საჯარო სამართლის იურიდიული პირის - კიბერუსაფრთხოების ბიუროს დებულების დამტკიცების შესახებ საქართველოს თავდაცვის მინისტრის 2015 წლის 14 იანვრის №1 ბრძანებაში ცვლილების შეტანის თაობაზე

1. პირველი მუხლის მე-7 პუნქტი ამოღებულ იქნეს.

2. მე-2 მუხლი ჩამოყალიბდეს შემდეგი რედაქციით:

„მუხლი 2. ბიუროს მიზნები

ბიუროს მიზნებია:

ა) თავდაცვის სფეროს კრიტიკული ინფორმაციული სისტემის სუბიექტებში კიბერუსაფრთხოების უზრუნველყოფა;

ბ) თავდაცვის სფეროში ინფორმაციული უსაფრთხოების წინააღმდეგ მიმართული კიბერშეტევებისა და კომპიუტერული ინციდენტების მართვა;

გ) თავდაცვის სფეროში ინფორმაციული უსაფრთხოების პოლიტიკის შემუშავება და მისი განხორციელების ხელშეწყობა;

დ) კომპიუტერული ინციდენტების პრევენციისკენ მიმართული ღონისძიებების განხორციელება;

ე) ბიუროს კომპეტენციას მიკუთვნებული სფეროს მარეგულირებელი კანონმდებლობის შემუშავება და სრულყოფა;

ვ) კანონმდებლობით დადგენილი სხვა საქმიანობის განხორციელება.“.

3. მე-7 მუხლის მე-2 პუნქტის „ა“ ქვეპუნქტი ჩამოყალიბდეს შემდეგი რედაქციით:

 „ა)  კომპიუტერულ ინციდენტებზე დახმარების დეპარტამენტი;“.

4. მე-9 მუხლი  ჩამოყალიბდეს შემდეგი რედაქციით:

„მუხლი 9. კომპიუტერულ ინციდენტებზე დახმარების დეპარტამენტი

1. კომპიუტერულ ინციდენტებზე დახმარების დეპარტამენტის სტრუქტურული ერთეულებია:

ა) ინფორმაციული და საკომუნიკაციო სისტემების კონტროლისა და აუდიტის სამმართველო;

ბ) კომპიუტერულ ინციდენტებზე რეაგირებისა და ქსელური ინფრასტრუქტურის ინფორმაციული უსაფრთხოების მონიტორინგის სამმართველო;

გ) ინფორმაციული უსაფრთხოების პოლიტიკისა და რისკების შეფასების სამმართველო:

გ.ა) საკომუნიკაციო მომსახურებისა და ინფორმაციის დამუშავების განყოფილება.

2. კომპიუტერულ ინციდენტებზე დახმარების დეპარტამენტის ფუნქციები:

ა) თავდაცვის სფეროს კრიტიკული ინფორმაციული სისტემის სუბიექტებში ინფორმაციული სისტემების ტესტირება, ინფორმაციული ტექნოლოგიების უსაფრთხოების შემოწმება და შესაბამისი რეკომენდაციების გაცემა;

ბ) ინფორმაციული უსაფრთხოების პოლიტიკის გატარებისა და დანერგვის რეკომენდაციებისა და მექანიზმების შემუშავება;

გ) კომპიუტერულ ინციდენტებთან დაკავშირებული საფრთხეებისა და რისკების  იდენტიფიცირება, შეფასება და პროგნოზირება;

დ) კომპიუტერული ინციდენტების დროული გამოვლენა, რეაგირება და მათზე რეაგირების კოორდინაცია;

ე) ინფორმაციული ტექნოლოგიების სფეროში უსაფრთხოების უზრუნველსაყოფად აუცილებელი სტანდარტების დანერგვა;

ვ) კომპიუტერული ინციდენტების აღრიცხვა და მათზე რეაგირების პრიორიტეტების დადგენა და კატეგორიზაცია;

ზ) კომპიუტერული ინციდენტების პრევენციისკენ მიმართული ზომების კოორდინაცია, ანალიზი და ამგვარი ზომების დანერგვაში დახმარების გაწევა;

თ) ინფორმაციული უსაფრთხოების საკითხებზე ცნობიერების ამაღლების მიზნით საგანმანათლებლო და ინფორმაციული ღონისძიებების განხორციელება;

ი) რისკების ანალიზი, არსებული ინფორმაციული და საკომუნიკაციო სისტემების მოწყვლადობების დადგენისა და საფრთხეების იდენტიფიცირების მიზნით;

კ) ინფორმაციული უსაფრთხოების მართვის სისტემის დოკუმენტაციის (პოლიტიკის, პროცედურების, სახელმძღვანელოების) მომზადება;

ლ) სხვა მოვალეობები, რომლებიც დაკავშირებულია თავდაცვის სფეროში ინფორმაციული უსაფრთხოების უზრუნველყოფის მიზნებთან.

