლებამოსილების ფარგლებში კანონმდებლობით დადგენილი წესის შესაბამისად.

    მუხლი 9

სამინისტროს სპეციალური შემოსავლების ანგარიშზე ჩარიცხული თანხების ნაშთი წლის ბოლოსათვის რჩება სამინისტროს განკარგულებაში.