„საქართველოს თავდაცვის სამინისტროს თავდაცვის ძალების გენერალური შტაბის დებულების დამტკიცების შესახებ“ საქართველოს თავდაცვის მინისტრის 2018 წლის 13 დეკემბრის №132 ბრძანებაში ცვლილების შეტანის თაობაზე

1. მე-2 მუხლს დაემატოს 49-ე პუნქტი შემდეგი რედაქციით:

„49. კარტოგრაფიული, გეოდეზიური, საკადასტრო და პოლიგრაფიული სამუშაოების წარმოება, სხვადასხვა დანიშნულების რუკების შექმნა, აეროგადაღებით სამუშაოებში მონაწილეობის მიღება და კონტროლი.“.

2. მე-3 მუხლს დაემატოს 163¹–163⁷ პუნქტები შემდეგი რედაქციით:

„163¹. კარტოგრაფიული, გეოდეზიური და გეოინფორმაციული სამუშაოების წარმოება, განახლებული ციფრული და ანალოგური ტოპოგრაფიული რუკების შექმნა, აერო და სატელიტური გადაღების მასალების დამუშავება, აღრიცხვა და შენახვა.

163².  სამხედრო დანიშნულების სპეციალური რუკების,  საზღვაო და საავიაციო რუკების შექმნა.

163³.   საველე გეოდეზიური სამუშაოების განხორციელება, ტერიტორიის ერთიანი სივრცითი კარტოგრაფიული მოდელის შექმნა, ციფრული რუკების მონაცემთა ბაზების შექმნა, მათი მუდმივი განახლება და GIS პორტალზე ატვირთვა.

163⁴. სამინისტროს სტრუქტურული ქვედანაყოფების პოლიგრაფიული მომსახურება.

163⁵. სამინისტროს ინტერესის სფეროს განკუთვნილი უძრავი ქონების საკადასტრო აზომვითი სამუშაოების ჩატარება და დოკუმენტირება.

163⁶. კომპეტენციის ფარგლებში, საქართველოს ტერიტორიაზე განსახორციელებელ აეროგადაღებით სამუშაოებში მონაწილეობის მიღება და კონტროლი.

163⁷. საქართველოს სახელმწიფო საზღვრის სადელიმიტაციო-სადემარკაციო სამუშაოების წარმოება.“.

3. მე-4 მუხლს დაემატოს მე-14 პუნქტი შემდეგი რედაქციით:

„14. კარტოგრაფია-გეოდეზიის დეპარტამენტი:

ა) ტექნიკური მონიტორინგის სამმართველო:

ა.ა) სტერეოფოტოგრამმეტრიული განყოფილება;

ა.ბ) მონიტორინგის და უზრუნველყოფის განყოფილება;

ბ) კარტოგრაფიული უზრუნველყოფის სამმართველო:

ბ.ა) გეოინფორმაციული სისტემების ანალიტიკური განყოფილება;

ბ.ბ) დიზაინის და ციფრული დამუშავების განყოფილება;

ბ.გ) ციფრული ბეჭდვის განყოფილება;

გ) გეოდეზიური უზრუნველყოფის სამმართველო:

გ.ა) საინჟინრო გეოდეზიური განყოფილება;

გ.ბ) გარემოს სკანირებისა და მუდმივი მონიტორინგის განყოფილება.“.

4. მე-17 მუხლის შემდეგ დაემატოს 17¹ მუხლი შემდეგი რედაქციით:

„მუხლი 17¹. კარტოგრაფია-გეოდეზიის დეპარტამენტი

1. კარტოგრაფია - გეოდეზიის დეპარტამენტი ახორციელებს ამ დებულების მე-3 მუხლის 163¹ – 163⁷ პუნქტებში მოცემულ კომპეტენციებს.

2. ტექნიკური მონიტორინგის სამმართველო ახორციელებს:

ა) აერო და სატელიტური გადაღების მასალების კამერალურ დამუშავებას, აღრიცხვასა და შენახვას;

ბ) მულტიეროვნული გეოსივრცითი თანაწარმოების პროექტში (MGSP) მონაწილეობას და სამუშაო პროცესის წარმართვას;

გ) ციფრული და ანალოგური რუკების რედაქტირება-მონიტორინგს;

დ) კარტოგრაფიულ-საგამომცემლო ტექნოლოგიური პროცესების მონიტორინგს.

3. კარტოგრაფიული უზრუნველყოფის სამმართველო ახორციელებს:

ა) ციფრული და ანალოგური ტოპოგრაფიული რუკების შექმნას და განახლებას;

ბ) ციფრული რუკების მონაცემთა ბაზების შექმნას, განახლებას და GIS პორტალზე ატვირთვას;

გ) სამხედრო დანიშნულების სპეციალური რუკების, საზღვაო და საავიაციო რუკების შექმნას;

დ) ტერიტორიის  ერთიანი სივრცითი კარტოგრაფიული მოდელის შექმნას და თავდაცვის ძალებში მისი გამოყენების მეთოდების დანერგვას;

ე) თავდაცვის ძალების უზრუნველყოფას სხვადასხვა მასშტაბის ციფრული რუკების გეომონაცემთა ბაზებით,  ციფრული  და ანალოგური ტოპოგრაფიული რუკებით, სამხედრო დანიშნულების სპეციალური  და ზოგადგეოგრაფიული რუკებით და ქალაქების გეგმებით;

ვ) სხვადასხვა მასშტაბის ტოპოგრაფიული რუკების, სპეციალური და ზოგადგეოგრაფიული რუკების გამოცემას, წიგნების, ჟურნალ-გაზეთების და სხვა პოლიგრაფიული პროდუქციის დამზადებას;

ზ) საქართველოს ქალაქების გეომონაცემთა ბაზების შექმნას;

თ) ციფრული რუკების მონაცემთა ბაზების მუდმივ განახლებას სხვადასხვა აერო და სატელიტური გადაღებების, საველე დეშიფრირების და სხვადასხვა უწყებიდან მოწოდებული ინფორმაციის საფუძველზე;

ი) სამინისტროს სისტემაში GIS პორტალის და GIS მომზადების ორგანიზების სპეციალურ-მეთოდურ ხელმძღვანელობას;

კ) საქართველოს სახელმწიფო საზღვრის სადელიმიტაციო სამუშაოების წარმოებას;

ლ) სამინისტროს სტრუქტურული ქვედანაყოფების პოლიგრაფიულ მომსახურებას.

4. გეოდეზიური უზრუნველყოფის სამმართველო ახორციელებს:

ა) ტოპოგეოდეზიურ და საველე გეოდეზიურ სამუშაოებს;

ბ) სამინისტროს ინტერესის სფეროს განკუთვნილი უძრავი ქონების საკადასტრო-აზომვით სამუშაოებს და დოკუმენტირებას;

გ) საქართველოს ტერიტორიაზე განსახორციელებელ აეროგადაღებით სამუშაოებში მონაწილეობის მიღებას და კონტროლს, კომპეტენციის ფარგლებში;

დ) საქართველოს სახელმწიფო საზღვრის სადემარკაციო სამუშაოების წარმოებას.“.

5. მე-18 მუხლს დაემატოს 8² პუნქტი შემდეგი რედაქციით:

„8². კარტოგრაფია-გეოდეზიის დეპარტამენტის უფროსის დროებით არყოფნის შემთხვევაში, მის უფლება-მოვალეობებს ახორციელებს მინისტრის ინდივიდუალური ადმინისტრაციულ-სამართლებრივი აქტით განსაზღვრული დეპარტამენტის სამხედრო მოსამსახურე.“.