„ქ. თბილისის მუნიციპალიტეტის ტერიტორიაზე მსხვილფეხა ან/და წვრილფეხა პირუტყვის ყოფნის წესის დამტკიცების შესახებ” ქალაქ თბილისის მუნიციპალიტეტის საკრებულოს 2014 წლის 30 დეკემბრის № 20-93 დადგენილებაში ცვლილების შეტანის თაობაზე

1. მე-3 მუხლის მე-2 პუნქტი ჩამოყალიბდეს შემდეგი რედაქციით:

„2. სპეციალურ ადგილზე გადაყვანილი პირუტყვი მესაკუთრეს/მფლობელს დაუბრუნდება მხოლოდ სპეციალურ ადგილზე პირუტყვის გადაყვანის და მოვლა-პატრონობის ხარჯების ანაზღაურების დამადასტურებელი დოკუმენტების სააგენტოში წარდგენის შემდეგ.

2. მე-3 მუხლს დაემატოს შემდეგი შინაარსის მე-5 პუნქტი:

„5. სპეციალურ ადგილზე გადაყვანილი პირუტყვის პატრონის/მფლობელის დადგენის შემთხვევაში, სააგენტო ვალდებულია შეატყობინოს პატრონს/მფლობელს, მის საკუთრებაში/მფლობელობაში არსებული პირუტყვის სპეციალურ ადგილზე გადაყვანის ფაქტის შესახებ, ამ ფაქტის დადგომის მომენტიდან არაუგვიანეს სამი კალენდარული დღისა.“.

3. მე-5 მუხლი ჩამოყალიბდეს შემდეგი რედაქციით:

„მუხლი 5. სპეციალურ ადგილზე გადაყვანილი პირუტყვის რეალიზების წესი

1. იმ შემთხვევაში, თუ 30 დღის ვადაში პირუტყვის მესაკუთრე/მფლობელი არ მიმართავს სააგენტოს სპეციალურ ადგილზე გადაყვანილი პირუტყვის დაბრუნების მიზნით და არ აანაზღაურებს პირუტყვის გადაყვანის და მოვლა-პატრონობის ხარჯებს, პირუტყვის რეალიზება განხორციელდება ელექტრონული აუქციონის (შემდგომში – აუქციონი) ფორმით, შემდეგი წესით:

ა) პირუტყვის რეალიზაციასა და აუქციონის ჩატარების თაობაზე გადაწყვეტილებას იღებს სააგენტოს ხელმძღვანელი;

ბ) აუქციონის ფორმით პირუტყვის რეალიზაციას მოახდენს სააგენტო,  სსიპ – საქართველოს ფინანსთა სამინისტროს  მომსახურების სააგენტოს ელექტრონულ გვერდზე www.eauction.ge;

გ) აუქციონის ჩატარების თაობაზე გადაწყვეტილების მიღებიდან არაუგვიანეს 3 სამუშაო დღისა, სააგენტო ოფიციალურ გვერდზე www.animalsmonitoring.ge აქვეყნებს განცხადებას, რომელიც უნდა შეიცავდეს:

გ.ა) აუქციონის დაწყების და დასრულების თარიღს;

გ.ბ) სარეალიზაციო პირუტყვის სახეობას, რაოდენობას, მოკლე აღწერას;

გ.გ) პირუტყვის საწყის სარეალიზაციო ღირებულებას;

გ.დ) უპირობო და გამოუხმობი საბანკო გარანტიის/ბეს ოდენობას;

გ.ე) ბიჯის სიდიდეს;

გ.ვ) საჭიროების შემთხვევაში აუქციონის  ჩატარების სხვა პირობებს.

დ) იმ შემთხვევაში, თუ დადგენილია ცხოველის მესაკუთრე/მფლობელი, სააგენტო ვალდებულია რეალიზაციას დაქვემდებარებული პირუტყვის მესაკუთრეს/მფლობელს, აუქციონის დაწყებამდე 3 დღით ადრე წერილობით ან სატელეფონო კომუნიკაციის საშუალებით შეატყობინოს ელექტრონული აუქციონის დაწყების დრო;

ე) სააგენტო ვალდებულია აუქციონის გამოცხადებამდე მოიკვლიოს პირუტყვის საბაზრო ფასი და საწყისი სარეალიზაციო ღირებულება განსაზღვროს ბაზრის კვლევით დადგენილი ოდენობის შესაბამისად;

ვ) აუქციონის დაწყების და დასრულების დროდ განისაზღვრება მინიმუმ 5 და მაქსიმუმ 45 კალენდარული დღე.

ზ) უპირობო და გამოუხმობი საბანკო გარანტიის/ების თანხის ოდენობა უნდა შეადგენდეს პირუტყვის საწყისი სარეალიზაციო ღირებულების არანაკლებ 10 %-ს და არაუმეტეს 80 %-ისა;

თ) ბიჯის ოდენობა განისაზღვრება პირუტყვის საწყისი ღირებულების 5 %-ით;

ი) თუ აუქციონზე პირველად გატანისას არ განხორციელდება პირუტყვის რეალიზაცია, სააგენტოს ხელმძღვანელი იღებს გადაწყვეტილებას საწყისი სარეალიზაციო ღირებულების 25%-ით შემცირების თაობაზე;

კ) თუ ამ პუნქტის „ი“ ქვეპუნქტით გათვალისწინებულ შემთხვევაში არ განხორციელდა პირუტყვის რეალიზაცია, სააგენტოს ხელმძღვანელი იღებს გადაწყვეტილებას პირუტყვის საწყისი სარეალიზაციო ღირებულების 50 %-ით შემცირების თაობაზე;

ლ) თუ ამ პუნქტის „კ“ ქვეპუნქტით გათვალისწინებულ შემთხვევაში არ განხორციელდა პირუტყვის რეალიზაცია, სააგენტოს ხელმძღვანელი იღებს გადაწყვეტილებას პირუტყვის საწყისი სარეალიზაციო ღირებულების 70 %-ით შემცირების თაობაზე;

მ) თუ ამ პუნქტის „ლ“ ქვეპუნქტით გათვალისწინებულ შემთხვევაში არ განხორციელდა პირუტყვის რეალიზაცია, სააგენტოს ხელმძღვანელი იღებს გადაწყვეტილებას პირუტყვის საწყისი სარეალიზაციო ღირებულების 70%-ზე მეტად შემცირებული ფასით რეალიზაციის თაობაზე.

2. დაჯარიმების თაობაზე გამოცემული აქტის გასაჩივრება არ ათავისუფლებს პირს 30 დღის ვადაში პირუტყვის გადაყვანის და მოვლა-პატრონობის ხარჯების ანაზღაურებისგან.“.