„საქართველოს ტერიტორიაზე გასავრცელებლად დაშვებული სასოფლო-სამეურნეო კულტურათა ჯიშების ეროვნული კატალოგი და ეროვნული კატალოგის წარმოების წესის დამტკიცების შესახებ“ საქართველოს გარემოს დაცვისა და სოფლის მეურნეობის მინისტრის 2018 წლის 24 დეკემბრის N2-1038 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად, ვბრძანებ :

1. პირველ მუხლს დაემატოს შემდეგი შინაარსის მე-3 პუნქტი:

„3. ეროვნული კატალოგი შეიძლება დაიყოს სახეობების მიხედვით.“.

2. მე-4 მუხლის მე-3 პუნქტს დაემატოს შემდეგი შინაარსის „ვ“ ქვეპუნქტი:

„ვ)  სელექციონერის მოთხოვნის შემთხვევაში, მცენარის  ჰიბრიდების და სინთეზური ჯიშების გენეალოგიური კომპონენტების გამოცდის შედეგების აღწერილობა, რომელიც უნდა იყოს კონფიდენციალური.“.

3. მე-4 მუხლის მე-7 პუნქტს დაემატოს შემდეგი შინაარსის „გ“, „დ“, „ე“ ქვეპუნქტები:

„გ) როდესაც შემოწმებით დადასტურდება, რომ სასოფლო-სამეურნეო კულტურათა ჯიში აღარ არის განსხვავებული, ერთგვაროვანი ან სტაბილური;

დ) როდესაც არ სრულდება ამ წესის დადგენილი მოთხოვნები;

ე) როდესაც სასოფლო-სამეურნეო კულტურათა ჯიშის ეროვნულ კატალოგში შეტანაზე განაცხადის შეტანის ან შემოწმების დროს, მიწოდებულია მცდარი ინფორმაცია, რომლის საფუძველზეც მოხდა  სასოფლო-სამეურნეო კულტურათა ჯიშის ეროვნულ კატალოგში შეტანა.“.

4. მე-4 მუხლს დაემატოს შემდეგი შინაარსის მე-10  პუნქტი:

„10. ეროვნულ კატალოგში შეტანილი სასოფლო-სამეურნეო კულტურათა ჯიშები უნდა იქნეს შენარჩუნებული ჯიშების შენარჩუნების არსებული პრაქტიკის შესაბამისად.“.