“თორმეტ კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენებების ჩამონათვალის დამტკიცების შესახებ” საქართველოს ჯანმრთელობისა და სოციალური დაცვის მინისტრის 2000 წლის 13 მარტის №30/ო ბრძანებაში ცვლილებებისა და დამატებების შეტანის შესახებ”

სახელმწიფო რეგისტრაციის ნომერი 470.140.000.11.119.004.549

საქართველოს შრომის, ჯანმრთელობისა და სოციალური დაცვის

მინისტრის ბრძანება №245/ნ

2000 წლის 7 დეკემბერი

ქ. თბილისი

„თორმეტ კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენებების ჩამონათვალის დამტკიცების შესახებ” საქართველოს ჯანმრთელობისა და სოციალური დაცვის მინისტრის 2000 წლის 13 მარტის №30/ო ბრძანებაში ცვლილებებისა და დამატებების შეტანის შესახებ”

„თორმეტ კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენებების ჩამონათვალის დამტკიცების შესახებ” საქართველოს ჯანმრთელობისა და სოციალური დაცვის მინისტრის 2000 წლის 13 მარტის №30/ო ბრძანებაში ცვლილებებისა და დამატებების შეტანის მიზნით, „ჯანმრთელობის დაცვის შესახებ” საქართველოს კანონის 140-ე მუხლის მე-2 პუნქტის შესაბამისად ვბრძანებ:

1. “თორმეტ კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენებების ჩამონათვალის დამტკიცების შესახებ” საქართველოს ჯანმრთელობისა და სოციალური დაცვის მინისტრის 2000 წლის 13 მარტის №30/ო ბრძანებაში შეტანილ იქნეს შემდეგი სახის ცვლილებები და დამატებები :

ა) ბრძანების პირველ პუნქტს დაემატოს შემდეგი შინაარსის „გ” და „დ” ქვეპუნქტები :

„გ) სამედიცინო ჩვენებით ორსულობის ხელოვნური შეწყვეტის ოპერაციის წარმოების ნებართვისათვის ჩვენებათა ჩამონათვალი (დანართი №3);

დ) არასამედიცინო ჩვენებით ორსულობის ხელოვნურად შეწყვეტის ოპერაციის ნებართვის გაცემის წესი (დანართი №4);”

ბ) ბრძანების მე-2 პუნქტი ჩამოყალიბდეს შემდეგი რედაქციით :

„2. დაევალოთ აფხაზეთის (ე.ბერია) და აჭარის (ა.ბერიძე) ავტონომიური რესპუბლიკების ჯანმრთელობის დაცვის მინისტრებს, საქართველოს შრომის, ჯანმრთელობისა და სოციალური დაცვის რეგიონალური დეპარტამენტების დირექტორებს (გ.ჩალათაშვილი, ქ.ლორია, ლ.მიროტაძე, ლ.გელაშვილი, ვ.ბეთლემიძე, ზ.ჯალაბაძე, გ.კუხიანიძე, ა.მურუსიძე, ლ.არაჩემია, ლ.სკამკოჩაიშვილი), ქ.თბილისის (დ.პავლიაშვილი), ქ.ფოთის (ვ.ვეკუა) და დაბა მესტიის (ო.ჭკადუა) მოსახლეობის შრომის, ჯანმრთელობისა და სოციალური დაცვის სამმართველოების უფროსებს უზრუნველყონ :

ა) წინამდებარე ბრძანების დანერგვა მათდამი დაქვემდებარებულ ტერიტორიაზე არსებულ სამეანო – გინეკოლოგიურ დაწესებულებებში;

ბ) წინამდებარე ბრძანების განუხრელი შესრულება მათდამი დაქვემდებარებულ ტერიტორიაზე;

გ) წარმოადგინონ ყოველი წლის ბოლოს, დადგენილი წესით, თორმეტ კვირაზე მეტი ხანგრძლივობის ორსულობის ხელოვნურად შეწყვეტის ოპერაციების რაოდენობის შესახებ ინფორმაცია;”

ა. ჯორბენაძე

დანართი №3

არასამედიცინო ჩვენებით ორსულობის ხელოვნურად შეწყვეტის ოპერაციის წარმოების ნებართვის ჩვენებათა ჩამონათვალი

ხელოვნურად შეწყვეტის ჩვენებების ჩამონათვალი, რომელიც კავშირში არ არის სამედიცინო მდგომარეობასთან და წარმოადგენს:

1. ქმრის I-II ჯგუფის ინვალიდობა;

2. ქმრის გარდაცვალება ცოლის ორსულობის დროს;

3. ქალის ან მისი ქმრის ყოფნა თავისუფლების აღკვეთის ადგილებში;

4. ქალის ან მისი ქმრის უმუშევრობის აღიარება სათანადო წესით;

5. სასამართლო გადაწყვეტილების არსებობა მშობელთა უფლებების შეწყვეტის ან შეზღუდვის შესახებ;

6. ქალი, რომელიც არ არის გათხოვილი;

7. განქორწინება ორსულობის დროს;

8. ორსულობა გაუპატიურების შედეგად;

9. საცხოვრებლის უქონლობა, ცხოვრება საერთო საცხოვრებელში ან ნაქირავებ ბინაში;

10. ქალი, რომელსაც გააჩნია ლტოლვილის ან იძულებით გადაადგილებული პირის სტატუსი;

11. მრავალშვილიანობა (3 ან მეტი შვილი);

12. ოჯახში ინვალიდი ბავშვის არსებობა;

13. შემოსავალი ოჯახის ერთ წევრზე ნაკლებია რეგიონისათვის დადგენილ მინიმუმზე;

14. თუ ქალის ასაკი არ აღწევს 15 წელს;

15. თუ ქალის ასაკი გადაცილებულია 45 წელს.

დანართი №4

არასამედიცინო ჩვენებით ორსულობის ხელოვნურად შეწყვეტის ოპერაციის ნებართვის გაცემის წესი

1.    ორსულობის შეწყვეტის საკითხი ზემოთჩამოთვლილი ჩვენებებით წყდება შრომის, ჯანმრთელობისა და სოციალური დაცვის სამინისტროს და ჯანდაცვის რეგიონალურ ცენტრებთან არსებული კომისიის მიერ, თუკი ქალს გააჩნია დასკვნა ორსულობის ვადის შესახებ, რომელიც დადგენილია ქალთა ტერიტორიული კონსულტაციის მთავარი ექიმის და 2 მეან-გინეკოლოგის მიერ, ექოსკოპიის დასკვნა და შესაბამისი იურიდიული დოკუმენტები (ცნობა ქმრის გარდაცვალების შესახებ, მოწმობა განქორწინების შესახებ და სხვა).

2.    თუკი არსებობს არასამედიცინო ხასიათის ჩვენებები ორსულობის შეწყვეტისათვის, რომლებიც არ არის გათვალისწინებული წინამდებარე ინსტრუქციაში, ორსულობის შეწყვეტის საკითხს წყვეტს შრომის, ჯანმრთელობისა და სოციალური დაცვის სამინისტროსთან არსებული კომისია ინდივიდუალური წესით.