„საქართველოს სახელმწიფო ჯილდოების – ორდენებისა და მედლების“ დებულებაში ცვლილებისა და დამატებების შეტანის თაობაზე“

საქართველოს პარლამენტის დადგენილება

„საქართველოს სახელმწიფო ჯილდოების – ორდენებისა და მედლების“ დებულებაში ცვლილებისა და დამატებების შეტანის თაობაზე

    მუხლი 1

„საქართველოს სახელმწიფო ჯილდოების – ორდენებისა და მედლების“ დებულებაში (საქართველოს პარლამენტის უწყებები, №2, 1992 წელი, მუხ.101) შეტანილ იქნეს შემდეგი ცვლილება და დამატებები:

1. პირველი პუნქტი ჩამოყალიბდეს შემდეგი რედაქციით:

„1. საქართველოს იმ მოქალაქეთა დასაჯილდოებლად, რომელთაც გმირობა, მამაცობა გამოიჩინეს სამშობლოს დაცვისა და ერთიანობისათვის ბრძოლებში, განსაკუთრებული პირადი წვლილი შეიტანეს დამოუკიდებელი ქართული სახელმწიფოს მშენებლობაში, დაწესებულია საქართველოს შემდეგი სახელმწიფო ჯილდოები – ორდენები და მედლები:

ა) ეროვნული გმირის ორდენი;

ბ) წმინდა გიორგის სახელობის გამარჯვების ორდენი;

გ) დავით აღმაშენებლის ორდენი;

დ) ოქროს საწმისის ორდენი;

ე) ვახტანგ გორგასლის ორდენი – I, II, III ხარისხისა;

ვ) ღირსების ორდენი;

ზ) მედალი „მხედრული მამაცობისათვის“;

თ) მედალი „საბრძოლო დამსახურებისათვის“;

ი) ღირსების მედალი.“.

2. დებულებას დაემატოს შემდეგი შინაარსის 1¹ და 1² პუნქტები:

„1¹. საქართველოს ეროვნული გმირის წოდება არის საქართველოს უმაღლესი სახელმწიფო წოდება, რომელიც ენიჭება პირს საქართველოსთვის განსაკუთრებული, გამორჩეული გმირული ქმედებისათვის. საქართველოს ეროვნული გმირის წოდების მინიჭებასთან ერთად პირს გადაეცემა ეროვნული გმირის ორდენი.

1². წმინდა გიორგის სახელობის გამარჯვების ორდენი ენიჭება პირს საქართველოსთვის მოპოვებულ გამარჯვებებში შეტანილი განსაკუთრებული წვლილისათვის.“.

    მუხლი 2

ეს დადგენილება ამოქმედდეს გამოქვეყნებისთანავე.

საქართველოს პარლამენტის

თავმჯდომარე     ნ. ბურჯანაძე

თბილისი,

2004 წლის 24 ივნისი.

№218-რს