„ზოგადსაგანმანათლებლო დაწესებულების სახელმძღვანელოს/სერიის გრიფირების წესის დამტკიცების შესახებ“ საქართველოს განათლებისა და მეცნიერების მინისტრის 2017 წლის 16 თებერვლის №28/ნ ბრძანებაში ცვლილების შეტანის თაობაზე

1. მე-2 მუხლს „ჯ“ ქვეპუნქტის შემდეგ დაემატოს შემდეგი შინაარსის „ჰ“ ქვეპუნქტი:

„ჰ) მშობელთა ჩართულობა  –  ზოგადსაგანმანათლებლო დაწესებულების მოსწავლის მშობლისთვის ან კანონიერი წარმომადგენლისთვის (შემდეგში – მშობელი) სახელმძღვანელოს/სერიის მაკეტის (ანონიმური ეგზემპლარი) გაცნობისა და მათზე არგუმენტირებული შენიშვნა/რეკომენდაციის წარდგენის შესაძლებლობა.“.

2.  9¹ მუხლის შემდეგ დაემატოს შემდეგი შინაარსის 9² მუხლი:

„მუხლი 9². მშობელთა ჩართულობა რეცენზირების პროცესში

1. საზოგადოებრივი საწყისებიდან გამომდინარე, რეცენზირების პროცესში ხორციელდება მშობლების ჩართულობა, რაც გულისხმობს სახელმძღვანელოს/სერიის მაკეტის (ანონიმური ეგზემპლარი) გაცნობასა და მათზე არგუმენტირებული შენიშვნა/რეკომენდაციების წარმოდგენას.

2. რეცენზირების პროცესში მშობელთა შერჩევის, მათი ჩართულობის წესი და პირობები განისაზღვრება სახელმძღვანელოს/სერიის მაკეტის რეცენზირების წესით.

3. მშობელთა მიერ გამოთქმული შენიშვნა/რეკომენდაციების გაზიარების შესახებ გადაწყვეტილება მიიღება შესაბამისი საგნობრივი ჯგუფის წევრთა ხმათა უმრავლესობით, თუკი მაკეტზე გამოთქმული შენიშვნა/რეკომენდაცია მიმართულია მაკეტის გაუმჯობესებისკენ, საკმარისად დასაბუთებულია და მისი გათვალისწინება განპირობებულია აუცილებლობით.“.