„საჯარო სამართლის იურიდიული პირის „ენერგოგენერაციის“ შექმნის შესახებ“ საქართველოს პრეზიდენტის 2000 წლის 29 თებერვლის №74 ბრძანებულებაში ცვლილებებისა და დამატებების შეტანის თაობაზე”

საქართველოს პრეზიდენტის

ბრძანებულება №596

2004 წლის 16 დეკემბერი

ქ. თბილისი

„საჯარო სამართლის იურიდიული პირის „ენერგოგენერაციის“ შექმნის შესახებ“ საქართველოს პრეზიდენტის 2000 წლის 29 თებერვლის №74 ბრძანებულებაში ცვლილებებისა და დამატებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლისა და „საჯარო სამართლის იურიდიული პირის შესახებ“ საქართველოს კანონის შესაბამისად „საჯარო სამართლის იურიდიული პირის „ენერგოგენერაციის“ შექმნის შესახებ“ საქართველოს პრეზიდენტის 2000 წლის 29 თებერვლის №74 ბრძანებულებით დამტკიცებულ დებულებაში შეტანილ იქნეს შემდეგი ცვლილებები და დამატებები:

ა) დებულების მე-4 პუნქტი ჩამოყალიბდეს შემდეგი რედაქციით:

„4. ენერგოგენერაცია ახორციელებს ენერგეტიკული საწარმოების სახელმწიფო კრედიტებით შესასრულებელი სარეაბილიტაციო სამუშაოების დაგეგმვა-ორგანიზებას, სახელმწიფო კრედიტებით განხორციელებულ ტექნიკურ ღონისძიებათა მოცულობისა და ხარისხის კონტროლს.“;

ბ) დებულების მე-8 პუნქტი ჩამოყალიბდეს შემდეგი რედაქციით:

„8. ენერგოგენერაციას მართავს მისი თავმჯდომარე, რომელსაც თანამდებობაზე ნიშნავს და თანამდებობიდან ათავისუფლებს საქართველოს ენერგეტიკის მინისტრი.“;

გ) დებულების მე-10 პუნქტის „გ“ ქვეპუნქტი ჩამოყალიბდეს შემდეგი რედაქციით:

„გ) ამტკიცებს ენერგოგენერაციის სტრუქტურას, საქართველოს ენერგეტიკის სამინისტროს წინასწარი წერილობითი თანხმობის საფუძველზე განსაზღვრავს და ამტკიცებს ენერგოგენერაციის საშტატო ნუსხასა და სახელფასო ფონდის განაკვეთებს;“;

დ) დებულების მე-11 პუნქტი ჩამოყალიბდეს შემდეგი რედაქციით:

„11. საჯარო სამართლის იურიდიული პირის – „ენერგოგენერაციის“ სახელმწიფო კონტროლს ახორციელებს საქართველოს ენერგეტიკის სამინისტრო, რომელიც სახელმწიფო კონტროლის განსახორციელებლად საჭირო მასალებისა და ინფორმაციის წარდგენის საფუძველზე უფლებამოსილია შეაჩეროს ან გააუქმოს საჯარო სამართლის იურიდიული პირის – „ენერგოგენერაციის“ არამართლზომიერი გადაწყვეტილება.“;

ე) დებულებას დაემატოს შემდეგი შინაარსის 11¹ და 11² პუნქტები:

„11¹. „ენერგოგენერაცია“ ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს საქართველოს ენერგეტიკის სამინისტროს.

11². „ენერგოგენერაციის“ წლიურ ბალანსს ამოწმებს საქართველოს ენერგეტიკის სამინისტროს მიერ დანიშნული დამოუკიდებელი აუდიტორი.“.

მ. სააკაშვილი