სახელმწიფო საკუთრებაში არსებული უძრავი ქონების შპს „ავსტრიან ჯორჯიან დეველოპმენტისათვის“ იჯარის უფლებით გადაცემაზე თანხმობის მიცემის შესახებ

საქართველოს მთავრობის

განკარგულება №2202

2017 წლის 19 ოქტომბერი

ქ. თბილისი

სახელმწიფო საკუთრებაში არსებული უძრავი ქონების შპს „ავსტრიან ჯორჯიან დეველოპმენტისათვის“ იჯარის უფლებით გადაცემაზე  თანხმობის მიცემის შესახებ

1. „სახელმწიფო ქონების შესახებ“ საქართველოს კანონის 36-ე მუხლის მე-2 პუნქტის შესაბამისად, მიეცეს თანხმობა საქართველოს ეკონომიკისა და მდგრადი განვითარების სამინისტროს სისტემაში შემავალ სსიპ − სახელმწიფო ქონების ეროვნულ სააგენტოს, რომ შპს „ავსტრიან ჯორჯიან დეველოპმენტს“ (ს/ნ: 404997232), 2019 წლის 29 ოქტომბრის ჩათვლით, წლიურ სარგებლობაში გადაცემის საფასურად − 6800 (ექვსი ათას რვაასი) ლარად, იჯარის უფლებით გადასცეს მესტიის მუნიციპალიტეტის სოფელ ჭუბერში არსებული არასასოფლო-სამეურნეო დანიშნულების 7627.00 კვ.მ მიწის ნაკვეთი (მიწის (უძრავი ქონების) საკადასტრო კოდი : №42.15.32.098).

2. ამ განკარგულების პირველი პუნქტით განსაზღვრული უძრავი ქონების სარგებლობაში გადაცემის პირობებად განისაზღვროს:

ა) სარგებლობაში გადაცემის საფასურის − 6800 (ექვსი ათას რვაასი) ლარის გადახდა ყოველწლიურად;

ბ) უძრავი ქონების გამოყენება საქართველოს მთავრობას, შპს „ავსტრიან ჯორჯიან დეველოპმენტს“, სს „ელექტროენერგეტიკული სისტემის კომერციულ ოპერატორს“, სს „საქართველოს სახელმწიფო ელექტროსისტემას“, სს „ გაერთიანებულ ენერგეტიკულ სისტემა საქრუსენერგოსა“ და შპს „ ენერგოტრანსს“ შორის 2016 წლის 19 ოქტომბერს გაფორმებული ურთიერთგაგების მემორანდუმით განსაზღვრული „ლახამი 1“ და „ლახამი 2“ ჰიდროელექტროსადგურების მშენებლობის მიზნით.

3. საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ − სახელმწიფო ქონების ეროვნულმა სააგენტომ, ამ განკარგულების შესრულების მიზნით, უზრუნველყოს კანონმდებლობით გათვალისწინებული ღონისძიების განხორციელება.

პრემიერ-მინისტრი                                          გიორგი კვირიკაშვილი