„საქართველოს მოქალაქეთა და საქართველოში მცხოვრებ უცხოელთა რეგისტრაციისა და რეგისტრაციიდან მოხსნის, პირადობის (ბინადრობის) მოწმობის, პასპორტის, სამგზავრო პასპორტისა და სამგზავრო დოკუმენტის გაცემის წესის დამტკიცების შესახებ“ საქართველოს იუსტიციის მინისტრის 2011 წლის 27 ივლისის №98 ბრძანებაში ცვლილების შეტანის თაობაზე

1. წესს დაემატოს შემდეგი შინაარსის 31³ და 31 ⁴ მუხლები:

„მუხლი 31³. პირადობის (ბინადრობის) ელექტრონული მოწმობის გაცემა გადამოწმების გარეშე (უვადოდ) დადგენილი შესაძლებლობის შეზღუდვის სტატუსის შესახებ ინფორმაციის შემცველობით

1. თუ პირი პირადობის (ბინადრობის) ელექტრონული მოწმობის გაცემისას წარადგენს შესაბამის დოკუმენტს, რომლითაც დასტურდება, რომ აღნიშნული მოწმობის გაცემის შესახებ გადაწყვეტილების მიღების მომენტში შესაძლებლობის შეზღუდვის სტატუსი დადგენილი აქვს გადამოწმების გარეშე (უვადოდ) და არ აქვს შეჩერებული/შეწყვეტილი აღნიშნული სტატუსი, მასზე გასაცემ პირადობის (ბინადრობის) ელექტრონულ მოწმობაზე, მოთხოვნის შემთხვევაში, დაიტანება ინფორმაცია გადამოწმების გარეშე (უვადოდ) დადგენილი შესაძლებლობის შეზღუდვის  სტატუსის შესახებ შესაბამისი კატეგორიის გათვალისწინებით (აღნიშვნა – „შშმ პირი. მკვეთრად გამოხატული“, „შშმ პირი. მნიშვნელოვნად გამოხატული“ ან „შშმ პირი. ზომიერად გამოხატული“ და პირადობის (ბინადრობის) ელექტრონული მოწმობის უკონტაქტო მიკროსქემაზე შეზღუდული შესაძლებლობის მქონე პირის სტატუსის შესახებ ინფორმაცია.

2. ამ მუხლის პირველი პუნქტით გათვალისწინებულ დოკუმენტს წარმოადგენს:

ა) 2007 წლის 1 იანვრამდე – საჯარო სამართლის იურიდიული პირის – სოციალური მომსახურების სააგენტოს მიერ მუდმივი სტატუსის მქონე შეზღუდული შესაძლებლობის მქონე პირის მიმართ ამავე საფუძვლით სახელმწიფო გასაცემლის (სახელმწიფო კომპენსაცია ან სოციალური პაკეტი) მიღების შესახებ გაცემული დოკუმენტი;

ბ) 2007 წლის 1 იანვრის შემდეგ – საქართველოს შრომის, ჯანმრთელობისა და სოციალური დაცვის სამინისტროს/საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სისტემაში შემავალი/მმართველობის სფეროში მოქმედი სამედიცინო საქმიანობის რეგულირების უფლებამოსილების მქონე დაწესებულების ხელმძღვანელის სამართლებრივი აქტით განსაზღვრული შესაძლებლობის შეზღუდვის სტატუსის დადგენის უფლებამოსილების მქონე სამედიცინო დაწესებულების მიერ კანონმდებლობით დადგენილი წესით გაცემული დოკუმენტი – სამედიცინო-სოციალური ექსპერტიზის აქტის ამონაწერი.

3. პირადობის (ბინადრობის) ელექტრონული მოწმობის უკონტაქტო მიკროსქემაზე გადამოწმების გარეშე (უვადოდ) დადგენილი შესაძლებლობის შეზღუდვის  შესახებ ინფორმაცია დაიტანება პირადობის (ბინადრობის) ელექტრონული მოწმობის მოქმედების ვადით.

მუხლი 31⁴. გაცემულ პირადობის (ბინადრობის) ელექტრონულ მოწმობაზე გადამოწმების გარეშე (უვადოდ) დადგენილი შესაძლებლობის შეზღუდვის სტატუსის შესახებ ინფორმაციის დატანა

1. გაცემულ პირადობის (ბინადრობის) ელექტრონულ მოწმობაზე გადამოწმების გარეშე (უვადოდ) დადგენილი შეზღუდული შესაძლებლობის სტატუსის მქონე პირის შესახებ ინფორმაცია დაიტანება, თუ პირადობის (ბინადრობის) ელექტრონული მოწმობა არ შეიცავს აღნიშნულ მონაცემებს და თუ მისი მფლობელი არის შეზღუდული შესაძლებლობის მქონე პირი, რომელსაც შესაძლებლობის შეზღუდვა დადგენილი აქვს გადამოწმების გარეშე (უვადოდ) და რომელსაც არ აქვს შეჩერებული/შეწყვეტილი აღნიშნული სტატუსი.

