„საქართველოს ტერიტორიაზე ხე-ტყის მოძრაობის წესებისა და მრგვალი ხე-ტყის (მორის) პირველადი გადამუშავების ობიექტის (სახერხი საამქროს) ტექნიკური რეგლამენტის დამტკიცების თაობაზე“ საქართველოს მთავრობის 2014 წლის 10 იანვრის №46 დადგენილებაში ცვლილების შეტანის შესახებ

„მუხლი 6¹. სახელმწიფო ტყის ფონდიდან ხე-ტყის ნარჩენის ტრანსპორტირებაზე სახელმწიფო ტყის ფონდის მართვის უფლების მქონე ორგანოს მიერ ხე-ტყის წარმოშობის დოკუმენტის გაცემა

1. სახელმწიფო ტყის ფონდიდან ხე-ტყის ნარჩენის ტრანსპორტირებაზე ხე-ტყის წარმოშობის დოკუმენტის გამცემი უფლებამოსილი პირი ვალდებულია:

ა) მოითხოვოს ხე-ტყის ნარჩენის (მათ შორის, ადგილზე დაქუცმაცებული ნარჩენის) გამოტანის უფლებისა და საფასურის გადახდის დამადასტურებელი დოკუმენტები (შესაბამისი სანებართვო დოკუმენტი, გადახდის ქვითარი), ასევე ხე-ტყის წარმოშობის დოკუმენტში დასაფიქსირებელი შესაბამისი ინფორმაცია (მათ შორის, მონაცემები სატრანსპორტო საშუალებისა და  გადამზიდავი პირის შესახებ);

ბ) შეამოწმოს სატრანსპორტო საშუალებაზე განთავსებული  ხე-ტყის ნარჩენის  მოცულობა;

გ) განაცხადოს უარი ხე-ტყის წარმოშობის დოკუმენტის გაცემაზე, თუ:

გ.ა) არ არსებობს ხე-ტყის წარმოშობის დოკუმენტის გაცემის საფუძველი;

გ.ბ) ხე-ტყის ნარჩენის  დატვირთვის ან დამზადების ფაქტობრივი ადგილი არ შეესაბამება სანებართვო დოკუმენტებს.

2. ხე-ტყის ნარჩენის გამოტანაზე ხე-ტყის წარმოშობის დოკუმენტის გაცემა ხდება ნარჩენის სატრანსპორტო საშუალებაზე დატვირთვის შემდგომ, დატვირთვის ადგილიდან ტრანსპორტირების დაწყებამდე. ამასთან, ხე-ტყის წარმოშობის დოკუმენტის გაცემისას:

ა) დოკუმენტის ყველა რეკვიზიტი ივსება ხე-ტყის წარმოშობის დოკუმენტის გაცემაზე უფლებამოსილი პირის მიერ;

ბ) მე-3 რეკვიზიტის პირველ გრაფაში − „ხე-ტყის ჯიში“ უნდა მიეთითოს − „ხე-ტყის ნარჩენი“, ხოლო მეორე გრაფაში − „ხე-ტყის მოცულობა“ უნდა მიეთითოს  სატრანსპორტო საშუალებაზე განთავსებული ხე-ტყის ნარჩენის (მათ შორის, დაქუცმაცებულ მდგომარეობაში) მოცულობა; მე-4 რეკვიზიტი არ ივსება და ყველა გრაფა გადაიხაზება Z-ით;

გ) ხე-ტყის წარმოშობის დოკუმენტის რეკვიზიტებში ასახული მონაცემების სისწორეზე პასუხისმგებლობა ეკისრება ხე-ტყის წარმოშობის დოკუმენტის გაცემაზე უფლებამოსილ პირს, გარდა მე-7 რეკვიზიტში −  „დანიშნულების ადგილი“ მისათითებელი ინფორმაციისა, რომლის შევსებაც ხორციელდება დაინტერესებული პირის მიერ მიწოდებული ინფორმაციის საფუძველზე.

3. დაუქუცმაცებელი ხე-ტყის ნარჩენის გამოტანისას ხე-ტყის წარმოშობის დოკუმენტის გაცემის შემთხვევაში ნარჩენის მოცულობის განსაზღვრისას დგინდება სატრანსპორტო საშუალების ძარის მოცულობა მ³-ში. ფოთლოვანი სახეობის ხის ნარჩენი დაანგარიშდება 0,20 კოეფიციენტზე ნამრავლით, შერეული  (წიწვოვან-ფოთლოვანი) სახეობის შემთხვევაში – 0,25 კოეფიციენტით, ხოლო წიწვოვანი სახეობის შემთხვევაში – 0,30 კოეფიციენტით.“.