სახელმწიფო საკუთრებაში არსებული უძრავი ქონების შპს „კომპანია ბლექ სი გრუპისათვის“ პირდაპირი მიყიდვის ფორმით პრივატიზების შესახებ

საქართველოს მთავრობის

განკარგულება №876

2017 წლის 4 მაისი

ქ. თბილისი

სახელმწიფო საკუთრებაში არსებული უძრავი ქონების შპს „კომპანია ბლექ სი გრუპისათვის“ პირდაპირი მიყიდვის ფორმით პრივატიზების შესახებ

1. „სახელმწიფო ქონების შესახებ“ საქართველოს კანონის მე-18 მუხლის მე-3 პუნქტის შესაბამისად, სახელმწიფო საკუთრებაში არსებული, ამ განკარგულების დანართით გათვალისწინებული უძრავი ქონება პირდაპირი მიყიდვის ფორმით, 199300 (ას ოთხმოცდაცხრამეტი ათას სამასი) ლარად საკუთრებაში გადაეცეს შპს „კომპანია ბლექ სი გრუპს“ (ს/კ: 204477734).

2. ამ განკარგულების პირველი პუნქტით გათვალისწინებული უძრავი ქონების საპრივატიზებო პირობებად განისაზღვროს:

ა) საპრივატიზებო თანხის გადახდა შესაბამისი განკარგულების გამოცემიდან 6 (ექვსი) თვის ვადაში, შემდეგი გრაფიკის მიხედვით:

ა.ა) შესაბამისი განკარგულების გამოცემიდან 3 (სამი) თვის ვადაში 90 000 (ოთხმოცდაათი ათასი) ლარის გადახდა;

ა.ბ) შესაბამისი განკარგულების გამოცემიდან 4 (ოთხი) თვის ვადაში 120 000 (ას ოცი ათასი) ლარის გადახდა;

ა.გ) შესაბამისი განკარგულების გამოცემიდან 5 (ხუთი) თვის ვადაში 150 000 (ას ორმოცდაათი ათასი) ლარის გადახდა;

ა.დ) შესაბამისი განკარგულების გამოცემიდან 6 (ექვსი) თვის ვადაში 199 300 (ას ოთხმოცდაცხრამეტი ათას სამასი) ლარის გადახდა;

ბ) შესაბამისი ხელშეკრულების გაფორმებიდან არაუმეტეს 6 (ექვსი) თვის ვადაში, პირადად ან მესამე პირის მეშვეობით, ამ განკარგულების დანართით გათვალისწინებული უძრავი ქონების განვითარების მიზნით არანაკლებ 500 000 (ხუთასი ათასი) ლარის ინვესტიციის განხორციელება.

3. შპს „კომპანია ბლექ სი გრუპი“ ვალდებულია, შესაბამისი ხელშეკრულების გაფორმებამდე წარადგინოს ამ განკარგულების მე-2 პუნქტის „ბ“ ქვეპუნქტით განსაზღვრული ინვესტიციის არანაკლებ 10%-ის ოდენობის უპირობო და გამოუხმობი საბანკო გარანტია, რომლის მოქმედების ვადაც ამავე ქვეპუნქტით განსაზღვრული საპრივატიზებო პირობის შესრულების ვადას უნდა აღემატებოდეს არანაკლებ 4 (ოთხი) თვით და რომელიც უზრუნველყოფს ამ განკარგულების მე-2 პუნქტით გათვალისწინებული საპრივატიზებო პირობების შესრულებას (მათ შორის, მათი შეუსრულებლობისათვის შესაბამისი ხელშეკრულების საფუძველზე დაკისრებული პირგასამტეხლოს გადახდას).

4. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა – სახელმწიფო ქონების ეროვნულმა სააგენტომ, ამ განკარგულების შესრულების მიზნით, განახორციელოს კანონმდებლობით გათვალისწინებული შესაბამისი ღონისძიებები.

პრემიერ-მინისტრი გიორგი კვირიკაშვილი