საქართველოში ახალი კორონავირუსით გამოწვეული სოციალურ-ეკონომიკური მდგომარეობის გაუარესების გამო, ადიგენის მუნიციპალიტეტის მოსახლეობის (ფიზიკური პირები) და იურიდიული პირების დასუფთავების მოსაკრებლისაგან გათავისუფლების შესახებ

საქართველოს ორგანული კანონის „ადგილობრივი თვითმმართველობის კოდექსი“ 24-ე მუხლის პირველი პუნქტის „დ.ბ“ ქვეპუნქტის, „ადგილობრივი მოსაკრებლების შესახებ“ საქართველოს კანონის მე-3 მუხლის პირველი პუნქტის, მე-4 მუხლის მე-2 პუნქტის საფუძველზე და „კომუნალური გადასახადების სუბსიდირების წესისა და პირობების დამტკიცების შესახებ“ საქართველოს მთავრობის 2020 წლის 3 აპრილის №220 დადგენილების მე-6 მუხლის  შესაბამისად, ადიგენის მუნიციპალიტეტის საკრებულო ადგენს:

საქართველოში ახალი კორონა ვირუსით გამოწვეული სოციალური-ეკონომიკური მდგომარეობის გაუარესების გამო, ადიგენის მოსახლეობა (ფიზიკური პირები) სრულად გათავისუფლდნენ 2020 წლის მარტის, აპრილისა და მაისის თვეების დასუფთავების  მოსაკრებლის გადასახადისგან.

საქართველოში ახალი კორონა ვირუსით გამოწვეული სოციალური-ეკონომიკური მდგომარეობის გაუარესების გამო, ადიგენის მუნიციპალიტეტის ტერიტორიაზე არსებული იურიდიული პირები, რომლებსაც საქართველოში საგანგებო მდგომარეობის გამოცხადების გამო, შეეზღუდათ საქმიანობის განხორციელების უფლება, სრულად გათავისუფლდნენ 2020 წლის მარტის, აპრილისა და მაისის თვეების დასუფთავების მოსაკრებლის გადახდისგან.

ფიზიკურ და იურიდიულ პირებს, რომლებსაც უკვე გადახდილი აქვთ 2020 წლის მარტის, აპრილის ან/და მაისის თვეების დასუფთავების მოსაკრებელი, გადახდილი თანხა აესახოთ პირად სააბონენტო ბარათზე, გარდა მე-4 პუნქტში ჩამოთვლილი პირებისა.

ფიზიკურ და იურიდიულ პირებს უფლება აქვთ უარი განაცხადონ სუბსიდირებაზე, რომლის შესახებაც განცხადებით უნდა მიმართონ ააიპ „ადიგენის დასუფთავების სამსახურის“ ადმინისტრაციას (ს/ნ 422720611).

დადგენილება ამოქმედდეს გამოქვეყნებისთანავე და მისი მოქმედება გავრცელდეს 2020 წლის პირველი მარტიდან წარმოშობილ სამართლებრივ ურთიერთობებზე.