3. ინფორმაციული და საკომუნიკაციო სისტემების კონტროლისა და აუდიტის სამმართველოს ფუნქციები:

ა) თავდაცვის სფეროს კრიტიკული ინფორმაციული სისტემების სუბიექტებში ინფორმაციული უსაფრთხოების აუდიტის განხორციელება;

ბ) ინფორმაციული ტექნოლოგიების ადეკვატურობისა და სისტემის უსაფრთხოების დაცულობის შემოწმება და შეფასება, სისტემის კონფიდენციალურობის, მთლიანობის და ინფორმაციის ხელმისაწვდომობის უზრუნველყოფის მიზნით;

გ) ინფორმაციული და კომუნიკაციების სისტემების ტესტირება, სისუსტეების შესწავლა და უსაფრთხოების გაუმჯობესების მიზნით შესაბამისი რეკომენდაციების მომზადება;

დ) ინფორმაციული უსაფრთხოების პოლიტიკის გატარებისა და დანერგვის უზრუნველსაყოფად წინადადებების შემუშავება;

ე) ინფორმაციული და კომუნიკაციების სისტემების  ინფრასტრუქტურული და პროგრამული უზრუნველყოფის დანერგვისას უსაფრთხოების სტანდარტებთან შესაბამისობის კონტროლი;

ვ) კომპიუტერული ინციდენტების პრევენციისკენ მიმართული ზომების კოორდინაცია;

ზ) კომპიუტერული ინციდენტების შედეგების გამოსწორებისა და ზიანის მინიმიზაციის მიზნით დახმარების გაწევა;

თ) ინფორმაციული ტექნოლოგიების უსაფრთხოების სისტემების განვითარების ხელშეწყობა;

ი) სამმართველოში შემოსული კორესპონდენციის განხილვა და შესაბამისი რეაგირება.

4. კომპიუტერულ ინციდენტებზე რეაგირებისა და ქსელური ინფრასტრუქტურის ინფორმაციული უსაფრთხოების მონიტორინგის  სამმართველოს ფუნქციები:    

ა) კიბერშეტევების და კომპიუტერული ინციდენტების  დროული გამოვლენა და შესაბამისი რეაგირება;

ბ) კომპიუტერულ ინციდენტებზე რეაგირების პრიორიტეტების დადგენა და კატეგორიზაცია;

გ) კომპიუტერულ და ქსელურ ინფრასტრუქტურაში ინფორმაციული უსაფრთხოების მონიტორინგი;

დ) კომპიუტერული ინციდენტების პრევენციისკენ მიმართული ზომების დანერგვაში დახმარების გაწევა;

ე) განხორციელებული კიბერშეტევებისა და კომპიუტერული ინციდენტების შესწავლა და ანგარიშის მომზადება;

ვ) კომპიუტერული ინციდენტების იდენტიფიცირებისა და კვლევისათვის აუცილებელი მონიტორინგის სისტემების დანერგვა და მართვა;

ზ) კომპიუტერულ და  ქსელურ ინფრასტრუქტურაში არსებული სხვადასხვა რისკის შემცველი ჯგუფების კატეგორიზაცია და მონიტორინგი;

თ) კიბერსავარჯიშოების მეშვეობით სხვადასხვა ტიპის და სირთულის კიბერშეტევების და კომპიუტერული ინციდენტების მოდელირება;

ი) ინფორმაციული ტექნოლოგიების უსაფრთხოების სისტემების განვითარების ხელშეწყობა;

კ) კრიტიკული ინფორმაციული სისტემის სუბიექტის ინფორმაციული აქტივის, ინფორმაციული სისტემის ან/და ინფორმაციულ ინფრასტრუქტურაში შემავალ საგნებზე წვდომა (თუ ამგვარი წვდომა აუცილებელია მიმდინარე ან მომხდარ კომპიუტერულ ინციდენტზე სათანადო რეაგირებისათვის);

ლ)  სამმართველოში შემოსული კორესპონდენციის განხილვა და შესაბამისი რეაგირება.