2. გაცემულ პირადობის (ბინადრობის) ელექტრონულ მოწმობაზე გადამოწმების გარეშე (უვადოდ) დადგენილი შეზღუდული შესაძლებლობის სტატუსის მქონე პირის  შესახებ ინფორმაციის დატანის მოთხოვნით განმცხადებელი უფლებამოსილ ორგანოს მიმართავს ამ წესის 28-ე მუხლით დადგენილი წესით.

3. გაცემულ პირადობის (ბინადრობის) ელექტრონულ მოწმობაზე გადამოწმების გარეშე (უვადოდ) დადგენილი შეზღუდული შესაძლებლობის მქონე პირის სტატუსის შესახებ ინფორმაციის დატანის მიზნით განმცხადებელმა უფლებამოსილ ორგანოს უნდა წარუდგინოს შესაბამისი პირადობის (ბინადრობის) ელექტრონული მოწმობა და ამ წესის 31³ მუხლის მე-2 პუნქტით გათვალისწინებული შესაბამისი დოკუმენტი, რომლითაც დასტურდება, რომ იგი არის  შეზღუდული შესაძლებლობის მქონე პირი, რომელსაც შესაძლებლობის შეზღუდვა დადგენილი აქვს გადამოწმების გარეშე (უვადოდ).

4. დაინტერესებულ პირს პირადობის (ბინადრობის) ელექტრონულ მოწმობაზე შეზღუდული შესაძლებლობის მქონე პირის სტატუსის შესახებ ინფორმაციის დატანაზე უარი უნდა ეთქვას, თუ:

ა) განმცხადებელი არ წარადგენს ამ წესის 31³ მუხლის მე-2 პუნქტით გათვალისწინებულ შესაბამის დოკუმენტს, რომლითაც დასტურდება, რომ იგი არის შეზღუდული შესაძლებლობის მქონე პირი, რომელსაც შესაძლებლობის შეზღუდვა დადგენილი აქვს გადამოწმების გარეშე (უვადოდ);

ბ) უფლებამოსილ ორგანოში არ იძებნება ინფორმაცია პირის გადამოწმების გარეშე (უვადოდ) დადგენილი შეზღუდული შესაძლებლობის სტატუსის შესახებ;

გ) პირს შეჩერებული/შეწყვეტილი აქვს გადამოწმების გარეშე (უვადოდ) დადგენილი შეზღუდული შესაძლებლობის მქონე პირის სტატუსი;

დ) შეჩერებულია პირადობის (ბინადრობის) ელექტრონული მოწმობის მოქმედება;

ე) დაზიანებულია პირადობის (ბინადრობის) ელექტრონული მოწმობის უკონტაქტო მიკროსქემა და შეუძლებელია მასზე ინფორმაციის დატანა.

5. ამ მუხლის შესაბამისად პერსონალიზებული პირადობის (ბინადრობის) ელექტრონული მოწმობა დაინტერესებულ პირს გადაეცემა ამ წესის 34-ე მუხლით დადგენილი წესით.

6. პირადობის (ბინადრობის) ელექტრონული მოწმობის უკონტაქტო მიკროსქემაზე გადამოწმების გარეშე (უვადოდ) დადგენილი  შეზღუდული შესაძლებლობის მქონე პირის სტატუსის შესახებ ინფორმაცია დაიტანება პირადობის (ბინადრობის) ელექტრონული მოწმობის მოქმედების ვადით.

7. სააგენტო პირადობის (ბინადრობის) ელექტრონულ მოწმობაზე შეზღუდული შესაძლებლობის მქონე პირის შესაბამისი სტატუსის აღნიშვნისა და პირადობის (ბინადრობის) ელექტრონული მოწმობის უკონტაქტო მიკროსქემაზე გადამოწმების გარეშე (უვადოდ) დადგენილი შეზღუდული შესაძლებლობის მქონე პირის შესახებ ინფორმაციის დატანას ახორციელებს შესაბამისი განაცხადის წარდგენიდან 7 სამუშაო დღის ვადაში.“.

2. 36-ე მუხლის მე-5 პუნქტი ჩამოყალიბდეს შემდეგი რედაქციით:

„5. სტუდენტისა და/ან გადამოწმების გარეშე (უვადოდ) დადგენილი შეზღუდული შესაძლებლობის მქონე პირის სტატუსის შეჩერება/შეწყვეტა არ იწვევს მისი პირადობის (ბინადრობის) ელექტრონული მოწმობის მოქმედების შეჩერებას.“.

3. 37-ე მუხლის მე-3 პუნქტი ჩამოყალიბდეს შემდეგი რედაქციით:

„3. სტუდენტის და/ან გადამოწმების გარეშე (უვადოდ) დადგენილი შეზღუდული შესაძლებლობის მქონე პირის სტატუსის შეჩერება/შეწყვეტა არ იწვევს მისი პირადობის (ბინადრობის) ელექტრონული მოწმობის გაუქმებას.“.