,,საქართველოს თავდაცვის სამინისტროში სტაჟირების გავლის წესის დამტკიცების შესახებ“ საქართველოს თავდაცვის მინისტრის 2017 წლის 10 იანვრის №06 ბრძანებაში ცვლილების შეტანის თაობაზე

1. ბრძანების პრეამბულა ჩამოყალიბდეს შემდეგი რედაქციით:

„ნორმატიული აქტების შესახებ“ საქართველოს კანონის 25-ე მუხლის პირველი პუნქტის „ბ” ქვეპუნქტისა და საქართველოს მთავრობის 2018 წლის 12 დეკემბრის №580 დადგენილებით დამტკიცებული საქართველოს თავდაცვის სამინისტროს დებულების მე-3 მუხლის მე-4 პუნქტის „ფ.ბ“ ქვეპუნქტის საფუძველზე, ვბრძანებ:“.

2. ბრძანებით დამტკიცებული წესის:

ა) პირველი მუხლი ჩამოყალიბდეს შემდეგი რედაქციით:

„მუხლი 1

საქართველოს თავდაცვის სამინისტროში სტაჟირების გავლის წესი  (შემდგომში – წესი) განსაზღვრავს საქართველოს თავდაცვის სამინისტროს (შემდგომში – სამინისტრო) სამოქალაქო ოფისსა და საქართველოს თავდაცვის ძალებში (შემდგომში – ქვედანაყოფი) სტაჟირების გავლის წესსა და პირობებს.“; 

ბ) მე-5 მუხლი ჩამოყალიბდეს შემდეგი რედაქციით:

,,მუხლი 5

არაუგვიანეს ყოველი წლის პირველი დეკემბრისა, სამინისტროს სამოქალაქო ოფისში შემავალი ქვედანაყოფების უფროსებისა და საქართველოს თავდაცვის ძალების მეთაურის მიერ წარმოდგენილი მოთხოვნის გათვალისწინებით, ყოველი მომდევნო წლისათვის შესაბამისი ქვედანაყოფების ნუსხას და სტაჟიორთა ოდენობას განსაზღვრავს საქართველოს თავდაცვის მინისტრი (შემდგომში – მინისტრი).“;

გ) მე-6 მუხლის მე-3 პუნქტი ჩამოყალიბდეს შემდეგი რედაქციით:

,,3. კომისიის შემადგენლობაში სამინისტროს თავდაცვის ძალების წარმომადგენლები ამ წესით განსაზღვრულ უფლებამოსილებას ახორციელებენ მხოლოდ სამინისტროს თავდაცვის ძალებში სტაჟიორთა შესარჩევი კონკურსის დროს.“;

დ) მე-18 მუხლის მე-3 პუნქტი ჩამოყალიბდეს შემდეგი რედაქციით:

,,3. სტაჟირების შეწყვეტის შემთხვევაში, სტაჟიორი 3 (სამი) დღის ვადაში სამინისტროს, მათ შორის თავდაცვის ძალების უფლებამოსილ პირს აბარებს იმ მატერიალურ ფასეულობას, რაც მას სტაჟირების გავლის პერიოდში გადაეცა, გარდა ამ მუხლის პირველი პუნქტის „ვ“ ქვეპუნქტით გათვალისწინებული შემთხვევისა.“.