„საჯარო სამართლის იურიდიული პირის – აწარმოე საქართველოში დებულების დამტკიცების შესახებ“ საქართველოს ეკონომიკისა და მდგრადი განვითარების მინისტრის 2017 წლის 29 მაისის N1-1/217 ბრძანებაში ცვლილების შეტანის შესახებ

1. დებულების მე-4 მუხლის მე-2 პუნქტი ჩამოყალიბდეს შემდეგი რედაქციით:

„2. სააგენტოს სტრუქტურული ქვედანაყოფებია:

ა) მეწარმეობის დეპარტამენტი;

ბ) ინვესტიციების დეპარტამენტი;

გ) ექსპორტის დეპარტამენტი;

დ) ადმინისტრაციული დეპარტამენტი;

ე) ანალიზის, მონიტორინგის და შეფასების დეპარტამენტი;

ვ) საერთაშორისო ურთიერთობების და დონორთა კოორდინაციის სამსახური;

ზ) საზოგადოებასთან ურთიერთობისა და მარკეტინგის სამსახური;

თ) მომსახურების ცენტრი (სამსახური).“.

2. დებულების მე-4 მუხლიდან ამოღებულ იქნეს მე-3 პუნქტი.

3. დებულების მე-5 მუხლის:

ა)  მე-5  პუნქტი ამოღებულ იქნეს;

ბ) დაემატოს შემდეგი შინაარსის 5², 5³ და 5⁴ პუნქტები:

„5². საერთაშორისო ურთიერთობების და დონორთა კოორდინაციის სამსახურის ამოცანები და ფუნქციებია:

ა) სააგენტოს საქმიანობის შესაბამისად, დონორ და საერთაშორისო ორგანიზაციებთან თანამშრომლობის ხელშეწყობა, შესაბამისი ღონისძიებების ორგანიზებით საზოგადოებაში სააგენტოს საქმიანობის შესახებ ცნობიერების ამაღლება როგორც ადგილობრივ, ისე საერთაშორისო დონეზე;

ბ) სააგენტოს საქმიანობაში დონორების ჩართვის ახალი ტენდენციებისა და გამოცდილების შესწავლა, კონკრეტული მექანიზმებისა და რეკომენდაციების შემუშავება;

გ) სააგენტოს მიერ განხორციელებული პროგრამებისა და ინიციატივების ფარგლებში, დონორებთან და სააგენტოს პარტნიორებთან  თანამშრომლობის გაძლიერება და დივერსიფიცირება;

დ) საერთაშორისო და დონორი ორგანიზაციების განხორციელებული პროგრამებისა და აქტივობების შესახებ ინფორმაციის კონსოლიდაცია;

ე) საერთაშორისო ღონისძიებების (ფორუმი, მისიები და ა.შ.) ორგანიზება, განხორციელება და კოორდინაცია.

 5³. საზოგადოებასთან ურთიერთობისა და მარკეტინგის სამსახურის ამოცანები და ფუნქციებია:

ა) საზოგადოებასთან ურთიერთობის სტრატეგიის დაგეგმვა და განხორციელება;

ბ) სააგენტოს დადებითი იმიჯის უზრუნველყოფა როგორც ადგილობრივ, ისე საერთაშორისო დონეზე;

გ) მასმედიის წარმომადგენლებთან კომუნიკაცია და თანამშრომლობა;

დ) სააგენტოში მიმდინარე პროცესებთან დაკავშირებით, ოფიციალური განმარტებების, შეტყობინებების, საინფორმაციო ბიულეტენების, პრესრელიზების და სხვა ინფორმაციული მასალების მომზადება;

ე) სააგენტოს ოფიციალური ვებგვერდისა და სოციალური ქსელების მართვა;

ვ) მედიამონიტორინგის ანალიზის მიხედვით როგორც მოკლე, ასევე გრძელვადიანი ღონისძიებების დაგეგმვა და განხორციელება;

ზ) ორგანიზაციის საქმიანობასთან დაკავშირებით მარკეტინგული კამპანიების დაგეგმვა და განხორციელება.

5⁴. მომსახურების ცენტრის (სამსახური) ამოცანები და ფუნქციებია:

ა) დაინტერესებული პირებისთვის სახელმწიფოს ხელშემწყობი პროგრამების შესახებ ადგილზე და დისტანციური არხების საშუალებით (სატელეფონო ცენტრი და სხვ.) კონსულტაციის გაწევა;

ბ) დაინტერესებული პირების მხრიდან შესაბამის მომართვაზე ინფორმაციის მოძიება და მიწოდება;

გ) სატელეფონო გამოკითხვების განხორციელება;

დ) გაწეული კონსულტაციების შესახებ ანგარიშგებების მომზადება და შესაბამისი სამსახურებისათვის მიწოდება;

ე) სააგენტოს მომსახურების ცენტრის ელექტრონულ მისამართზე შემოსული კორესპონდენციის მართვა.“.