5. ინფორმაციული უსაფრთხოების პოლიტიკისა და რისკების   შეფასების სამმართველოს ფუნქციები:

ა) რისკების მართვის, ინფორმაციული უსაფრთხოების პოლიტიკების, მეთოდოლოგიების,  პროცედურებისა და სახელმძღვანელოების შემუშავება და დანერგვა;

ბ) კრიტიკული ინფორმაციული სისტემების სუბიექტის შეფერხების ან/და მწყობრიდან გამოსვლის სავარაუდო შედეგების სიმძიმისა და მასშტაბის განსაზღვრა;

გ) კიბერშეტევებისა ან/და კომპიუტერული ინციდენტების დროს გამოყენებული  კიბერსაშუალებების სპეციფიკის შესწავლა, ინფორმაციის შეკრება და ანალიზი;

დ) მსოფლიოში არსებული სხვადასხვა ჯგუფებისა და ორგანიზაციების კიბერშეტევითი  შესაძლებლობების შესწავლა, ინფორმაციის სისტემატური შეკრება  და ანალიზი;

ე) კიბერშეტევის ან/და კომპიუტერული ინციდენტების დროს განხორციელებული ქმედებების, შედეგების და  მიყენებული ზიანის ანალიზის განხორციელება;

ვ) თავდაცვის სფეროში კიბერინციდენტებთან ან/და კომპიუტერულ ინციდენტებთან  დაკავშირებულ მოვლენათა სავარაუდო განვითარების სცენარების დამუშავება და შესაბამისი მოქმედების სარეზერვო გეგმების და პროცედურების გაწერა;

ზ) კომპიუტერული ინციდენტებისაგან დაცვის ახალი მეთოდების შემუშავებისათვის შესაბამის სტრუქტურულ ერთეულებთან კოორდინირებული მუშაობა;

თ) თავდაცვის სფეროში ინფორმაციული და კიბერუსაფრთხოების საკითხებში ცნობიერების ამაღლების მიზნით  სიტუაციურ სცენარებზე მორგებული კიბერსავარჯიშოების ჩატარება და საგანმანათლებლო/ ინფორმაციული ღონისძიებების განხორციელება;

ი) ინტეგრირებული სწავლების ელექტრონული სისტემის მართვა;

კ) სამმართველოში შემოსული კორესპონდენციის განხილვა და შესაბამისი რეაგირება.

6. ინფორმაციული უსაფრთხოების პოლიტიკისა და რისკების შეფასების სამმართველოს საკომუნიკაციო მომსახურებისა და ინფორმაციის დამუშავების განყოფილების ფუნქციები:

ა) თავდაცვის სფეროში კომპიუტერული ინციდენტების შეტყობინებებზე პირველადი კრიტიკულობის შკალის განსაზღვრა და აღრიცხვის ერთიან ელექტრონულ ბაზაში რეგისტრაცია;

ბ) კომპიუტერული ინციდენტების შეტყობინებებზე შესაბამისი სუბიექტებისათვის ინფორმაციის მიწოდება 24 საათის განმავლობაში, კვირაში 7 დღე;

გ) კომპიუტერული ინციდენტების აღრიცხვის ერთიან ელექტრონულ ბაზაში არსებული ინფორმაციის დამუშავება;

დ) კიბერშეტევის ან/და კომპიუტერული ინციდენტების არსებობისას უფლებამოსილ სუბიექტებთან კოორდინირებული მუშაობა;

ე) შესაძლო კიბერსაფრთხეების შესახებ მომხმარებელთა გაფრთხილება და მათთვის სათანადო ინფორმაციის მიწოდება;

ვ) თავდაცვის სფეროს კრიტიკული ინფორმაციული სისტემის სუბიექტებში ცხელი ხაზის შესახებ თანამშრომელთა ცნობიერების ამაღლება;

ზ) ინფორმაციის ტექსტური ან/და გრაფიკული დამუშავება შესაბამისი პროგრამის გამოყენებით;

თ) საინფორმაციო მომსახურება 24 საათის განმავლობაში, კვირაში 7 დღე.“.

5. მე-13 მუხლს დაემატოს 7¹ პუნქტი:

„7¹. სტრუქტურული ერთეულის უფროსის მოადგილე:

ა) კოორდინაციას უწევს სტრუქტურული ერთეულის საქმიანობას;

ბ) ანაწილებს მოვალეობებს სტრუქტურული ერთეულის თანამშრომლებს შორის და აძლევს მათ შესაბამის დავალებებს და მითითებებს;

გ) ზედამხედველობს სტრუქტურული ერთეულის თანამშრომლების მიერ სამსახურებრივი მოვალეობის შესრულებას;

დ) ხელს აწერს ან/და ვიზირებას უკეთებს სტრუქტურულ ერთეულში მომზადებულ დოკუმენტებს;

ე) სტრუქტურული ერთეულის უფროსის არყოფნის შემთხვევაში ასრულებს მის მოვალეობას.’’.

6. მე-15 მუხლის პირველ პუნქტს დაემატოს ბ¹ ქვეპუნქტი:

„ბ¹.  ხელშეკრულების საფუძველზე შესრულებული სამუშაოდან მიღებული შემოსავალი.“.