თავშესაფრის მაძიებლის ცნობის ფორმის, მისი გაცემისა და შეცვლის წესის დამტკიცების შესახებ

„საერთაშორისო დაცვის შესახებ“ საქართველოს კანონის 27-ე მუხლის პირველი პუნქტის, „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონში ცვლილების შეტანის თაობაზე“ საქართველოს 2018 წლის 5 ივლისის №3024-რს კანონის მე-2 მუხლის მე-5 და მე-8 პუნქტების, „ნორმატიული აქტების შესახებ“ საქართველოს ორგანული კანონის 25-ე მუხლის პირველი პუნქტის „ბ“ ქვეპუნქტისა და „საქართველოს შინაგან საქმეთა სამინისტროს დებულების დამტკიცების შესახებ“ საქართველოს მთავრობის 2013 წლის 13 დეკემბრის №337 დადგენილებით დამტკიცებული დებულების მე-5 მუხლის მე-2 პუნქტის „ა“ და „ნ“ ქვეპუნქტების საფუძველზე, ვბრძანებ:

დამტკიცდეს თავშესაფრის მაძიებლის ცნობის ფორმა, მისი გაცემისა და შეცვლის თანდართული წესი.

ძალადაკარგულად გამოცხადდეს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის 2017 წლის 26 იანვრის №81 ბრძანება „თავშესაფრის მაძიებლის ცნობის ფორმა, გაცემისა და შეცვლის წესი“ (www.matsne.gov.ge, 27/01/2017; სარეგისტრაციო კოდი: 010170000.22.029.016389).

ბრძანება ამოქმედდეს გამოქვეყნებისთანავე.

მუხლი 1. ზოგადი დებულებები

1. თავშესაფრის მაძიებლის ცნობის (შემდგომ – ცნობა) ფორმა, მისი გაცემისა და შეცვლის წესი (შემდგომ – წესი) შემუშავებულია „საერთაშორისო დაცვის შესახებ“ საქართველოს კანონის (შემდგომ – კანონი) საფუძველზე და განსაზღვრავს თავშესაფრის მაძიებლის ცნობის რეკვიზიტებს, ცნობის გაცემის, შეცვლისა და ასლის გაცემასთან დაკავშირებულ საკითხებს საერთაშორისო დაცვაზე განცხადების რეგისტრაციიდან საბოლოო გადაწყვეტილების მიღებამდე.

2. ცნობა (დანართი) ადასტურებს უცხოელის ან მოქალაქეობის არმქონე პირის მიერ საერთაშორისო დაცვაზე განცხადების შეტანას და საქართველოში მის კანონიერ ყოფნას.

3. სათანადო ფორმის გარეშე, მათ შორის, თარიღებისა და სიტყვების ცვლილების შემთხვევაში, გაცემულ ცნობას იურიდიული ძალა არ გააჩნია.

4. ცნობის გაყალბება ან სხვა პირისათვის გადაცემა ისჯება კანონით.

 

მუხლი 2. ცნობის რეკვიზიტები და აღწერილობა

1. ცნობის რეკვიზიტებია: 

ა) სახელი;

ბ) გვარი;

გ) დაბადების თარიღი;

დ) დაბადების ადგილი;

ე) წარმოშობის ქვეყანა

ვ) მოქალაქეობა;

ზ) ფოტოსურათი;

თ) უფლებამოსილი თანამდებობის პირის ხელმოწერა;

ი) ცნობის გაცემის თარიღი;

კ) ცნობის მოქმედების ვადა;

ლ) სპეციალიზებული ბეჭედი;

მ) ცნობის ნომერი.

2. ცნობა გაიცემა საერთაშორისო დაცვაზე განცხადების რეგისტრაციისთანავე და მისი მოქმედების ვადა განისაზღვრება ერთი წლით. აღნიშნული ვადა შეიძლება გაგრძელდეს კანონით გათვალისწინებულ შემთხვევებში. 

3. ცნობა არის ერთგვერდიანი, საქართველოს შინაგან საქმეთა სამინისტროს ბლანკზე დამზადებული დოკუმენტი. 

4. იმ შემთხვევაში, თუ თავშესაფრის მაძიებელს ჰყავს არასრულწლოვანი შვილი (შვილები), მასზე გაცემულ ცნობაში მიეთითება არასრულწლოვანი შვილის (შვილების) მონაცემები ქართულ და ინგლისურ ენებზე: სახელი, გვარი, დაბადების თარიღი.

 

მუხლი 3. ცნობის შევსება, შეცვლა და ასლის გაცემა

1. ცნობის შევსებას, შეცვლას და ასლის გაცემას უზრუნველყოფს საქართველოს შინაგან საქმეთა სამინისტროს მიგრაციის დეპარტამენტი (შემდგომ – დეპარტამენტი).

2. ცნობის შევსება ხდება თავშესაფრის მაძიებლის ანკეტაში ან/და საიდენტიფიკაციო დოკუმენტში არსებული მონაცემების საფუძველზე.

3. ცნობის შეცვლა ხდება ჩანაწერში უზუსტობის აღმოჩენის ან ცვლილების შეტანის შემთხვევაში.

4. ცნობის ასლის გაცემა ხდება, ცნობის დაზიანების ან დაკარგვის შემთხვევაში. დაზიანებული ცნობა წარმოდგენილი უნდა იქნეს დეპარტამენტში.

5. ცნობის დაკარგვის ან ჩანაწერში უზუსტობის აღმოჩენის შემთხვევაში, მისი მფლობელი ვალდებულია დაუყონებლივ აცნობოს დეპარტამენტს.

6. ცნობის შეცვლის ან ასლის გაცემის მოთხოვნით, ცნობის მფლობელი თავშესაფრის მაძიებელი წერილობით მიმართავს დეპარტამენტს.

7. ცნობის შეცვლის ან ასლის გაცემის დღიდან, დაკარგული ან სხვა მიზეზით შეცვლილი ცნობა ითვლება ძალადაკარგულად.

8. შეცვლილი ცნობა და ასლი გაიცემა პირველი ცნობის მოქმედების ვადით.