„სახელმწიფო საკუთრებაში არსებული უძრავი ქონების შპს „აგრო თრეიდინგ ჯორჯიასათვის“ პირდაპირი მიყიდვის ფორმით პრივატიზების შესახებ“ საქართველოს მთავრობის 2015 წლის 19 თებერვლის №301 განკარგულებაში ცვლილების შეტანისა და შპს „ნუტრიმაქსის“ საქმიანობის ხელშესაწყობად რიგ ღონისძიებათა განხორციელების თაობაზე

საქართველოს მთავრობის

განკარგულება №1610

2017 წლის 3 აგვისტო

ქ. თბილისი

 „სახელმწიფო საკუთრებაში არსებული უძრავი ქონების შპს „აგრო თრეიდინგ ჯორჯიასათვის“ პირდაპირი მიყიდვის ფორმით პრივატიზების შესახებ“ საქართველოს მთავრობის 2015 წლის 19 თებერვლის №301 განკარგულებაში ცვლილების შეტანისა და შპს „ნუტრიმაქსის“ საქმიანობის ხელშესაწყობად რიგ ღონისძიებათა განხორციელების თაობაზე

1. „სახელმწიფო ქონების შესახებ“ საქართველოს კანონის 49¹ მუხლის პირველი პუნქტის, საქართველოს ზოგადი ადმინისტრაციული კოდექსის 63-ე მუხლისა და „აწარმოე საქართველოში“ სახელმწიფო პროგრამის დამტკიცების შესახებ“ საქართველოს მთავრობის 2014 წლის 30 მაისის №365 დადგენილებით დამტკიცებული „სახელმწიფო პროგრამის“ მე-7 მუხლის მე-14 პუნქტის შესაბამისად, „სახელმწიფო საკუთრებაში არსებული უძრავი ქონების შპს „აგრო თრეიდინგ ჯორჯიასათვის“ პირდაპირი მიყიდვის ფორმით პრივატიზების შესახებ“ საქართველოს მთავრობის 2015 წლის 19 თებერვლის №301 განკარგულებაში შეტანილ იქნეს ცვლილება და მე-2 პუნქტის „ბ“ ქვეპუნქტი ჩამოყალიბდეს შემდეგი რედაქციით:

„ბ) ამ განკარგულების პირველი პუნქტით გათვალისწინებულ უძრავ ქონებაზე (გარდა №01.18.13.034.030 (მიწის (უძრავი ქონების)) საკადასტრო კოდით რეგისტრირებული მიწის ნაკვეთისა) სასოფლო-სამეურნეო დანიშნულების ცხოველების, ფრინველებისა და თევზების საკვების მწარმოებელი საწარმოს შექმნა და წარმოების დაწყება ამ განკარგულების გამოცემიდან არაუმეტეს 2 (ორი) წლის ვადაში;“.

2. „სახელმწიფო ქონების შესახებ“ საქართველოს კანონის 49¹ მუხლის პირველი პუნქტის შესაბამისად, შპს „ნუტრიმაქსი“ (ს/კ: 206330709, ყოფილი: შპს „აგრო თრეიდინგ ჯორჯია“) გათავისუფლდეს საქართველოს ეკონომიკისა და მდგრადი განვითარების სამინისტროს სისტემაში შემავალ სსიპ – სახელმწიფო ქონების ეროვნულ სააგენტოსთან 2015 წლის 10 მარტს დადებული ნასყიდობის ხელშეკრულების საფუძველზე, 2017 წლის 11 მარტიდან ამ განკარგულების საფუძველზე შესაბამისი ცვლილების ხელშეკრულების გაფორმებამდე დაკისრებული/დასაკისრებელი პირგასამტეხლოსაგან.

3. „სახელმწიფო ქონების შესახებ“ საქართველოს კანონის 49¹ მუხლის მე-2 პუნქტის შესაბამისად, შპს „ნუტრიმაქსმა“ უზრუნველყოს ამ განკარგულების გამოცემიდან არაუგვიანეს 2 თვის ვადაში 107 604 (ას შვიდი ათას ექვსას ოთხი) ლარის სახელმწიფო ბიუჯეტის სასარგებლოდ გადახდა.

4. ამ განკარგულების პირველი და მე-2 პუნქტები ძალაში შევიდეს ამავე განკარგულების მე-3 პუნქტით განსაზღვრული ვალდებულების შესრულების შემთხვევაში.

5. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა – სახელმწიფო ქონების ეროვნულმა სააგენტომ, ამ განკარგულების შესრულების მიზნით, განახორციელოს კანონმდებლობით გათვალისწინებული შესაბამისი ღონისძიებები.

პრემიერ-მინისტრი                                           გიორგი კვირიკაშვილი