ასპინძის მუნიციპალიტეტისათვის დროებითი ფინანსური დახმარების გამოყოფის შესახებ

საქართველოს მთავრობის

განკარგულება №1073

2017 წლის 1 ივნისი

ქ. თბილისი

ასპინძის მუნიციპალიტეტისათვის დროებითი ფინანსური დახმარების გამოყოფის შესახებ

1. ცნობად იქნეს მიღებული, რომ:

ა) საქართველოს კანონმდებლობით დადგენილი წესის შესაბამისად, ასპინძის მუნიციპალიტეტისათვის „საქართველოს 2017 წლის სახელმწიფო ბიუჯეტის შესახებ“ საქართველოს კანონით გათანაბრებითი ტრანსფერი გათვალისწინებული არ არის;

ბ) საქართველოს საგადასახადო კოდექსის მიხედვით გადასახადის გადახდისათვის განსაზღვრული ვადების გათვალისწინებით, ასპინძის მუნიციპალიტეტის მიერ 2017 წლის მე-2 კვარტალის რესურსი საკმარისი არ არის მუნიციპალიტეტის მიმდინარე ვალდებულებების დასაფინანსებლად;

გ) „ასპინძის მუნიციპალიტეტისათვის სესხის აღების და მუნიციპალიტეტის სახელით შესაბამისი სასესხო ხელშეკრულების გასაფორმებლად, ასპინძის მუნიციპალიტეტის გამგებლისათვის თანხმობის მიცემის თაობაზე“ ასპინძის მუნიციპალიტეტის საკრებულოს 2017 წლის 25 მაისის №2412 განკარგულებით ასპინძის მუნიციპალიტეტის გამგებელს მიეცა თანხმობა, დააყენოს საკითხი საქართველოს მთავრობის წინაშე 300 000 (სამასი ათასი) ლარის ოდენობის უპროცენტო სესხის აღების თაობაზე.

2. საქართველოს ორგანული კანონის „ადგილობრივი თვითმმართველობის კოდექსი“ მე-100 მუხლის მე-3 პუნქტისა და საქართველოს საბიუჯეტო კოდექსის 21-ე მუხლის მე-2 ნაწილის შესაბამისად, უფლება მიეცეს ასპინძის მუნიციპალიტეტს მოკლევადიანი სესხის აღების თაობაზე.

3. ასპინძის მუნიციპალიტეტის მიერ 2017 წლის ბიუჯეტით გათვალისწინებული ღონისძიებების შეუფერხებელი დაფინანსების მიზნით, საქართველოს ფინანსთა სამინისტრომ, „საქართველოს 2017 წლის სახელმწიფო ბიუჯეტის შესახებ“ საქართველოს კანონის მე-16 მუხლის მე-5 პუნქტის შესაბამისად, ასპინძის მუნიციპალიტეტს სესხის სახით გამოუყოს 300 000 (სამასი ათასი) ლარი შემდეგი პირობებით:

ა) სესხი გაიცეს სესხის მოთხოვნის უზრუნველყოფის საშუალების გარეშე;

ბ) სესხით სარგებლობის წლიური განაკვეთი განისაზღვროს ნული პროცენტით;

გ) სესხით სარგებლობის ვადა განისაზღვროს არაუგვიანეს 2017 წლის 1 სექტემბრისა.

4. ამ განკარგულების შესრულების კონტროლი განახორციელოს საქართველოს ფინანსთა სამინისტრომ.

პრემიერ-მინისტრი                                            გიორგი კვირიკაშვილი