„ყაზბეგის მუნიციპალიტეტის ტერიტორიაზე, ზოგიერთ ადმინისტრაციულ ერთეულში საგზაო მოძრაობის ორგანიზების შესახებ“

საქართველოს ორგანული კანონის „ადგილობრივი თვითმართველობის კოდექსი“ 16-მუხლის მე-2 პუნქტის „კ“ ქვეპუნქტის, 24-ე მუხლის მე-2 პუნქტისa და 61-ე მუხლის მე-2 პუნქტის შესაბამისად ყაზბეგის მუნიციპალიტეტის საკრებულო ადგენს:

დამტკიცდეს ყაზბეგის მუნიციპალიტეტის ტერიტორიაზე, ზოგიერთ ადმინისტრაციულ ერთეულში საგზაო მოძრაობის ორგანიზება, კერძოდ: დაწესდეს შეზღუდვები ადგილობრივი მნიშვნელობის გზებზე გუდაურისა და კობის ადმინისტრაციულ ერთეულში  ზამთრის სეზონის ოფიციალური გახსნიდან სეზონის ოფიციალურ დახურვამდე, ყოველი პარასკევი დილის 10:00 საათიდან ორშაბათი დილის 10:00 საათამდე ეკონომიკური საქმიანობის განხორციელების მიზნით სატვირთო ავტომობილების (N_1,  N₂,  N₃  კატეგორიების) გადაადგილებასთან დაკავშირებით.

ყაზბეგის მუნიციპალიტეტის საკრებულოს №42 დადგენილების „ყაზბეგის მუნიციპალიტეტის ტერიტორიაზე არსებული ადგილობრივი მნიშვნელობის საავტომობილო გზების ნუსხის დამტკიცების შესახებ“ საფუძველზე, კობის ადმინისტრაციულ ერთეულში ადგილობრივი მნიშვნელობის გზად განსაზღვრულია ს-3-დან სოფ. კობის ეკლესიასთან და ს-3-დან თრუსოს ხეობის სოფლებთან დამაკავშირებელი გზები.

გუდაურისა და სოფელ კობის ადმინისტრაციულ საზღვრებში ადგილობრივი მნიშვნელობის გზებზე ეკონომიკური საქმიანობის განხორციელების მიზნით სატვირთო ავტომობილის მიერ განსაზღვრული დროის/ადგილის დარღვევით მოძრაობა გამოიწვევს საქართველოს კანონის ,,ადმინისტრაციული სამართალდარღვევათა კოდექსი’’-თ გათვალისწინებული სანქციების დაკისრებას.

დადგენილება ამოქმედდეს 2020 წლის 1 იანვრიდან.