„სამოქალაქო უსაფრთხოების სფეროს მოხალისეთა წესდების დამტკიცების შესახებ“ საქართველოს მთავრობის 2018 წლის 27 ნოემბრის №577 დადგენილებაში ცვლილების შეტანის თაობაზე

1. მე-2 მუხლის პირველი პუნქტი ჩამოყალიბდეს შემდეგი რედაქციით:

„1. მოხალისეობითი ურთიერთობა არის მოხალისისა და საქართველოს შინაგან საქმეთა სამინისტროს მმართველობის სფეროში შემავალი სახელმწიფო საქვეუწყებო დაწესებულების – საგანგებო სიტუაციების მართვის სამსახურის (შემდგომში − სამსახური) ურთიერთობა, რომელიც ამ წესდებისა და მხარეთა თავისუფალი ნების საფუძველზე მიღწეული შეთანხმების შესაბამისად ხორციელდება.“.

2. მე-4 მუხლის მე-7 პუნქტი ჩამოყალიბდეს შემდეგი რედაქციით:

„7. მოხალისეობის მსურველმა, რომელსაც შევსებული აქვს აპლიკაცია ოფიციალურ ვებგვერდზე − www.volunteers.ge-ზე, სამსახურის მიერ ორგანიზებულ შეკრებაზე უნდა წარადგინოს საქართველოს კანონმდებლობით დადგენილი წესით გაცემული ჯანმრთელობის მდგომარეობის შესახებ ცნობა. შეკრებაზე ხდება მოხალისეობის მსურველთან გასაუბრება და აპლიკაციისათვის განკუთვნილ კითხვარში მითითებული უნარ-ჩვევების გადამოწმება. აღნიშნული ეტაპის წარმატებით გავლის შემთხვევაში, მოხალისეობის მსურველი ელექტრონული ფორმით იღებს შეტყობინებას მისი კანდიდატურის მოხალისედ შერჩევის შესახებ.“.

3. მე-12 მუხლი ჩამოყალიბდეს შემდეგი რედაქციით:

„მუხლი 12. მოხალისე მეხანძრე-მაშველთა აღჭურვა და ქონებაზე პასუხისმგებლობა

1. ამ წესდების მე-11 მუხლის პირველი პუნქტის შესაბამისად შექმნილ მოხალისე მეხანძრე-მაშველთა ჯგუფებს სამსახური დროებით სარგებლობაში გადასცემს სახანძრო-სამაშველო ტექნიკას, სამოქალაქო უსაფრთხოებისთვის განკუთვნილ აღჭურვილობას, მეხანძრე-მაშველის ფორმის ტანსაცმელსა და სანივთე ქონებას.

2. სამსახური უფლებამოსილია, განახორციელოს ამ მუხლის პირველი პუნქტით გათვალისწინებული სახანძრო-სამაშველო ტექნიკისა და აღჭურვილობის საჭირო საწვავ-საპოხი მასალითა და შესაბამისი ტექნიკური მომსახურებით უზრუნველყოფა.

3. სახანძრო-სამაშველო ტექნიკასა და აღჭურვილობაზე პასუხისმგებელია ამ წესდების მე-11 მუხლის მე-4 პუნქტით განსაზღვრული პირი.“.